Mak Gudoyahu m’andékehne gukaranku líibárhu inno n'ayéjuhne Injilo no Mak
Gudoyahu m’andékehne gukaranku líibárhu inno n'ayéjuhne Injilo no Mak
Hantaŋ añaañne líibáro inno?
Líibáro inno údiigeeno m'aretuhne Mak añaañne.
Mak, ummu hantaŋ?
Mak aguyeriguy kosumbulonku úbuuñuraaŋo m’aretaane Piyer. Angu Piyer mungu gankokayekokay ingi Yensa, Umaasaŋo mu Díino Acaabenne. Biriman d'atooŋne bukawandinku jamaŋo, Piyer ummo maŋ na. Piyer asosor biniirohu Yensa. Afak afégem n'akengunaane a biniirohánom, ingi mees f'aŋoolinne ba arjanna Piyer ummo maŋ na. Hómáráŋ nip Piyer aféfeg jaháraŋ ingi ígihinem. Angu, Yensa baŋoolini mees ba arjanna, Piyer adék ba búteekinku jamaŋo gunaanam. Gúduk Mak mees ankokayeh ingi úmár k'ajanteneh ho Piyer alóbne. Angu, ho Piyer alóbne gu Yensa a kawandhánam, hómáráŋ nip Mak adék añaañ k'ababahin hómár nip a líibáro inno.
A waat nooraŋ Mak añaañne líibáro inno?
Angu, ñanlabahi m'anyikne lóndo dáde a Gúloku Díino anlahlah mara Mak añaañaañ líibáro inno a waato n’agune Rom bi díineŋo jamaŋilall ingi alallaŋ (63) adék ba jamaŋilall ingi amákilaŋ ingi alallaŋ (68).
Mak, jamaŋ immeraŋ gañaañurne líibáro inno?
Angu, m'anyikne lóndo dáde a Gúloku Díino anyéjyej Mak añaañurñaañur mi guyroŋoŋ Ñanyahud líibáro inno. Ñanfiyunku hafaaso mi pájiireŋeŋne honj a nintiku hakaananku Ñanyahudo, ingi mi pájiireŋeŋ gu Díino Amánduko antohtoh na. Angu, gúmár akanne akeekireeniŋ holabahiyeŋ a nintiku coosananku Ñanyahudo ingi balókánin mees.
Horaŋ akanne ki Mak añaañi líibáro inno?
Mak añaaññaañ líibáro inno ba bujellihinkintor mara Yensa agune Úbáku Díino mu Díino abúuñurne a duniyaŋo inno ba bupahunkintor a kunyoku júnubonkintor. Mak asíibáásiib bujellihinkintor sembe Yensa. Gúmár akanne añaañi jup a nintiku tamaseereŋo no Yensa afúnnáne. Ingi faka mees, Mak ajellihinjellihin jamaŋo a injilo inno tamaseereŋo jup no Yensa afúnnáne. ( Mak ñaañáraŋ dáde ho Yensa akawandinne jamaŋo.) Angu, a gubaarhu hójoonineŋo ingi tamaseereŋo no Yensa afúnnáne, hómáráŋ ajellihinjellihin jamaŋo mara úmár Yensa atohtoh ingi Díino. Nim Mak asíibane bujellihinkintor. Agida tamaseereŋo no Yensa afúnnaane guyroŋ kara wúur m’aŋay bútibhu buramun. Wówo! Mak ajellihinjellihin jamaŋo maro Yensa apápájul mara ba kunyoh gadékehne. Agida a waato nómár no Mak añaañne líibáro inno jamaŋo imme na buyehenku ñantifilinku Yensa dáde. Angu hómár asaabumne Mak ajellihini mintor duniyahu Yensa iniman wúur m’aŋay kaparehu biniirohánom. Agida, biniirohu Yensa upiren úyej gúlob gúsuumi mara a gubaarhu biniirohánom a dinlihano Yensa acaamcaam júnubonku jamaŋo. Angu, Mak asíibáásiib ki jamaŋo nip anyennehin Kúmbuuñaamo Kúnsuuminno ki nim aji anfiyumi Yensa, Díino apiren apahuneeniŋ a kunyoku júnubonkánin. Gúmár akanne Mak añaañi líibáro inno.
Okuqokiwe okwamanje:
Mak Gudoyahu m’andékehne gukaranku líibárhu inno n'ayéjuhne Injilo no Mak: GD
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Copyright Vision Intégrale, Senegal