NgokukaMathewu 26
26
Ukwakhiwa Kozungu Lokubamba Nokubulala UJesu
(Mak. 14:1; Luk. 22:1)
1Kwathi lapho uJesu eseqedile ukusho wonke lawo mazwi, wathi kubafundi bakhe: 2 “Niyazi ukuthi emuva kwezinsuku ezimbili kuzakuba yiPhasika; iNdodana yomuntu izakukhashelwa ukuze ibethelwe esiphambanweni.”
3Kwabuthana abaphristi abakhulu namalunga esizwe emzini womphristi omkhulu okuthiwa nguKhayifase. 4Bakha uzungu lokuba bambambe uJesu ngobuqili, bambulale. 5Kepha bathi: “Makungabi ngomkhosi, funa kube khona isiyaluyalu esizweni.”
UJesu Ugcotshwa EBhethaniya
(Mak. 14:3; Joh. 12:1)
6 Kuthe uJesu eseBhethaniya, endlini kaSimoni owayenochoko, 7 kwafika kuye owesifazane ephethe umfuma esitsheni se-alabhaste, owawungowenani elikhulu; wawuthela ekhanda likaJesu owayehleli esidlweni.
8Kepha abafundi bakhe bekubona lokho, bathukuthela, bathi: “Kumoselwani lokhu na? 9Ngokuba ngabe kuthengisiwe ngenani eliphezulu, kwaphiwa abampofu.”
10Kepha uJesu ekwazi ababekusho, wathi kubo: “Nimhluphelani lo wesifazane na? Ngokuba wenze umsebenzi omuhle kimi. 11 Ngokuba abampofu ninabo njalo, kodwa Mina aniyukuhlala ninami njalo. 12Ngokuba lo wesifazane, ngokuthela lawa mafutha emzimbeni wami, ukwenzele ukungilungisela ukumbelwa. 13Ngiqinisile ngithi kini: noma kuphi lapho leli vangeli liyakushunyayelwa khona, emhlabeni wonke, kuyakukhulunywa nangalokhu akwenzile lo wesifazane, kube yisikhumbuzo ngaye.”
UJuda Iskariyothe Uvuma Ukukhaphela UJesu
(Mak. 14:10; Luk. 22:3)
14 Kwasuka omunye wabali-12, okuthiwa nguJuda Iskariyothe, waya kubaphristi abakhulu, 15 wathi: “Niyakunginika ini, uma ngimkhaphela kini na?” Base bemkalela, bamnika izinhlamvu zesiliva ezingama-30. 16Kusukela ngaleso sikhathi, wafuna ithuba lokumkhaphela.
Ukumiswa Kwesidlo Esingcwele
(Mak. 14:12; Luk. 22:7; Joh. 13:21)
17 Kwathi ngosuku lokuqala lwesinkwa esingenamvubelo, abafundi baya kuJesu, bathi: “Uthanda ukuba sikulungisele kuphi ukuba udle iPhasika na?”
18Wathi: “Hambani niye emzini, kumuntu othile, nithi kuye: ‘Uthi uMfundisi: Isikhathi sami sesiseduze; ngizakwenza iPhasika kwakho nabafundi bami.’ ”
19Abafundi benza njengalokhu uJesu ebayalile; balungisa iPhasika.
UJesu Ubikezela Ngokukhashelwa Kwakhe
20 Sekuhlwile, ehlezi esidlweni nabafundi bakhe abali-12, 21 besadla, wathi: “Ngiqinisile ngithi kini: omunye wenu uzakungikhaphela.”
22Baba lusizi kakhulu, baqala, kwaba yilowo nalowo wathi: “Ngabe yimi yini, Nkosi na?”
23 Kepha waphendula, wathi: “Lowo ofake isandla kanye nami esitsheni, nguye ozakungikhaphela. 24Impela iNdodana yomuntu izakuhamba njengokulotshiwe ngayo, kodwa maye, kulowo muntu iNdodana yomuntu ekhashelwa ngaye! Bekuyakuba ngcono kulowo muntu ukuba akazalwanga.”
25Wayesebuza uJuda omkhaphelayo, wathi: “Kungaba yimi, Rabi na?”
UJesu wathi kuye: “Usho khona.”
UJesu Udla Isidlo Nabafundi Bakhe
26 Kuthe besadla, uJesu wathatha isinkwa, wasihlephula, wanika abafundi bakhe, wathi: “Thathani nidle, lokhu kungumzimba wami.”
27Wayesethatha indebe, wabonga, wabanika, wathi: “Phuzani kuyo, nina nonke; 28 ngokuba lokhu kuyigazi lami lesivumelwano elithululwa ngenxa yabaningi ukuze kuthethelelwe izono. 29 Kepha ngithi kini: Kusukela manje angisayukuphuza kulesi sithelo somvini, kuze kufike lolo suku engiyakusiphuza ngalo nani, sisisha, embusweni kaBaba.”
30 Sebehlabelele iculo lokubonga, baphuma, baya eNtabeni Yeminqumo.
UJesu Ubikezela Ngokuphikwa NguPhethro
31 UJesu wathi kubo: “Nina nonke nizakukhubeka ngami ngalobu busuku, ngokuba kulotshiwe ukuthi: ‘Ngiyakushaya umalusi, izimvu zomhlambi zihlakazeke,’ 32 kodwa emva kokuba sengivusiwe ngiyakunandulela ukuya eGalile.”
33 UPhethro waphendula, wathi kuye: “Noma bonke bangakuhlamuka, mina angisoze ngakushiya.”
34UJesu wathi kuye: “Ngiqinisile ngithi kuwe: ngalobu busuku, ngaphambi kokuba iqhude likhale, uzakungiphika kathathu.”
35UPhethro wathi kuye: “Noma ngabe kufanele ukuba ngife nawe, angisoze ngakuphika.”
Bonke abafundi basho kanjalo.
UJesu Ukhuleka EGetsemane
(Mak. 14:32; Luk. 22:39)
36 UJesu wafika nabo endaweni okuthiwa yiGetsemane, wathi kubafundi bakhe: “Hlalani lapha, ngisayokhuleka laphaya.”
37 Wathatha uPhethro namadodana amabili kaZebedewu, waqala ukuba nomunyu nosizi. 38 Khona wathi kubo: “Umphefumulo wami ulusizi kakhulu, kuze kube sekufeni; hlalani lapha, nilinde kanye nami.”
39 Waqhubeka ibangana, wawa ngobuso, wakhuleka wathi: “Baba, uma kungenzeka, mayedlule kimi le ndebe, kodwa kungabi njengokuthanda kwami, kube njengokuba uthanda wena.”
40Wabuyela kubafundi, wabafica belele, wathi kuPhethro: “Kodwa beningehlale nilinde nami ihora libe linye na? 41 Lindani, nikhuleke ukuze ningangeni ekulingweni; umoya uyavuma, kodwa umzimba ubuthakathaka.”
42Wabuye wahamba okwesibili, wakhuleka wathi: “Baba, uma le ndebe ingenakudlula kimi ngingakayiphuzi, mayenziwe intando yakho.”
43Wabuyela kubo futhi, wabafumana belele, ngokuba amehlo abo ayegcwele ubuthongo. 44Wabuye wabashiya, wayokhuleka ngokwesithathu elokhu esho lona lelo lizwi.
45Wayesephindela kubafundi, wathi kubo: “Namanje nisalele, niphumule. Phela ihora selisondele; iNdodana yomuntu izakukhashelwa ezandleni zezoni. 46Sukumani sihambe; niyabona-ke, ongikhaphelayo useseduze.”
Ukuboshwa KukaJesu Nokuthethwa Kwecala Lakhe
(Mak. 14:43; Luk. 22:47,63; Joh. 18:2)
47 Kwathi esakhuluma; kwafika uJuda, omunye wabali-12, ehamba nesixuku sabantu esikhulu siphethe izinkemba nezinduku, sivela kubaphristi abakhulu namalunga esizwe. 48Omkhaphelayo wayebanike isibonakaliso, wathi: “Lowo engiyakumanga nguye; mbambeni.”
49Wayeseya kuJesu ngokushesha, wathi: “Rabi!”
Wamanga.
50 UJesu wayesethi kuye: “Mngani, yenza lokho oze ngakho.”
Base besondela, bambamba uJesu. 51 Omunye walabo ababenoJesu wagqashula inkemba yakhe, wagenca inceku yomphristi omkhulu, wanquma indlebe yayo.
52UJesu wathi kuye: “Buyisela inkemba yakho emgodleni wayo, ngokuba bonke abaphatha inkemba bayakubhubha ngenkemba. 53Ucabanga ukuthi bengingecele yini kuBaba angithumelele amaviyo ezingelosi angaphezu kwali-12 na? 54Pho-ke ingafezeka kanjani imibhalo ethi kufanele ukuba kwenzeke kanjalo na?”
55 Ngaleso sikhathi uJesu wathi ezixukwini: “Niphume kungathi nize kumphangi, niphethe izinkemba nezinduku, nizongibamba na? Nsuku zonke bengifundisa ethempelini, kodwa anizange ningibambe. 56 Kepha konke lokho kwenzekile ukuba kugcwaliseke imibhalo yabaphrofethi.”
Khona bonke abafundi bamshiya babaleka.
UJesu Uyiswa KuKhayifase
57 Labo ababembambile uJesu bamyisa kuKhayifase, umphristi omkhulu, lapho kwakubuthene khona izazimthetho namalunga. 58Kepha uPhethro wamlandela uJesu ebuqamama, kwaze kwaba segcekeni lomphristi omkhulu. Naye wangena ngaphakathi, wahlala phansi nezikhonzi ukuze abone isiphetho.
59Abaphristi abakhulu nomkhandlu wonke bafuna ubufakazi obungamanga ngoJesu, ukuze bambulale. 60Kepha ababutholanga, nakuba kwase kufike ofakazi abaningi bamanga. Kodwa kamuva kwavela ababili, 61 bathi: “Lo wathi: ‘Nginamandla okudiliza ithempeli likaNkulunkulu, ngibuye ngilakhe ngezinsuku ezintathu.’ ”
62Kwase kusukuma umphristi omkhulu, wathi kuye: “Awuphenduli ngalutho kulokhu abakufakaza ngawe na?”
63 Kepha uJesu wathula du.
Umphristi omkhulu wayesethi kuye: “Ngikufungisa uNkulunkulu ophilayo ukuba usitshele uma unguKhristu, iNdodana kaNkulunkulu.”
64 UJesu wayesethi kuye: “Usho khona. Nokho ngithi kini: kusukela manje niyakuyibona iNdodana yomuntu ihleli ngakwesokunene saMandla, iza ngamafu ezulu.”
65 Umphristi omkhulu waklebhula izingubo zakhe, wathi: “Usehlambalazile; sisabadingelani ofakazi na? Nani senizizwele ngezindlebe zenu ehlambalaza. 66 Pho nithini ngalokhu na?”
Baphendula bathi: “Ufanelwe ngukufa.”
67 Base bemkhafulela ngamathe ebusweni, bamdushuza, abanye bammukula, 68bathi: “Siphrofethele, Khristu; ngubani okushayileyo na?”
UPhethro Uphika UJesu
(Mak. 14:66; Luk. 22:54; Joh. 18:17,25)
69 UPhethro wayehleli phandle egcekeni, enye yamantombazane yeza kuye, yathi: “Nawe ubunoJesu waseGalile.”
70Kepha waphika phambi kwabo bonke, wathi: “Angazi ukuthi ukhuluma ngani.”
71Esephumile esangweni, enye intombazane yambona, yathi kwababelapho: “Lona ubenoJesu waseNazaretha.”
72Wafunga wagomela ephika futhi, ethi: “Angimazi lowo muntu.”
73Emva kwesikhashana, esesondele kwababemi lapho, bathi kuPhethro: “Impela nawe ungomunye wabo, udalulwa ngisho nangukukhuluma kwakho.”
74UPhethro waqala ukuqalekisa nokufunga, ethi: “Angimazi lowo muntu.”
Masinyane, lakhala iqhude. 75UPhethro wayesekhumbula izwi abelishilo uJesu, lokuthi: “Iqhude lingakakhali, uzakube usungiphike kathathu.”
Waphumela ngaphandle, wakhala kalusizi.
Okuqokiwe okwamanje:
NgokukaMathewu 26: ZUL20
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Bible in isiZulu 2020 © Bible Society of South Africa 2020. Digital Version © Bible Society of South Africa 2020. All rights reserved. www.biblesa.co.za.
Bible in isiZulu 2020 with Deuterocanonical Books © Bible Society of South Africa 2020. Digital Version © Bible Society of South Africa 2020. All rights reserved. www.biblesa.co.za.