मत्ती 18
18
स्वर्ग का राज्य मा बड़ो कु च?
(मरक 9:33-37; लूका 9:46-48)
1तब तुरंत चेला यीशु का संमणी ऐ के पुछण लगि गैनी “स्वर्ग का राज्य म बड़ो कु च?” 2ऊंका यु सवाल का जवाब मा वेल एक बच्चा तैं ऊंका नजीक मा खड़ो कैरी। 3अर बोलि, “मि तुम मा सच बुल्ण छौं कि तुम मनों तैं फिरैल्या अर बच्चों का जन बंणिल्या तब तुम ल स्वर्ग का राज्य मा जै सकण।” 4जु कुई अफ तैं ये बच्चा की तरौं नम्र बणालु उ परमेश्वर का राज्य मा सबसे बड़ो होलो। 5अर जु कुई मेरा नौं से एक इन बच्चा तैं स्वीकार करदो उ मि तैं स्वीकार करदो।
ठोकर खिलांण वलो पर हाय
(मरक 9:42-48; लूका 17:1-2)
6पर जु कुई यूं छुटों मा बट्टी जु मि पर विश्वास करदींनि ऊं तैं उतेडो लगौ त वेकु त यु भलो च कि उ अपड़ा गौळा मा जंदरा को पाट लटकाये जौं अर उ समुद्र मा डाले जौं। 7ठोकर का कारण से दुनिया पर हाय ठोकर को लगंण जरूरी च पर हाय च वे मनिख पर जैकी तरपां बट्टी ठोकर का कारण पाप हुंद। 8पाप का वे कारण तैं अफ बट्टी दूर कैरी के निकाली दे अर वे तैं स्वीकार कर जन जु तेरु हथ त्वे तैं ठोकर लगौ त वे तैं काटि दे बगैर हथ त्वे तैं स्वर्ग मा जांण यां बट्टी भलो च कि द्वी हथ हवे कै भि नरक की अनन्त आग मा डाले जै। 9पाप का वे कारण तैं अफ बट्टी दूर कैरी के निकाली दे अर वे तैं स्वीकार कर जन जु तेरा आँखों त्वे तैं उतेडो लगौ त वे तैं निकाली दे कांणो हवे कै परमेश्वर का राज्य मा जांण त्वे कु भलो होलो कि द्वी आँखा हवे कै भि तु नरक मा डाले जै।
हरचि ढिबरा की मिसाल
(लूका 15:3-7)
10“देखा तुम मा यूं छुटों मा बट्टी कै तैं भि तुच्छ नि जणयां किलैकि मि तुम मा बुल्णु छौं, कि स्वर्ग मा ऊँका स्वर्गदूत मेरा बुबा की उपस्थिति मा रौंदा छिन।” 11किलैकि मि मनिख कु नौंनो हरच्यां लुखुं तैं बचांणु कु ऐ। 12“तुम क्य समझदियां? जु कै मनिख कि सौ ढिबरा हो अर ऊंमा बट्टी एक हरचि जौं त उ निन्यानबे तैं एक सुरक्षित जगह मा छोड़ी के उ न पौड़ो पर जै के वीं हरचिं ढिबरा तैं नि खुज्यालो? 13अर जु इन हो कि व मिली जौं त मि तुम मा सच बुल्णु छौं कि उ ऊं निन्यानबे ढिबरों कु जु हरचि नि छै इथग खुशी नि मंणालु जथग कि ईं हरचिं ढिबरा कु खुशी मंणालु। 14इन ही तुमारा बुबा जु स्वर्ग मा च या मनसा च कि यूं छुटों मा बट्टी कै एक को भि नाश न हो।
अपराधियों का प्रति बरतौ
(लूका 17:3)
15जु तेरु विश्वासी भैय तेरा विरुद्ध अपराध कैर त जा अर यखुली मा बात कैरी कै वे तैं समझौ अर पश्चाताप कैर, त तु अपड़ा विश्वासी भैय तैं वापिस पयेलि। 16जु उन ही सूंणु त एक या द्वी आदमियों तैं अफ दगड़ी ली जा, किलैकि मूसा की व्यवस्था का अनुसार हरेक पाप कु द्वी या ऊं से जादा गवाहों का द्वारा पक्की हवे जौं।” 17जु उ ऊंकी भि नि मांणु त मण्डलि मा जै कै बोलि दे पर जु उ मण्डलि कि भि नि मांणु त वेका दगड़ी वे जन ही बरतौ किये जौं तुम कै अन्यजाति या चुंगी लींण वलो का दगड़ी किये जौ।
रुकण अर अवसर दींण
18“मि तुम मा सच बुल्णु छौं कि जु कुछ तुम धरती मा बन्धिल्या उ स्वर्ग मा बंधे जालो अर जु कुछ तुम धरती मा खोलिल्या उ स्वर्ग मा खुलै जालो। 19फिर मि तुम मा बुल्णु छौं जु तुम मा बट्टी द्वी आदिम कैं बात कु एक मन हवे के वीं बात तैं मगिल्या त व मेरा बुबा कि तरपां बट्टी जु स्वर्ग मा च उन ही तुम कु हवे जालो। 20किलैकि जख द्वी या तीन आदिम मेरा शिष्य हूंणु कु कठ्ठा हूंदींनि उख मि ऊंका बीच मा हूंद किलैकि तुम मेरा शिष्य छा।”
माफ नि कन वला दास की मिसाल
21तब पतरस ल संमणी ऐ के वेमा बोलि, “हे प्रभु जु मेरू विश्वासी भैय अपराध कनु रौ त मि वे तैं कथग बार माफ कैर?” क्य सात बार तक 22यीशु ल वेमा बोलि, “मि त्वे मा यु नि बुल्णु कि सात बार तक बल्कि सात का सत्तर बार का तुम वे तैं माफ कर दींण चयणु च।” 23इलै स्वर्ग राज्य वे मिसाल का जन च जै ल अपड़ा सेवकों बट्टी हिसाब किताब लींण चै। 24जब उ हिसाब लींणु छो त एक मनिख वेका संमणी लये गै जु दस हजार #18:24 एक तोड़ा कु मूल्य करीब 15 साल की मज़दूरी से जादा च। चाँदी के तोड़ा कु मूल्य लगभग छह हजार दीनार का बराबर रै होलो।तोडों कु कर्जदार छो। 25जबकि वे मा चुकौंणु कु कुछ नि छो त वेका स्वामि ल बोलि यु अर ये कि घरवलि अर बाल-बच्चा अर यु मा जु कुछ भि च सब बिके जौं अर फिर कर्ज चुकाये जौं। 26ईं बात पर वे सेवक ल झुकि के वे तैं प्रणाम कैरी अर बोलि, हे स्वामि जरा कुछ दिन और ठैर मि तेरु सब कुछ चुकै दयुलु। 27तब वेका स्वामि तैं वे पर दया ऐ अर वे तैं छोड़ी दींनि अर वेको कर्ज भि माफ कैरी दींनि। 28“पर जब उ सेवक भैर निकली त वे दगड़िया सेवकों मा बट्टी एक वे तैं मिली जु वेको सौ दिन की मजदूरी को कर्जदार छो वेल वे तैं पकड़ी के वेको गौला घोंटी अर बोलि जु कुछ त्वे पर कर्ज च भोरि दे।” 29ईं बात पर उ सेवक झुकि के वे बट्टी बिनती कन लगि गै कि जरा कुछ दिन और ठैर मि सब भोरि दयुलु। 30वेल नि मांणि पर जै के वे तैं जेलखना मा डाली दींनि कि जब तक कर्ज नि भोरि द्यो तब तक उखि रौ। 31वेका दगड़िया यु जु कुछ हवे छो देखि के भौत दुखी हवेनि अर जै के अपड़ा स्वामि तैं ईं बात कु समाचार दे दींनि। 32तब दास स्वामि ल वे तैं बुलै के वेमा बोलि हे दुष्ट सेवक तिल जु मि बट्टी गिड़गिड़ाहट कैरी छो त मिल तेरु सैरो कर्ज माफ कैरी दींनि। 33इलै की जन मिल त्वे पर दया कैरी, जन मिल त्वे पर दया दिखै अर तेरु कर्ज़ तैं माफ कैर दिया? 34अर वेका स्वामि ल गुस्सा मा ऐ के वे तैं दण्ड दींण वलो का हथ मा सौंपी दींनि कि जब तक उ सब कर्ज नि भोरि द्यो तब तक ऊंका हथ मा रौ। 35“इलै इन ही कुई तुम मा बट्टी हर एक अपड़ा विश्वासी भैय का पापों तैं मन से माफ नि करलो त मेरा बुबा जु स्वर्ग मा च, तुम दगड़ी भि उन ही करलो।”
Okuqokiwe okwamanje:
मत्ती 18: GHMNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.