Yowano 12
12
Yeshu ukuwabishiwa ku Mbetani
(Mateo 26:6-13; Mako 14:3-9)
1Oho kwashalile matena mutanu na umo ngayi kwikale Shimbo sha Kupitilila, Yeshu wayile ku Mbetani, oku ekalilenga Lazalo, uya ashangwile ku bafu. 2Kuya bamuwahishilile mulalilo, Mata waletelenga byakulya kami Lazalo wengile umo wabaya bekalile na Yeshu ku tebulu. 3#Luk 7:37, 38. Niho Maliya ashimbile mushashi wakwinzala na mazi a nandi akunuka shiwahe wakulingana shitika sha lita a ndando yayinene, wawabishile mawulu a Yeshu, pe wakunkumwine mawulu a Yeshu na huki zendi. Mu litala nimwamo mwanukile na livumba lya mazi. 4Ngoboni Yundashi Ishikalyote umo wa bandongesha ba Yeshu ou ukamubeba wambile ngayi, 5“Kati shumangani awa mazi anabulu kulandishiwa myanda yihatu ya muwayawaya wa shiliva, mwanga mali apanikiwe ku bakakushepwa?” 6Yundashi Ishikaliote wambile ebye kaliha ngayi wahakile bakakushepwa, ngoboni ndaba wengile mwizi. Niye wekalile na shipawupawu sha mali, pe washimbilengamo.
7Ngoboni Yeshu wambile ngayi, “Mulehenu, awa mazi awatentekele mutena wakufundiwa kwami. 8#Nday 15:11. Ndaba bakakushepwa mulinabo shikati nimwasho, ngoboni ami kwikala nenu shikati nimwasho nifwako.”
Bihanganiko bya kuziha Lazalo
9Likunge lya Bayunda bayuvwile ngayi Yeshu uli ku Mbetani, bayileko, kaliha ndaba ya Yeshu tuhu, ngoboni bayile ngayi bakamone Lazalo, ou Yeshu ashangwile ku bafu. 10Pe bakakombela ba bakulwane baliyuvwashanine ngayi bazihe kami na Lazalo. 11Ndaba ya kushanguka kwa Lazalo wingi wa Bayunda babashiyile na kukulupila muli Yeshu.
Yeshu ukwingina mu Yelushalema
(Mateo 21:1-11; Mako 11:1-11; Luka 19:28-40)
12Kwashileko, likunge lya bantu baya bezile ku Shimbo sha Kupitilila, bayuvwile ngayi Yeshu ulinakwiza ku Yelushalema. 13#Nyi 118:25, 26. Bashimbile myahi ya mitondo ya minkomona, pe bayile na kumushimbawila, hibabilikiza ngayi, “Hoshana! Kuyemeziwe niye ukwiza mu lizina lya Mwene! Kuyemeziwe Mwene wa Ishalela!”
14Yeshu wawanine mwana mbongolo, pe wakandamineho, ngonehe kwatikitiwa ngayi,
15 # Zeka 9:9. “Hinga utina mwana Ziyone wa mbuyama,
mona, Mwene yobe ulinakwiza
hinga akandama ha mwana mbongolo.”
16Hashikati shiyo bandongesha bendi kaliha bayuvwishishile ebye. Ngoboni oho Yeshu ashangukilile mu wuwahe, banukile ngayi byatikitiwile ndaba yendi, kami ngayi batende ebye kukwendi.
17Likunge lya bantu baya bekalile na Yeshu oho ehanine Lazalo mu shinzimbi na kumushangula ku bafu, bayile nakwamba ebye byatendiwile. 18Nisho shuma shatwalile bantu ngayi bakamushimbawile, ndaba bayuvwile ngayi watendele eshe shikomokesho. 19Niho Bafwalishi balyambashanine umo na wamina ngayi, “Monenu ngayi kowa ebye tulinakutenda! Tilaminenu bantu nimwabo balinakumukonka!”
Bangiliki bamo bakushinga Yeshu
20Hakati ka bayo bayile mukulemesha ku Yelushalema ku shimbo hekalile Bangiliki. 21Bayile kuli Fwilipu wa ku Mbeteshayinda mu Ngalileya, pe bambile ngayi, “Hekulu, tukushinga tumone Yeshu.”
22Fwilipu wayile nakutongweza Anduleu, pe Anduleu na Fwilipu bakatongwezele Yeshu. 23Yeshu wabakumbwile ngayi, “Shikati shinakumu Mwana Muntu ngayi atambule wuwahe. 24Mwashikuma nikumitongweza ngayi, ndele lupeka lwa loto luwile hanci lukekala ninkayalwo. Ngoboni ndi lukufwa, lukayima mikabo yayingi. 25#Mat 10:39, 16:25; Mak 8:35; Luk 9:24, 17:33. Muntu ukuhaka wumi wendi, ukawuyongesha, pe ou ukuzimba wumi wendi mu kano kaye ukawulama kutwala ku wumi wa mwayile myaka. 26Ndi muntu ukutenda mulimo wami, nafwanini kunkonka. Oku nikekala niko kami akekala na mukamulimo wami. Pe Tate ukamuleemeka ou nimwendi ukatenda mulimo wami.
Yeshu ukwamba bya ha lufu lwendi
27“Wuluno mutima wami unakalikizi. Kati nikamba bishini? Kati nikambe ngayi, ‘Tate, ndamwine ku shikati shino ndi?’ Byo, ndaba yanebye nezilile shikati eshe. 28Tate, monesha wuwahe ku lizina lyobe.”
Niho kwayuvwanikile lizu lyafumine kuyilu ngayi, “Ninalimoneshe shiwahe, pe kami nikaliwahisha.”
29Likunge lya bantu baya bemanine kuyo bayuvwile lizu, pe bamo bambile ngayi mushika, bamina ngayi, “Lingeloyi linamba kukwendi!”
30Yeshu wabatongwezele ngayi, “Lizu lyayuvwaniki kaliha ndaba yami, ngoboni ndaba yanenu. 31Wuluno nisho shikati sha kuyata kano kaye, wuluno mwene wa kano kaye ukayumbiwila hamunkanda. 32Oho ami bakankoleka hano hanci, nikakokela bantu nimwabo kukwami.” 33(Yeshu wambile ebye kumonesha lufu olu akafwa.)
34 # Nyi 110:4; Isha 9:7; Ezek 37:25; Ndan 7:14. Likunge lya bantu bambile ngayi, “Tunayuvwu ku ndayano ngayi Kilishitu ukekala mwayile myaka, pe obe ukwamba nahiti ngayi Mwana Muntu unafwanini kukolekiwa? Kati ou Mwana Muntu yani?”
35Yeshu wabatongwezele ngayi, “Lumuni lukekala mukati kenu kashikati kakashe tuhu. Endenu oho mushili na lumuni kutina mincimpwe yimiwana. Muntu ukwenda mu mincimpwe kulimuka oku akuya wufwako. 36Oho mushili na lumuni, kulupilenu olu lumuni, ngayi mufutuke kwinga bana ba lumuni.”
Kubula kukulupila kwa Bayunda
Oho Yeshu amanishile kwamba, wakatukileho niho akaliholekele. 37Hinge ndi Yeshu watendele bikomokesho byabingi mukati kabo, ngoboni babulile kumukulupila. 38#Isha 53:1. Ebye byatendiwile ngonehe ambile muluwe Ishaya ngayi,
“Mwene, kati yani unakulupili ncango zetu?
Kati Mwene unahololo ngovu zendi kuli yani?”
39Nohobene babulile kukulupila, ndaba Ishaya wambile kami ngayi,
40 # Isha 6:10. “Unashipishi meho wabo
na kukaluhisha mitima yabo,
kutina meho wabo amona,
na kuyuvwishisha na mitima yabo,
kutina batenguluka ngayi nibanyongomanishe.”
41Ishaya wambile ebye ndaba wamonene wuwahe wa Yeshu.
42Hinge noho, bakulwane ba Bayunda bakulupilile Yeshu, ngoboni ndaba ya Bafwalishi babulile kulimonekesha ngayi banakulupili. Batinine ngayi bakubafumisha mu shinangonge. 43Ndaba bahakile ngayi bantu babayemeze kupitakana ngayi Nyambi abayemeze.
Kuyatiwa na mazu a Yeshu
44Yeshu wakangokele ngayi, “Muntu nimwendi ukukulupila mumwami, kukulupila mumwami tuhu wufwako, ngoboni ukukulupila mumwendi uya wantumine. 45Kami muntu unamono ami, unamono kami nou wantumine. 46Ami lumuni lunezi muno mu kaye, nohobene muntu nimwendi ukukulupila mumwami kukekala mu mincimpwe wufwako.
47“Muntu ukuyuvwa mazu wami nakubula kuwalama, kukamuyata nifwako, ndaba kaliha nezile na kuyata kaye, ngoboni na kupulwisha kaye. 48Muntu ukunkana nakubula kutambula mazu wami, uli na mukakumuyata. Lizu elye ninamba nilyo likamuyata ha mutena wakukotoka. 49Ndaba kaliha nambile na ngovu zami, ngoboni Tate wantumine, niye wantongwezele byakwamba na neshe nafwanini kubyamba. 50Nikulimuka ngayi ndayano zendi zikutwaminina ku wumi wa mwayile myaka. Nohobene ebye nikwamba, nibyo Tate antongwezele ngayi nibyambe.”
Okuqokiwe okwamanje:
Yowano 12: KK2008
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
New Testament in Nkoya © The Bible Society of Zambia, 2008.