Juan 1
1
Nucën Papa Diosan Bana uni ꞌiá
1Nucën Papa Diosan ñu unioisama pain ꞌaínbi ca aín Bana ꞌiacëxa. Aín Bana ax ca Nucën Papa Diosbë ꞌiacëxa, ax ca Nucën Papa Diosbi ꞌiacëxa. 2Usa ꞌain ca ñu uniocëma pain ꞌain aín Bana, ax Nucën Papa Diosbë ꞌiacëxa. 3Aín Banáinshi ca camabi ñu uniacëxa. Nucën Papa Diosan Bana ꞌaíma ꞌia ꞌain ca ñu ꞌaíma ꞌianan ñancáishi ꞌitsíanxa. 4A bana anúan Nucën Papa Diosan nëtë ꞌinan ꞌaish ca camabi ñu ꞌimainun uníxribi ënë nëtënu bucuia. Usai ꞌi ca an ꞌimicëx unicama sinánñu ꞌicën. 5Ñunshin ꞌatimanën ꞌimicëxun unin ꞌaisama ꞌiti sinaniabi ca Nucën Papa Diosan Bana ax upíira ꞌixun uni upí ꞌinun ꞌimia. Usaquian ꞌimia ca ñunshin ꞌatimanën a cuati uni upí ꞌiaxma ꞌinun quixun Nucën Papa Diosan bana a nëtënima.
6Uni achúshi ca ꞌiacëxa Juan caquin anëcë. A ca Nucën Papa Diosan ënë menua unun xuacëxa. 7Ax ca Nucën Papa Diosan Bana, an ꞌuchañuira ꞌicëbi uni aín nuitu upí ꞌimiti, ax ucëbëa ami catamënun camabi uni a ñuixuni uacëxa. 8Juan, ax ca an uni aín nuitu upí ꞌimiti ama ꞌiacëxa. Usa ꞌaíshbi ca axa uti ainra uni aín nuitu upí ꞌimiti, a unicama ñuixunuan Nucën Papa Diosan ënë menu xucë ꞌiacëxa. 9An aín sinan upíira ꞌixun uni upí ꞌimiti axa uti ñuiquin ca Juanën unicama ñuixuancëxa.
10An aín sinan upíira ꞌixun uni upí ꞌimiti ax ca ënë menu ꞌiacëxa. Usa ꞌixun an Nucën Papa Diosbëtan camabi me ꞌimainun camabi ñucama unio ꞌicëbi ca unicaman, ui cara ax ꞌicë quixun ꞌunánma ꞌicën. 11Ënë nëtënu ꞌicë unicaman ca an unio ꞌixunbi, atubë ꞌinúxa ucëbi biisama tancëxa. 12Usa ꞌixunbi ca uicamax cara ami sinánan ami catamëtia, acama Nucën Papa Diosan bëchicëa ꞌinun ꞌimiacëxa. 13Unían aín xanumi bëchicë tuá ax ca unishi ꞌia. Unin bëchicënëxa usa ꞌaínbi ca usama Nucën Papa Diosan bëchicëcama ꞌicën. Ax ca aín cushínshia aín bëchicë ꞌimicë ꞌicën.
14Nucën Papa Diosan Bana a ca bëtsi tuásaribi ꞌinun xanun bacë́ancëxa, uni ꞌinun. Nucën Papa Diosan sinánsaribi ꞌixun ca ënë menu ꞌicë unicama abë ꞌixun nuibacëxa. Ax aín Bëchicë Achúshi ꞌaish aín Papa Diossaribi ꞌaish aín sinan upíira upí cananuna isacën. 15Usa ꞌain ca Juan, an uni nashimicë, an Nucën Papa Diosan Bana ñui munuma banaquin cacëxa:
—Ënëx ca a ñuiquin ësaquin ꞌën mitsu caëxancë a ꞌicën: Axa ꞌë caxu uti uni ax ca ꞌësamaira ꞌicën. ꞌËx ꞌicëma pain ꞌain ax pain ꞌiá ꞌaish ca ꞌësamaira ꞌicën.
16An ca aín sinan upíira ꞌixun ax ꞌicësaribitinu nun sinan upí ꞌinun nuibaquin ënquinma nu ꞌaquinia. 17Uisai cara Nucën Papa Diosan uni ꞌiti ꞌicë quixun ca Moisésnën nucën raracama ꞌunánmiacëxa. Usa ꞌaínbi ca axira uxun Jesucristonën asérabi nuibaquin aín ꞌucha tërë́nquin Nucën Papa Dios cuëëncësabi oía aín uni ꞌinun ꞌimiaxa. 18Uinu ꞌicë unínbi ca Nucën Papa Dios isáma ꞌicën. Aín Bëchicë Achúshi, axa aín Papabë ꞌicë, an cuni ca uisa cara Nucën Papa Dios ꞌicë quixun nu ꞌunánmiacëxa.
I. JESUCRISTONËAN GALILEA ME ꞌIMAINUN JUDEA MENUXUN BANA ÑUIXUAN (1.19-12.50)
Juanëan Jesús ñuia
(Mt 3.11-12; Mr 1.7-8; Lc 3.15-17)
19Usa ꞌain ca Jerusalénu ꞌicë judíos unicaman ax caraisa ui ꞌicë quixuan Juan ñucátanun, sacerdotecamacëñun levita unicama xuacëxa. 20Xucëx cuanx bëbaxuan ñucácëxun ca parántisama tanquin Juanën cacëxa:
—ꞌËx cana Cristoma ꞌain.
21Cacëxun ca cacëxa:
—¿Ama ꞌaish caina ui ꞌain? ¿Elías caina ꞌain?
Quixuan cacëxun ca cacëxa:
—ꞌËx cana ama ꞌain.
Cacëxun ca ñucátëcëancëxa:
—¿An Nucën Papa Dios quicë bana unicama ñuixunti uni, axa uti a caina mix ꞌain?
Cacëxun ca —ama cana ꞌai —quixun cacëxa. 22Usaquin cacëxunbi ca catëcëancëxa:
—¿Uiira caramina mix ꞌain? An nu xucë unicamanu cai cuanun ca mix caramina ui ꞌai quixun nu cat.
23Cacëxun ca Juanën cacëxa:
—ꞌËx cana axa anu uni ꞌicëma menuax munuma banacë uni a ꞌain, ësai qui: “Nucën ꞌIbu ca aia, camina axa anun uti bai mëníoquin racanati ꞌain”. An ënë bana cuënëo, Isaías, an Nucën Papa Dios quicë bana unicama ñuixuncë, axa quiásabi oi cana ꞌëx ꞌin.
24Axa usaquin Juan ñucati cuancë unicamax ca fariseo unicaman xucë ꞌiacëxa. 25Usa ꞌixun ca Juan catëcëancëxa:
—¿Mix Cristoma ꞌianan Elíasma ꞌianan an Nucën Papa Dios quicë bana unicama ñuixunti, axa uti ama ꞌixunbi caina min uisa cupí unicama ꞌunpaxan nashimin?
26Cacëxun ca Juanën cacëxa:
—ꞌËn cana uni ꞌunpaxan nashimin, ꞌaínbi ca mitsúnmi ꞌunáncëma uni achúshi mitsubë ꞌicën. 27Ax ꞌësamaira ꞌaish ca mitsúnmi ꞌunánun ꞌë caxu aia. ꞌËx ꞌiisama pain ꞌain, ax pain ꞌiá ꞌaish ca ꞌësamaira ꞌicën. Axa upíira ꞌaish cushiira ꞌain cana ꞌëx asaribima ꞌaish ami rabini a ꞌurama ꞌitima ꞌain. Usai ꞌiquin cana aín taxacabi tubuxuntima ꞌain.
28Jordán ꞌucëmanan ꞌicë Betábara cacë ëma anuxuan unicama nashimicë, anu cuanx ca unían xucë unicama usai Juanbë banacëxa.
Carnero ꞌicësaribitia unin ꞌucha cupí bamati, Cristo, a ñuicë bana
29Usaquin unicama coónxun ca Juanën Jesús aia isacëxa. Aia isi ca quiacëxa:
—Ca is, ënëx ca unin ꞌucha cupí carnero bamati ꞌaínbia ax bamacë cupí Nucën Papa Diosan camabi unin ꞌucha tërë́nti a ꞌicën. 30Ënëx ca a ñuiquin ësai quiquin ꞌën mitsu cacë a ꞌicën: Axa ꞌësamaira uni ax ca ꞌë caxu aia. ꞌËx ꞌicëma pain ꞌain ca ax pain ꞌiacëxa. Usa ꞌaish ca ꞌësamaira ꞌicën. A ñuiquin ꞌën mi cacë, a ca ux ꞌicën. 31ꞌËnribi cana a ꞌunáncëma ꞌain, ꞌaíshbi cana Israel unicaman uisa uni cara quixun a ꞌunánun ꞌunpaxan uni nashimi uan.
32-33Usaquin catancëxun ca, ësai ca ꞌiaxa quixun Juanën unicama ñuixuancëxa:
—ꞌËn a ꞌunáncëma ꞌicëbi ca Nucën Papa Diosan ꞌën ꞌunpaxan uni nashiminun xuquin ꞌë caxa: “Uni achúshinua ꞌën Bëru Ñunshin Upí ubútancëx ꞌiruia camina isnuxun ꞌain. Ainra ca uni ꞌën Bëru Ñunshin Upíbëa ꞌinun ꞌimiti ꞌicën”. Usaquin ca ꞌë caxa. An ꞌë cacësabi oquin cana Nucën Papa Diosan Bëru Ñunshin Upía ñumacuru tinax naínuax ubútancëx a uninu ꞌiruia isan. 34Usaquin isun cana —ax ca Nucën Papa Diosan Bëchicë ꞌicë —quixun camabi uni cain.
Usaquin ca Juanën cacëxa.
Jesusan aín ꞌunánmicë unia ꞌinun a pain caísa uni
35Usaquian coon ca Juanbë aín ꞌunánmicë uni rabë́ ꞌiacëxa. 36Abë ꞌicë ca Jesús cuainia isquin Juanën cacëxa:
—Ca is, carnero ꞌicësaribiti unin ꞌucha cupí bamanuan Nucën Papa Diosan xua a ca ux ꞌicën.
37Usaía quia cuaquin ca Juanën ꞌunánmicë uni rabëtan Jesús nuibiancëxa. 38Nuibiancëxun caxu bësuquin isquin ca Jesusan cacëxa:
—¿Añu caramina barin?
Cacëxun ca ñucácëxa:
—¿Uinu cara min ꞌiti ꞌic, rabí? (Rabí quicë bana, ax ca an uni ꞌunánmicë uni qui quicë ꞌicën.)
39¿Uinu ꞌicë cara min ꞌiti ꞌic? quixun cacëxun ca Jesusan cacëxa:
—Isi cuanun ca ut.
Cacëx cuanxun ca aín ꞌiti isacëxa, istancëx ca bari xupíbucëbëa baquíshti ꞌurama ꞌain abë ꞌiacëxa.
40Juanën cacëxun cuaquian Jesús nuibiancë uni rabëtax ca bëtsix Simón Pedronën xucën Andrés ꞌiacëxa. 41Jesusan ꞌitinuax cuanxun ca Andrésnën aín xucën Simón Pedro bariquin mëraxun cacëxa:
—Mesías cananuna isan.
Mesías quicë bana, ax ca Cristo, axa utia judíos unicaman caíncë a qui quicë ꞌicën. 42Cabianquin ca aín xucën Jesúsnu buáncëxa. Buáncëx bëbaia isquin ca Jesusan bëñachaquin cacëxa:
—Mix camina Juanën bëchicë, Simón, a ꞌain. ꞌAíshbi camina Cefas caquin anëcë ꞌiti ꞌain.
Cefas quicë bana, ax ca Pedro qui quicë ꞌicën.
Jesusan Felipe ꞌimainun Natanael abë cuanun ca
43Usaquian Pedro coon pëcaracëbë, Galilea menu cuanti sinani cuanquinbi ca Jesusan Felipe mëracëxa. Mëraquin ca cacëxa:
—ꞌËn mi ꞌunánminun ca ꞌëbë cuani ut.
44Felipe Betsaida ëmanu ꞌicë uni ꞌain, ca Andrés ꞌimainun Pedroribi, anu ꞌicë uni ꞌiacëxa. 45Usaquian Jesusan cacëx cuanxun ca Felipenën Natanael cacë uni bariquin mëraquin cacëxa:
—A ñuiquian Moisés ꞌimainun an Nucën Papa Diosan sinánmicëxun uni bana ñuixuncë unicaman cuënëo, a uni cananuna mëran. Ax ca Jesús, Nazaretnu ꞌicë uni, Josénën bëchicë, a ꞌicën.
46Felipenën cacëxun ca Natanaelnën cacëxa:
—¿Nazaret ëmanu cara ñu ꞌunáncë uni ꞌiti ꞌic?
Cacëxun ca Felipenën cacëxa:
—Usa ca mi isnun ca ꞌëbë cuani ut.
47Cabianquin buáncëxa Natanael aia isi ca Jesús quiacëxa:
—U unix ca asérabi Israel uni upí ꞌicën, uni paráncëma ca ux ꞌicën.
48Quia ca Natanaelnën cacëxa:
—¿Uisaxun caramina ꞌë ꞌunan?
Cacëxun ca Jesusan cacëxa:
—Mi caia Felipe cuancëma pan ꞌaínbi cana mi higuera tanáinua isan.
49Cacëxun ca Natanaelnën cacëxa:
—Mix camina Nucën Papa Diosan Bëchicë ꞌianan Israel unicaman ꞌapu ꞌain.
50Cacëxun ca Jesusan cacëxa:
—¿Higuera tanáinua cana mi isan ꞌën mi cacëxun caramina bërí, ënëx ca Nucën Papa Diosan Bëchicë ꞌicë quixun ꞌë sinanin? Minmi ꞌë iscësamaira oquin camina ꞌën ñu ꞌaia isnuxun ꞌain.
51Ësaquinribi ca Jesusan Natanael cacëxa:
—Asérabi cana mitsu cain, naí panárabëcëbëtan camina uni ꞌinux ꞌëx anuax uá, ꞌë manáminuaxa Nucën Papa Diosan ángelcama cuaruanan ubutia isnuxun ꞌain.
Okuqokiwe okwamanje:
Juan 1: cbrPB
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 1978, 1995, 2008, 2022 Wycliffe Bible Translators, Inc. All rights reserved.