मत्ती 4
4
येशुल दी़क्की छो़त्लीन् तेब १-११
1हुनी दी़क्की चो दीगी येशुल छो़त्लीन् तज्येल, धम्बे थुगी खोङ् पक्क झ्यङ्दङ्ल डोदु ची़प्प बेत्। 2ॱनी हुदु येशु स्यक्पु स्यीप्च्यु थुक् ॱनुक्नेल स्युन देत्नी, खोङ् ढोप्प तोब बेत्। 3हुगी यङ्ल हुदु दीक्पल च्युगेन् हुगी दी़त् दी युङ्न हुगी येशुल खो़त् को़न्ज्योक्की ॱरेबु हीन्न ॱनी, हीगी दो हीब ढोप्चील ज्युर्ल ज्युक् झ्यीलोङ् न ॱनी झ्यीब बेत्। 4ॱनी खोङ्गी हुगी लेल्ल ॱसुङ्रप्ल ढीन यो़क्केन् बेत्।
मील सम छ्युवक् मेम्ब, ॱयोङ्म आक् गो़गेन् बेत्। को़न्ज्योक्की केच्च्य गो़गेन् बेत् झ्यीब बेत्। (ठीम्लु ८:३)
5हुनी हुगी दी़क्की चो दीगी को़न्ज्योक्ल पी़प्पे हुगी सार्ल येशु ठीक्न हुगी छ्यो़गङ्गी चीमुङ् दील जेक्तु ची़त्न 6खोङ्ल ह रङ् को़न्ज्योक्की ॱरेबु हीन्न ॱनी, हीनी मल्ल फीर्। घन्ड हीन् सीन्न ॱसुङ्रप्ल ढीन यो़क्केन् बेत्।
को़न्ज्योक्की खोङ् रोरङ्गी तेङ् यी़गी भङ्ज्येम्ब घयेत् इगीनी मल्ल तङ्न युङ्न रङ्गी कङ्ब दोल दुदु ॱमीत् ची़प्प, हुबे दुलील खुर्केन् बेत्। (ॱसुङ्रप्की गुल्लु ९१:११-१२)
7हीगी लेल्ल येशुगी ॱसुङ्रप्ल हीगो ओक् ढीन यो़क्केन् बेत्।
रङ्गी चोव ज्यीन्दक् को़न्ज्योक्ल छो़त्लीन् तज्ये मीत् युङ्गेन् बेत्। (ठीम्लु ६:१६)
8हुनी दी़क्की चो दीगी यङ् येशु लदोक् छ्यीया च्यीक्ल ठीक्न जम्बुलीङ्गी ज्यागक् घयेत् धङ् ॱनी हुगी ज्यागक् घयेक्की नोर् खुङ्म घयेत् दी खोङ्ल जेङ् तो़म्ब बेत्। 9हुनी हुगी येशुल रङ्गी ङल छ्यक् छेन ॱनी, हीगो ङे रङ्ल जेङ् टेत् योङ्। 10हीनी येशुगी हुल ॱवे शैतान्, रङ् हीनी ज्युक्। ॱसुङ्रप्ल ढीन यो़क्केन् बेत्।
चोव ज्यीन्दक् को़न्ज्योक्लरङ् छ्यक् छेन धेप्प दी खोङ्लरङ् क झ्यीत् गोगेन् बेत्। (ठीम्लु ६:१३)
11हुनी दी़क्की चो दीगी येशु ॱलो़ तङ्न टप्नर बेत्। हुनी इगीनी मल्ल तेङ् यी़गी भङ्ज्येम्ब घयेत् युङ्न येशुल स्यप्च्यी़ ज्युब बेत्।
येशुगी केच्च्य दी गोम कफर्नहुम्नी ॱस्येत्न युङ १२-१७
12हुनी तीङ्ला येशुगी युहन्ना चो़ल्ल ॱलुक्तुक् सीर ॱह घोनी खोङ् गालीलाल लोक्प बेत्। 13हुनी येशु खोङ् रोरङ् ॱङर् स्युस नासरत्नी थो़न्नी कफर्नहुम्दु दो़त्तु फीम्ब बेत्। हुगो गालीलागी छो़ छीगल ॱनेगेन् जबुलुन् धङ् नप्तालीगी ज्यी़क्की लुङ्बन यो़प्प बेत्। 14हीगो कलुङ् ॱस्यो़क्केन् यशैयागी ॱस्येप्पे ॱङो़स्स्यी ताबल झ्युङ बेत्। 15हीगो हीन्दुक् सीर थो़ङ्गेन् बेत्।
जबुलुन् धङ् नप्तालीगी ज्यी़क्की लुङ्ब छो़ छीग यर्दन् पारीगी लुङ्ब ज्यी़त् ॱयोङ् ॱयोङ्गी मी घयेत् यो़स्स गालीलागी लुङ्बन 16मेन्नक्ल दो़क्केन् घयेक्की मेङ्ग छ्यीम्मु च्यीक् थोङ्गेन् बेत्। ॱनी उन ॱस्यीये इप्ल दो़क्केन् घयेत्ल मेङ्ग छ्यीम्मु च्यीक् ॱस्यर्केन् बेत् सीन्न यो़क्केन् बेत्। (यशैया ९:१-२)
17हुगी धी़नी झ्यीनी येशुगी मी घयेत्ल तेङ् यी़गी ज्यागक् ॱस्यच्चल ॱलीत् छर बेत्। खीत्रङ् घयेत् ह ॱएङ्गी लम्नी ॱसीम् ज्युर्लेत् सीन्न ॱस्यो़क्कील्ल थो़म्ब बेत्।
ॱलोप्टुक् स्यी दम्बे तम् १८-२२
18हीनी लेन् च्यीक् येशु गालीलागी छो़ छीगनल गीरे यङ्ल खोङ्ल मी नबा पी़न् ॱङी छोल जाली ॱयुक्पदङ् ठेप्प बेत्। हुबे मीङ् दी च्यीक्ल शीमोन्, ॱनी हुल यङ् पत्रुस् सीक्केन् बेत्। हुगी पी़न् दील अन्द्रीयस् सीगो़प्प बेत्। 19हुब ॱङीबुल येशुगी खीत्रङ् ङदङ् दल डो। हुन्दो खीत्रङ्गी न सीङ्गेन् हीगो डस्सी थर्वे लम्ल मी घयेत् सीन्न ठीक्केल्ल खीत्रङ् सोगेन् झ्यीब बेत्। 20हीनी ॱस्यर्च्यक् हुबे रोरङ्सो़ जाली घयेत् दी हुदु च्यम् स्यक्न येशुगी ॱलोप्टुक्ल खोङ्दङ् दल टप्नर बेत्।
21येशु हुनी फल्ल फीन्नी यङ् नबा फेबेत् ॱसुम् ढी़ नङ्दु जाली चीम्गीन् झ्यीप्पदङ् ठेप्प बेत्। पब दीगी मीङ् दील जब्दी सीगो़प्प बेत्। ॱनी भु दीबल याकुब् धङ् युहन्ना सीगो़प्प बेत्। ॱनी हुब ॱङीबु येशुगी ॱलोप्टुक्ल भो़ब बेत्। 22ॱनी हुबे ढु दी धङ् पब दी हुदुरङ् ॱलो़ तङ् झ्यीज्ये रोरङ्सो येशुगी ॱलोप्टुक्ल खोङ्दङ् दल टप्नर बेत्।
येशुगी छेन् घल अक् धर्नर २३-२५
23हुनी येशु गालीलागी लुङ्ब घल अक् गीर्न यहुदीगी छ्यो़गी छोगङ् घयेत्ल स्युन ॱलोप्स धङ् तेङ् यी़गी ज्यागक्की केच्च्य ॱनेम्बु ॱस्येत्न बीन्न मी घयेक्की नज ॱनम्ब गज्येन् ढक्तु ची़प्प बेत्। 24ॱनी हीगी तम् दी सीरीया लुङ्ब की़ल्ल धर्न खुर्नी, हुगी लुङ्बन यो़क्केन् ॱनो़प्प अयेक्प स्यीन्नर, सम्ज्येम्ब, घोङ्रीय धङ् नज ॱनम्ब गज्येन् च्येम्मे नेप्प घयेत् येशु च्येल्ल च्यो़दु युङ बेत्। ॱनी खोङ्गी हुब कुरीक् ढक्तु ची़प्प बेत्। 25ॱनी येशु च्येल्ल गालीलानी, डेकापोलीस्की लुङ्बनी, यरुशलेम्नी, यहुदीयानी धङ् यर्दन् चङ्बी़ पारीगी लुङ्बनी इक् मी छेत्मीत् खोङ्गी तीङ्ल तीङ् दीत्न युङ बेत्।
Okuqokiwe okwamanje:
मत्ती 4: LHM
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 1995 Wycliffe Bible Translators, Inc. and Nepal Bible Society