थु़र्मा 24
24
किब्दी साखामचो़ फेलिक्सकु ङादोडा पावल
1ङोलेम चङडा डोक्पु ङाउ डु़म्लाचो़ हननिया, कोले-नले ङाउमिम, तर्तुल्लस र्वाक्मा कोले वकीलनुङ मेसिन्डा रोम्डी, मा मेर्मिमका पावलकु कोर्थो़लाममिम रिबुसी ल्वाकु दुथाममिम ल्वा किब्दी साखामचो़ फेलिक्सकु ल्वाड्डा ग्वाम्डी। 2पावल मेसिन्डा येट्मिडी, मा तर्तुल्लसका आरे र्वाक्तो मुमा बेन्मु चो़म्डु़,
“खोत्लेडाम डोक्पु ङाचो़ फेलिक्स, ओराम नेब्दीडा गानी जो़पा खारी बेन्निमका इनीमा गोजु़डा गुकु छो़म आकी न-गो भ्रसिक्पा बुकु। 3ओर्मिम खोत्ले ल्वाकाम लागि गुकु गानीलाई आकीमा न-गोलामका ङा आलासो़ र्वाकु। 4इनीमा र्वा मेओन्नु़ र्वाक्साका ओम्लो गो हापा मेजेङु, मा गानी गुकु र्वाकुमिम ल्वा थो़नी, 5ओराम मु़चु़ बान्तेमेनो थो़मतेर्बाल्पा, सु़म्दिसेरडा खोत्लेथो़म खोत्ले यहूदीमिमगोडा रिबुसी किट्पा, मा नासरी दलगोडाम उनीमा डोक्पु मु़चु़ गुकु डार्तोकोम बु। 6ओरामका सो़रनेम मेसेपा बोमु माल्लु़म बाइडा, लावो ओरामलाई गुकु चु़म्तोको। आकी डु़म्लाका र्वामिम होम्साका ओरामलाई देन्दे ग्वामु वो खाप्तोकोम बाइडा। 7लावो कमाण्डर लुसियस आकीमाडा रोम्डी, मा पावललाई चिरोत्तिकिमिमा लम्डी। पावललाई मुमा बेट्पामिम इनीमाडा रोमिनु़ र्वाम्डी। 8आथा गानी इनी त्वाका ङा ओ पावलनुङ हिलाहिसी बोनिमाला, गुकु ओरामलाई मुमा बेत्तोकोम खोत्ले ल्वा चनी।” 9मेसिन्डाम यहूदीमिमका वो मेर्मिम खोत्ले ल्वा आच्छाङा र्वाम्डी।
10किब्दी साखामचो़ फेलिक्सका गुलाई ल्वा थो़त्तो जेबेड्डु़ मा पावलका र्वाक्ता, “हापा थ आथाम गानी यहूदीमिमकु निया बेपा दु़म्निम ल्वा थो़उतोमका गो गेर्सिक्तो आमा दुथाममिम ल्वा र्वाङु, 11गो यरूशलेमडा माम्चु़नीकु सो़रलोले बेप्डा लङडोम को-न (१२) लेम कोङङा दु़स्ताम बु र्वाक्पा ल्वा गानी मेडेङा थेसिथेन्ल्यानी। 12ओर्मिम सु़का वो गोलाई कोङनिमनुङ सो़रनेमगोडा ल्वालामका खाल्बेपाम बाट्पा, मा घ्रो़म्दीनेम, शहरबाडे मु़चु़मिमलाई कोक्तोमिम वो मेडार्ङिमिवा। 13ओम्लो गोलाई मुमा बेन्ङिमिमिम ल्वाकु दुथाम वो ओर्मिमका आच्छाङा र्वाक्पा हाम वो रेम्बोमु मेचाम्मी। 14लावो गो गानीनुङ र्वाङु, ओर्मिमका मेजो़पा मिम्मिमिम कोले दल र्वाक्मा लाम्दीडा लाम्दित्तोङा बेउ। गो आकी ङाउ-खुउमिमकु माम्चु़नीकाम सो़रलोले बेउ, मा मोशाकु डु़म्लाडा नुङ माम्चु़नीलाम-जेपामिमकु खाजेमडा र्याक्मा खोत्ले ल्वामिमडा थो़र बेउ। 15मेर्मिमका जो़पा खारी बेपा नुङ मेजो़पा खारी बेपा मु़चु़मिम खोत्ले सिमिमा बमी र्वाक्साका माम्चु़नीडा लम्थाट्मिमिम होम्साका ङा गो वो लथाक्पुमिम बु। 16मेम्मिमका मु़चु़ नुङ माम्चु़नीकु ङादोडा हेल्लो लोवो आमा त्वाकु चाप्सी गो जो़पा न-गो जु़लु।
17 #
थु़र्मा २१:१७-२८
“गो हापा थ चङडा आमा मु़चु़मिमलाई ख्लो़मु खउलुङ नुङ सासेन्मु ग्वा-ग्वा रेत्तोमा यरूशलेमडा रोङडोम बाइडा। 18मेर्मिमका गोलाई सो़रनेमगोडा डार्ङिडिमिलो गो सेपा दु़म्मुकु खारी वो बोमु दु़म्तोम बाइडा। मेकोतिलो गोनुङ खोम्सिक्पा मु़चु़मिम सु़ वो मेबामिवा, मा गो सु़काम वो उनीमा थो़मतेर्साक्तोमिम मेबायावा। लावो मेसिन्डा एशियाडाम कोङनिम यहूदीमिम बाम्डी। 19मेर्मिम आसिन्डा इनीमा ङादोडा रोमु बासिक्पा बाइडा। आमा दुथाम कोङनिम मेजो़पा-ल्वा बायावा माला मेर्मिमका र्वामु चाप्मिवा। 20ओर्मिमनुङ हिलाबेनी, यहूदीकु डोक्पु घ्रो़म्दीडा हाम मेजो़पा खारी बेउतोम डार्मिडी? 21लावो ओर्मिमकु ङादोडा येम्सिङ्डोमा कोले ल्वा र्वाङ्डोम बाइडा। मेराम, ‘मु़चु़मिम सिमुलामका बम्गेट्मी र्वाक्पा ल्वाडा गो थो़र लु़ङुमिमका इनीमा ङादोडा हिलाहिसी बेप्डा रेट्ङिडिमिम बु’।”#थु़र्मा २३:६
22फेलिक्सका ख्रीष्टकु लाम्दीकु दुथाम जो़होमका चडु़म बाइडामका ओर्मिम खोत्ले थो़मु दु़म्स्तु़मा मेर्मिमलाई आरे बेसाका थु़र्स्तु़मी, “कमाण्डर लुसियस आसिन्डा रोमा इनीमा रिबुसी ल्वा गो फ्यान्सानिनी।” 23मेकोतिमा फेलिक्सका कप्तानलाई बु़डु़, पावललाई इमा फारफार बे, मेकोति मेबथाडा, उमा ङोप्सो़मिमका गुलाई चाहेदु़म्पा हाम-हुम कोर्मिलो मेभोप्डामी।
24कोलेम-नलेम चङडा फेलिक्स उ यहूदी नाइमे द्रुसिल्लानुङ रोक्ची। मेकोतिमा पावललाई येड्डु़मा येशू ख्रीष्टडाम थो़रकु दुथाममिम ल्वा पावललामका थो़स्तु़। 25लावो पावलका, “माम्चु़नीकु ङादोडा हाम जो़पा बु, मे ङा बोमु बासी, त्वापलाई जो़होमका जु़ल्मु बासी, माम्चु़नीका खोत्लेकाम निया बेपा थारी रोक्तोङा लेडु़” र्वाक्तालो फेलिक्स ङिस्तामा र्वाक्ता, “आनेप आकोतिङा, गाना लना लोवो नु़, दिफु वो गो येनी!”
26पावलका खउलुङ ग्वाङी वो र्वाक्पा किब्दी साखामचो़ फेलिक्सका मिम्डु़म बाइडा। मेम्मिमका गुका पावल हेल्लो लोवो येड्डु़मा ल्वा बु़थाल्लु़। 27लावो नक थ चङडा फेलिक्सकु खुन्चु़म पर्किअस फेस्तसका रङडु़, मा यहूदीमिमलाई गेर्सिबेन्मु फेलिक्सका पावललाई चक्जो़ल्लु़मा लस्ता।
Okuqokiwe okwamanje:
थु़र्मा 24: THUL
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Wycliffe Bible Translators, Inc. All rights reserved.