Иоан 15
15
1«Ме ─ былись виноград пу. Менам Айӧ ─ виноград быдтісь. 2Менчим уввесӧ, кӧдна озӧ вайӧ воӧмсӧ#15:2 воӧм ─ плод, Сія кералӧ. Нійӧ уввесӧ, кӧдна вылын эм воӧмыс, Сія весӧтӧ, медбы унажык вайисӧ воӧмсӧ. 3Тійӧ Менам висьталӧм кыввезӧн весӧтӧмӧсь ни. Ӧні тійӧ сӧстӧмӧсь. 4Лоӧ Ме пытшкын, и Ме лоа тіян пытшкын. Ачыс улыс оз кӧ ло пуыс бердын, сэк оз вермы сетны воӧмсӧ. Сідз и тійӧ Метӧг одӧ вермӧ сетны воӧмсӧ.
5Ме ─ виноград пу, Тійӧ ─ уввез. Кин олӧ Ме пытшкын, а Ме сы пытшкын, сія вайӧ уна воӧмсӧ. Метӧг тійӧ нем одӧ вермӧ керны. 6Кин оз ло Мекӧт йитчӧм, увсӧ моз сійӧ чапкасӧ, и сія косьмас. А сэтшӧм уввесӧ ӧктӧны да шупкӧны биӧ, и нія сотчӧны.
7Пондат кӧ овны Ме пытшкын да Менчим кыввезӧс пондат кӧ видзны сьӧлӧманыт, сэк корӧ, мый колӧ, и тіянлӧ лоас сетӧм. 8Лоат кӧ Менам велӧтчиссезӧн да ваят уна воӧмсӧ, сы понда ошкасӧ Менчим Айӧс. 9Айӧ Менӧ радейтӧ. Ме тіянӧс радейта Айӧ моз. Олӧ Менам радейтӧмын. 10Ме кера Айӧ тшӧктӧммез сьӧрті и ола Сы радейтӧмын. Тійӧ пондат кӧ керны Менам тшӧктӧммез сьӧрті, сэк пондат овны Менам радейтӧмын.
11Сійӧ Ме висьталі тіянлӧ, медбы Менам гажӧ тіянлӧ вуджис. Тіян сія гажыс ась лоас сьӧлӧмтыр. 12Менам тшӧктӧмӧ то кытшӧм: Радейтӧ ӧтамӧднытӧ, кыдз Ме радейта тіянӧс. 13Кин ёрттэс понда пуктас кӧ ловсӧ, сэтшӧм радейтӧмыс медвына. 14Керат кӧ тшӧктӧммезӧ сьӧрті, сэк тійӧ Менам ёрттэз. 15Ме ог ни шу тіянӧс раббезӧн. Рабыс эд оз тӧд, мый керӧ кӧзяиныс. А Ме Айӧсянь кылӧмӧс тіянлӧ быдӧс висьталі. Сійӧн шуи тіянӧс ёрттэзӧн. 16Тійӧ эдӧ бӧрйӧ Менӧ, Ме бӧрйи тіянӧс. Ме сувтӧті тіянӧс да иньді вайны воӧм. Тіян воӧмныт ась пыр олӧ. Сідз кӧ пондат керны, сэк Менам нимӧн мый корат, Айӧ сетас тіянлӧ. 17Менам тшӧктӧмӧ сэтшӧм: радейтӧ ӧтамӧднытӧ».
Отирлӧ Исус бӧрсянь муніссез син вылӧ озӧ колӧ
18«Отирыс синнаныс кӧ озӧ вермӧ видзӧтны тіян вылӧ, тӧдӧ: одзжык Ме нылӧ син вылӧ эг ков. 19Вӧліт бы тійӧ ны коласісь, сэк нія радейтісӧ бы тіянӧс. Тійӧ эд абу ны коласісь, Ме бӧрйи тіянӧс ны дынісь. Сійӧн тійӧ отирыслӧ син вылӧ одӧ колӧ.
20Видзӧ юраныт Менчим висьталӧмӧс: раб абу ыджытжык аслас кӧзяинся. Менӧ кӧ вашӧтлісӧ, пондасӧ вашӧтлыны и тіянӧс. Керисӧ кӧ Менам висьталӧм кыв сьӧрті, пондасӧ керны и тіян кыв сьӧрті.
21Быдӧс сійӧ тіянлӧ керасӧ Менам ним понда сійӧн, мыля озӧ тӧдӧ Сійӧ, Кин Менӧ ыстіс. 22Ме эг кӧбы лок да баит нылӧ, сэк нылӧн эз бы вӧв умӧль керӧмныс. Ӧні нія озӧ вермӧ висьтавны, эзӧ пӧ керӧ умӧльсӧ. 23Кинлӧ Ме син вылӧ ог ков, сылӧ и Айӧ син вылас оз ков. 24Ме ны син одзын кери сійӧ, мый некин одзжык эз керлы. Керӧммезӧс нія эзӧ бы адззылӧ, сэк нія эзӧ бы вӧлӧ умӧль кериссез. А нія адззылісӧ, но Ме и Менам Айӧ нылӧ син вылӧ огӧ колӧ. 25Керсьӧ Туйдӧтаныс висьталӧм сьӧрті: "Ме нем умӧльсӧ эг кер, но нылӧ син вылӧ ог ков".
26Ме тіянлӧ Айӧсянь ыста Дорйисьӧс. Сія Быльыслӧн Лов#15:26 Быльыслӧн Лов ─ Дух Истины, локтас Айӧсянь. Сія пондас висьтасьны Ме йылісь. 27Сідз и тійӧ пондат висьтасьны Ме йылісь, тійӧ эд Мекӧт вӧліт одзза луннэзсянь».
Okuqokiwe okwamanje:
Иоан 15: БЮ19
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume