Johana 4
4
Jesu na muke wa Samaria
1Nao Jesu aghenda amanya kamba Wafarisayo wanasikile kukala wapata na kubatiza wairimi wengi kumchumba Johana. 2(Hata ngera sani Jesu mwenyi sabatize sala wairimi wake), 3kafuma Judea sena na kughenda Galilaya. 4Naye oluo ni suti aitile Samaria.
5Nao kafika muzi ghwa Samaria ghuitogho Sukari, kavui na mbuwa Jakobo emuhawile mwanwake Josefu. 6Nako alye koluo na kizia cha meji cha Jakobo; naye Jesu kwa kukala osililo ni ndighi kwa charo, kakala kitembo avui na icho kizia. Na koluo ni saa ndandatu za msenya.
7Nao keja muke mumoju Msamaria kuteka meji, Jesu kamuza, “Nihawe meji ninwe.” 8Andu wairimi wake weghendile kele muzi kughula chakulya.
9Naye muke wa Kisamaria kamuza, “Yadimika ije uwe Myahudi kunilomba imi meji, nemi nimi muke wa Kisamaria?” Kwani Wayahudi na Wasamaria siwalyanya. 10Jesu kamtumbulila, “Ngera omanyile inosi lya Mlungu na nani uyu ekuuzagha, ‘Nihawe meji ninwe,’ mango wamlomba iye meji, naye mango akuhawa meji gha umana.” 11Ulya muke kamuza, “Bwana, suwesi kindu chingi cheteka meji na kizia chanamalike, ndamu wapatila hiyo agho meji gha umana? 12Ado uwe nuwe mubwaa kumwisa ake Jakobo, uyu atihawile ichi kizia, hata iye mwenye kanwa, na wana wake na ng'ombe?” 13Jesu kamuza, “Uwo wose enweghagha meji agha ukauwagha sena. 14Ela uwo wose enweghagha meji agho nijemuhawa imi, sekauwagha lyingi sena; kwani agho meji nijemhawa, ghekalagha amweni kwake ndoo ya meji ghwa umana ghwa kale na kale.” 15Ulya muke kamuza, “Bwana nihawe agho meji eri nisakauwe, hata nisakujeghe aha kuteka meji.” 16Jesu kamuza, “Ghenda umpang'e mlume wako jako mjanye aha.”
17Ulya muke kamtumbulila “Siwesi mlume.” Jesu kamuza, “Waghora fulo, ‘Siwesi mlume,’ 18Kwani oluo na walume wasanu, na hata uyu uwo naye si mlume wako ungi, kwa hung'u waghora fulo.” 19Ulya muke kamuza, “Bwana, naona uwe nuwe tondolo! 20Wana ake weluo weketasila Mlungu kele mughondi ughu, ela inyo mwaghora Jerusalemu niko andu kufweni kumtasila Mlungu.”
21Jesu kamuza, “Ee muke, nidumuse kamba ngelo ikujagha simomtasagha Aba kele mughondi ughu hata Jerusalemu. 22Inyo mwatasa icho simomanyagha, ela isi tamanya icho titasagha, kwani ukizi ghweja kwa ngila ya Wayahudi. 23Ela ngelo ikujagha, hata indakwenyi iwo, watasi wa fulo wemtasagha Aba kwa roho na fulo kwenyi, kwani watasi sa awo niwo washailo ni Aba wamtase. 24Mlungu ni Roho, nawo awa wamtasa ni suti wamtase kwa roho na fulo.” 25Ulya muke kamuza, “Namanya Masihi (uyu aitogho Kristo) ukujagha, naye keja, ujetighorera kila kindu.”
26Jesu kamuza, “Imi nighoranyagha na uwe, Nimi.”
27Nao alyenyi wairimi wake wekeja, nawo wakashinika kumdoka kuhelea na muke, ela sikwesi mundungi amuzile, “Nini ushaile,” ango “Kudani uheleagha na muke?”
28Nao ulya muke kasigha mbuta yake ya meji, kaghenda kele muzi, na kuwauza wandu, 29“Njuuni mumwone mundu anighorera malagho ghangu ghose nideile, siyadimika kukala uyu niye Masihi?” 30Nao wakafuma kele muzi na kumughendela Jesu.
31Ngelo iyo yenyi wairimi wake weluo wekemfunganzila, wekemuza “Mwalimu, lyaa.” 32Ela iye kawauza, “Nio na chakulya chelya inyo simwochimanyagha.” 33Nao wairimi wakakotelana, “Kuo mundungi amletela chakulya?” 34Jesu kawauza, “Chakulya changu ni kudea mashayo gha uyu anitumile, na kuimalila kazi yake. 35Ado simughoragha, ‘Yasigho mezi mine, nao tikwashe?’ Nemi namuza, Zighaneni, muone selyi mbuwa zaela kwa kukwasha. 36Uyu mundu ekwashagha walipo mafungu ghake, wakoghanya mavalo kwa umana ghwa kale na kale, eri mwandi na mkwashi waboelo wose. 37Kwani mughoro ughu ni ghwa fulo, ‘Mumoju wawanda na mumoju wakwasha.’ 38Nanamtumile kukwasha, andu simodeile kazi ingi, wazima wanadeile kazi, nenyo mwawarurika kwa kazi yawe.”
39Nao Wasamaria wengi wa muzi ghulya wakadumusa kwa undu ghwa ushuhuda ghwa ulya muke, “Wanighorera malagho ghose nideile.” 40Nawo Wasamaria weja kwake wakamlomba akalanye nawo: naye kakalanya nawo majua maili. 41Nao wandu wengi wakadumusa kwa undu ghwa ghore zake. 42Nawo wakamuza ulya muke, “Si kwa undu ghwa malagho ghako kungi isi tadumusa, ela ni kwa kukala tasikila isi wenyi na tamanya fulo uyu ni Mkizi wa urumengu.”
Jesu kumuboesa mwana wa mundu mubwaa wa serikali
43Naye aghenda amalila majua maili, kaghenda Galilaya. 44Kwani Jesu mwenyi oghorire, “Tondolo salikogho kele isanga lyake lyenyi.” 45Nao aghenda afika Galilaya, Wagalilaya wakamkaribisha kirani, kwa undu ghwa ghalye ghose waonile kedea Jerusalemu ngelo ya karamu, kwani nawose weghendile kele karamu ya Pasaka.
46Nao kauya sena Kana ya Galilaya, andu eghalule meji kukala divei. Nako Kapernaumu koluo na mundu mubwaa mumoju eluo na mwana mkongo. 47Naye aghenda asikila kamba Jesu weja Galilaya kufuma Judea, kamughendela na kumlomba waselelanye eri amuboese mwana wake, kwani oluo avui na kufwa. 48Nao Jesu kamuza, “Simudima kudumusa ikakala simoonile wana mwakilimbita na mashiniko.” 49Ulya mubwaa kamuza, “Bwana, tighende mwanwangu sefwile.” 50Jesu kamuza, “Ghenda, mwanwako uwo banana.” Ulya mundu kadumusa malagho gha Jesu, kaghenda ngila yake. 51Naye ilyi eluo kegala, kakoghana na watumishi wake, wakamuza, “Mwanwako uwo banana.” 52Naye kawakotela ngelo adyowile kuboa, nawo wakamuza, “Ighulo saa mfungate msuko niko ghumusighile.” 53Nao tatie kamanya ni ilya saa yenyi Jesu amuzile, “Mwanwako uwo banana.” Naye mwenyi kadumusa na nyumba yake yose. 54Uyu oluo ni mwakilimbita wa kaili Jesu amudeile aghenda eja Galilaya kufuma Judea.
Okuqokiwe okwamanje:
Johana 4: SAGALLANT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
(C) The Bible Society of Kenya, 1993