लूका छ्य़ेगी ङोहस्यी
छ्य़ेगी ङोहस्यी
दि छ्य़े प्रुहएँ मिह लूका यिहम्बा खो आम्ज्यीॱआङ यिहम्बा (कलस्सी ४:१४।) खो ल़ेह-पेन पावल ङ्याम्बु ज्यिबुराङ थिन्गेन्गी रो़ह यिहन्गे। लूकागी दि छ्य़े च्यी़राङ मिहम्बा यिहॱनाङ “ल़ेह-पेनया़गी छ्या़ले” माएँ साम्बा ठिमगी छ्य़ेॱआङ प्रुहसीन (ज़ी़-नाङदोङ लूका १:१-४; ल़ेह-पेन १:१-२)। ल़ेह-पेन पावल या़हबु लेहङगु स्येच्येला ग्रीस दाङ टर्की माएँ क्याहल-खापला लेहमा ङ्यिपा ओहले लेहमा सुम्बागी पा़लोलादी ग्या़ ग्या़ला लूकाॱआङ पावल ङ्याम्बु-ङ्याम्बुराङ काहल्सीन (ज़ी़-नाङदोङ ल़ेह-पेन १६:१०, २०:६)। तिङस्यो पा़लोला पावल रोमला डोएँमु छो-क्याहम्जोला लूकाॱआङ ङ्याम्बुराङ येहकें (ल़ेह-पेन २७:१-२)। ओहले रोमला लेप्ती पावलला चोन-खाङला ल़ू फान्ज्यो लूकागी पावलला स्याहप्तो स्युहएँगी ल़ेह पेहसीन (२ तिमोथी ४:११)।
मत्ती यहूदी यिहन्गे सोङबे खोगी या़हबु लेहङगु यहूदी मिहया़गी तेहन्दाला प्रुहसीन। यिहॱनाङ लूकाती ग्रीक क्यिहपागी मिह यिहन्गे सोङबे खोगी लेहमेन क्यिहपागी मिहया़गी या़हबु पेहती ङोह स्य़े ख़ूएँ छ्याप्स्यीगी या़हबु लेहङगु प्री़हदी येहबा।
दि या़हबु लेहङगु प्रुहएँमु, लूका ङ्याम्बु मर्कूसगी प्रुहक्योगी छ्य़ेगी पार-स्यु च्यी़ येहकें। (मर्कूसगी छ्य़े थाम्ज्यी म़ेदी तोहङस्यो प्रुहक्यो येहकें।) ओ़ह सोङबे लूकागी छ्य़ेला मर्कूसगी प्रुहक्यो तामया़ माहङबुराङ डी़गे। लूका आम्ज्यी च्यी़राङ मिहम्बा खो लुहक्सो प्रुहएँ मिहॱआङ यिहम्बा ओ़ह सोङबे खोगी दि या़हबु लेहङगुगी छ्य़े दाङ ल़ेह-पेनगी छ्य़ेला फेमा म़ेदी फेमा तेहन्दामगी तामया़ॱआङ ज्यिबुराङ जेम्बु पेहती प्रुहक्योगी तामया़ ओहराङगी ज्योर ख़ूएँ। लूकागी दि छ्य़े का़हन्दी लोहला प्रुहक्यो यिहम्बा म़ेदीनी सुलाॱआङ थिउ-निउ पेहती क्यी़ह म़ेह यिहॱनाङ बाइबलकी माहङबुराङ ख्येम्बा ताहक्पुया़गी दि छ्य़े मिह-लोह (ईस्वी सम्बत्) ६५ यिहन्ज्यु ७० की पाहर्कीला फार प्रुहक्यो यिहम्बा म़ेदी साम्लु ताङगे।
दि छ्य़ेला येहकेन्गी ने़जोया़
ङोहस्यी १:१-४
बप्तिस्मा नाङगेन यूहन्ना दाङ येशूगी ठुङगार १:५–२:७
येशू फेमा येहकेंमु २:८–२:५२
बप्तिस्मा नाङगेन यूहन्नागी जे नाङग्योकी छ्या़लेया़ ३:१-२०
येशूगी बप्तिस्मा दाङ छेता ३:२१–४:१३
गालील साने़ला येशूगी जे नाङग्योकी छ्या़ले ४:१४–९:५०
गालील यिहन्ज्यु यरूशलेम थुगी छ्या़लेया़ ९:५१–१९:२७
यरूशलेमला येशूगी तिङस्यो साता १९:२८–२३:५६
येशू टोहङदे येहपाराङ सोम्बो ज़्याङ नाङग्यो २४:१-५३
Okuqokiwe okwamanje:
लूका छ्य़ेगी ङोहस्यी: HYLM
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2023 (Active), Wycliffe Bible Translators, Inc. All rights reserved.