Marc 1
1
Ioan Pãtidzãtorlu Discljidi Calea al Isus Hristos
1Ahurhirea a Evanghelului al Isus Hristos, Hiljilu al Dumnidzãu. 2Ashã cum easti scriatã la prufitlu Isaia:
“Ia, mini [Dumnidzãlu] ma pitrec mandatorlu a meu dininti a fatsãljei a ta,
tsi va s-ndreagã calea a ta dininti a ta,
3 boatsea atsilui tsi aurlã tu irnjiã:
‘Ndridzets-lu calea a Domnului,
ndreptatsã cãljurili a lui!’”
4Ioanul vini tu irnjiã ti pãtidzari, predicãnda un pãtidzari trã mitãnjusirea a amãrtiilor tsi Dumnidzãulu s-li ljeartã. 5Sh-tut loclu al Iudei sh-atselji dit Ierusalim nãdzea la elu shi s-pãtidza tuts di la nãsu la rãulu Iordan spunãnda amãrtiili a lor. 6Ma Ioanul eara nviscut cu stranji di lãnã ali gãmili, tsãnea un curauã di chealã anvãrliga di ilji shi mãca carcalets sh-njeari agrã. 7Elu ma predica dzãcãnda: “Dupã mini yini un tsi easti ma vãrtos di mini. Mini nu escu axiu nits s-mi apunã dininti a lui ti dizlãgari lãgãtura a-sandalilor a lui. 8Mini vã pãtidzai cu apã, ma elu va vã pãtidzeascã cu Duhlu Sãmt.”
Pãtidzarea shi Cãrtarea al Isus
9Sh-tu atseali dzãli undzi tsi Isusul vini di la Nazaretul a Galileiljei shi s-pãtidzã di la Ioanul tu Iordan. 10Shi dinãoara cãndu ma insha di apã, vidzu cã tserurli ma s-discljidea shi Duhlu ma dipuna pri nãsu ca pãrumbu. 11Sh-unã boatsã vini dit tserul: “Tini eshtã Hiljilu a meu vrut cu cai escã hãrãsit.” 12Sh-dinãoarã Duhlu Sãnt lu-adusi tu irnjii. 13Shi eara tu irnjiã patrudzãtsi di dzãli, bãgat tu cãrteari di Satanlu. Sh-eara deadun cu agrãlji, shi anghilji l-huzmitipsea.
Acljimarea a Ucenitsilor di Prota
14Shi dupã tsi Ioanul u hãpsãnirã, Isus vini tu Galilei predicãnda evanghelul al Dumnidzãul. 15Sh-dzãcãnda: “Agiumsi chirolu shi s-apruchiã amirãriljea al Dumnidzãul. Mitãnjusits-vã sh-pistipsits evanghelul.”
16Trãcãnda prininga amarea a Galileiljei, vidzu Simonlu sh-Andrea, fratili a lui, arcãnda plãsile tu amari cã earau piscari. 17Shi Isus u dzãsi atslor: “Urmatsmã shi mini va vã facã piscari a oamnjilor.” 18Sh-trãoarã atselji li alãsarã plãsile shi s-dusirã dupã nãsu. 19Dupã tsi imnã ninga niheam, vidzu Iacovul, hiljilu al Zebedeu shi Ioan, fratili a lui tsi mpitica plãsile a lor tu varcã. 20Sh-trãoarã li-achljimã shi elji lu-alãsarã tatilu a lor, Zevedeul tu varcã cu lucrãtorlji, shi s-dusirã dupã nãsu.
Vindicarea a Demonizatlui dit Capernaum
21Deapoea intrarã tu Capernaum shi dzua di Sãmbãta trãoarã intrarã tu sinagogã shi nvitsa oaminjlji. 22Sh-oaminjlji s-ciudisirã di nvitsãtura-a lui, cã elu li nvitsa ca un tsi ari puteari sh-nu ca scriblji. 23Atumtsea tu sinagoga-a lor eara un om putut cu un duh nicurat, tsi ahurhi s-aurlã, 24dzãcãnda: “Tsi ari namisa di noi sh-di voi, Isus di Nazaret? Vinish tsi s-ni cherdzã? Mini lu shtiu cai eshtã: Sãmtulu al Dumnidzãul.” 25Shi Isusul lu ursi dzãcãnda: “Pãpsea shi easã di la nãs.” 26Shi duhlu nicurat, dupã tsi lu apustusi shi aurlãnda cu mari inshi di la nãsu. 27Sh-tuts s-ciudisirã ahtãt mult cãt ntriba un-alantu dzãcãnda: Vahi tsi easti atsea? Tsi nvitsiturã noauã easti atsea? Aestu li urseashti cu puteari shi duhurili nicurati shi elji lu ascultã. 28Shi anamea a lui s-avdzã dinãoarã pri tutã loclu avãrliga a Galileiljei.
Vindicarea a Soacrãljei al Petru
29Cum ishirã elji dit sinagogã, s-dusirã la casa al Simon shi al Andrei, cu Iacovul sh-cu Ioanul. 30Soacra al Simon eara bãgatã cu heavrã, shi dinãoarã elji lji-spusirã ti nãsã. 31Atumtsea elu s-apruchiã, lu-acãtsã di mãnã shi-u sculã. Trãoarã hevrili u-alãsarã shi ea acãtã s-lã huzmitipseascã. 32Seara dupã ascãpitarea a-soarilui, lji adusirã tuts lãndzitslji shi dracuitslji. 33Sh-tutã cãsãbãulu eara adunat nãinti ali ushi. 34Elu vindicã mults di atselji tsi s-munduia di multi soi ti lãngoari, shi aĝiuni mults drats, sh-nu alãsã dratsilji s-greascã, cã elji lu-cunushtea.
35Deapoea, dimineatsa curund cãndu ninga nu avea apirit, Isusul si-sculã, inshi shi s-dusi tu un loc ermu shi aclo s-pãrãcãlsii. 36Shi Simonlu sh-atselji tsi eara cu nãsu, lu-cãfta. 37Shi cãndu lu aflarã lji-dzãsirã: “Tuts ma ti caftã.” 38Shi elu lã dzãsi a lor: “Hai s-nidzem tu hoarili di aproapi tsi s-predicã shi-aclo, cã ti aestã am vinitã.” 39Shi elu tricu tutã Galilea predicãnda pri sinagogãli-a lor shi aĝunea dratslji.
Vindicarea a Leproslui
40Shi vini la elu un lepros, tsi pãrãcãlsãnda lj-cãdzu pi dzinuclji sh-lji dzãsi: “Ma s-vrei tini, pots s-mi curi.” 41Shi Isusul sãmtsãnda njilã, lu timsi mãna pri nãs sh-lji dzãsi: “Ie, voi, s-hii curat!” 42Ma cãt dzãsi aesti, dinãoarã lepra lu-alãsã shi s-vindicã. 43Deapoea, dupã tsi lu-ursi, trãoarã lu dipãrtã, 44dzãcãnda: “Vedz s-nu lji spunji tsiva-a vãrui, ma imnã la preftu, shi dã tsiva trã curarea-a ta, cum easti ursit tu legile a Moisiului, ca mãrtirii trã nãsh.” 45Ma elu, inshinda, apãrnji s-greascã shi s-scurpiseascã la mults faptulu, ahtãt mult cãt Isusul nu putea s-intra discljis tu cãsãbã, ma stãtea nafoarã pri locuri ermi. Sh-di tuti pãrtsili yinea la nãsu.
Okuqokiwe okwamanje:
Marc 1: BLRR
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume