TOMAHA NINUNI 14
14
Na Isiraelita ka hagagege
1Igê na bungiana hagenani na enoni ka angiangi ma ka anumanuma. 2Ngaira ka hagagege tangarerua o Moise mo Aroni, ka vi: “I ararigami vigami bani me vê hete i Esipito, se ikê igê na masusu raha! 3I tanu hega na Araha ki toregami banu igê na agua ikê? Igami kami page meme igê na hearihatana. Ngaira ka page henahuraura na gete iamami ma na karemami. I pe ararigami vari, vigami aporo i Esipito?” 4Vikê ngaira ka hetamatamasi so mareta, ka vi: “Nika, ge atea tani na mane, hanana ga bêngenigia ke aporo i Esipito!”
5Hoi, o Moise mo Aroni karu susure karu tubê so i ano i maata na enoni hato. 6O Josua o karena o Nune ma o Kalebe o karena o Jepune karu tarisigi na gahu iaterua, suria i hataera na apeterua renia na tarana ngekana. Ngairerua ka na hitangita na mane ga râ bâbâ. 7Ngairerua karu vi tangara na enoni, karu vi: “Na agua mi rârâhia ki na agua na mako koro ngavê. 8Manga vi na Araha ma ki obâbakoro renigia, ngaia ki page bêngenigia banu i ngekana ma ki page haganahunigia renia na agua na mako koro ni ngauha ma ni togoha. 9Siana kamu haritohea na Araha. Siana kamu magutenira na enoni ga oga i ngekana. I page mataku ma tangagia, viga mutera. Na Araha ki ngahisigia. Ngaia ki bani teharira na ataro iata, ga hagarapera. Tahema siana kamu magu!” 10Ngaira hato na enoni ka vi: “Nika, ge arihahunirerua!” Ki parama ma ngaira ka bâsia na bâbâhana raha na Araha i avorana na ruma na gahu iana.
O Moise ki nungia God ki bonotenigi na tasi iata na Isiraelita
11Na Araha ki vi tanga o Moise, ki vi: “Na enoni igê ka usiteniê taraha? Inê kê bani katogi me rako na mena tangara. Na enoni ngegê ka pe hagêguritogo reniê taraha? 12Inê be naka na ringa ke mutera. Inê be katora na raraha iamu igo ke tataka ngavê ke rako ma ke ramo teharira ngaira!”
13Ma o Moise ki vi tanga na Araha, ki vi: “Igo ko bani bêngenira hura na enoni ngegê tenia i Esipito renia na raramohamu raha. Matena na ai ni Esipito ka rongogi na tarani go bani katogi tangara na kariamu, 14ngaira ka page hagarongora na enoni ga oga igê na agua ikê, renigi. Na enoni ngegê ka bani rongoa, vi igo Araha ko ngahisigami, vi igo ko vora me i mamami, matena na vaha ki oga i avoramami, ma vi igo ko nanago taramami igê na u na vaha igê na tangiani ma igê na u na gi igê na bungiani. 15Hoita, manga vigo mutera ngavê na kariamu hato, na enoni i na agua getigi, ga bani rongo tarohamu, ka page vi, 16vi igo ko mutera na kariamu igê na bagamasusu raha, suria i bara tangago, vigu merabanu igê na agua, go bani surua, vigo haganahunira renia. 17Tahema, Araha, inê kê nungigo, ku hagabângenia na raramohamu, ma ku hagamonaria na suruha iamu, go vivi 18‘Inê na Araha, kê pe bagamangamangariaga. Inê ki raha i pasiku na hetakuiha. Inê kê hagamonarigi tare na tamasinga iaku. Inê kê bonotenigi na tasi ma na guguruganiha. Henaka, inê kê page hagaitangira nga na enoni, ki tarêhira nikâ na oruta ma na heta me na apaparaha iata.’ 19Tahema Araha, inê kê nungigo, ku takusia na hetakuiha raha ma tarema iamu, ma ku bonotenigi na tasi iata na enoni ngegana, manga go bani bonotenigi me tare na bagatauhata, haganega me tenia i Esipito mataro me i ngekê.”
20Na Araha ki arami, ki vi: “Hoi, suria go nungiê, inê be bonotenigi na bagatauhata, 21-22kê tohe, vi na enoni ngegê ki asa vige page tahi togâna na banuha igê na agua ngekana. Na tohenga iaku ngêke ki monari ngavê, manga vi monari inê kê gâga, ma na raramohaku ki rararo i maveta. Ngaira ka bani bâsigi na bâbâhaku raha ma na mena, gê tanugi i Esipito ma igê na bagamasusu raha. Ma ngaira ka ama ni uhungia nga na haritagiha iaku, ma ka ama ni guguruga nga tangê. 23Ngaira ki asa, vige banu igê na agua, gê bani surua tangara na êvarita. Na enoni, ga haritoheê, ki asa ta na hitangita, vige page banu igê. 24Na parongana o Kalebe na kariaku ki tora getea. Ngaia ki ama ni toto suriê nga. Tahema inê kê page torea banu igê na agua, i bani râ bâbâ igê, ma kê page haganahunira na raraha iana renia na agua, 25igê na maruguni ga oga igê na Amalekita ma na Kananita i ngekê. I gomaha mu aporo suri ugami igê na bagamasusu raha tanga na Asi Memera.”
Na Araha ki hagaitangira na enoni renigi na hagagegeha iata
26Na Araha ki vi tangarerua o Moise mo Aroni, ki vi: 27“Na enoni era ngegana ka hagagege tangê taraha? Inê kê bani rongogi me makira na hagagegeha iata! 28Hoi, muru aramira vikê: ‘Inê kê tohe, vi inê kê aganarigamu. Na tohenga iaku ki monari ngavê manga i monari gê oga. Inê nga na Araha kanigê tamasi. 29Igamu kamu page meme ma na gahuani ka page tâtâ totoko igê na bagamasusu raha. I asa ta na hitangimi vige tonga na harisi tangahuru gi rua ma ke matara na harisi iana ke akê, vige page banu igê na agua ngekana, suria igamu kamu hagagege tangê. 30Inê kê bani surua, vigê kasigamu kamu gâga i ngekana, ma ki mareha rârâ, nga noga ma o Kalebe mo Josua. 31Igamu kamu vi, vi na karemi ka page henahuraura, ma inê kê page torera banu igê na agua mu usitenia, ma ngaira ka page gâga hagahu igê. 32Ma igamu kamu page meme ikê igê na bagamasusu raha. 33Na karemi ka page ataka mavê re râha igê na bagamasusu raha surigi na harisi tangahuru ge he. Ngaira ka mamasiaga meni na guguruganiha iami, mataro me ki meme na ara ni hitangimi. 34Igamu kamu page kasikasi meni na tasi iami surigi na harisi tangahuru ge he, i vi vi na harisi gi tage tanga na ara ni tangiani tangahuru ge he, mu arâ bâbâ surigi igê na agua. Igamu kamu page tahetara renia vi tanu hega kanigê kasi renigamu. 35Inê kê tohe, vi inê kê page katogamu vikana, igamu na enoni era mu haritoheê. Na ara ni hitangimi ki page meme so nga igê na bagamasusu raha. Ngaia kanigê visia inê na Araha.”
36-37Na mane, ki hagatorangenira o Moise ka râ bâbâ igê na agua, ngaira ka tokorenia na hagaparunga, i katora na enoni ka hagagege tanga na Araha. Tahema na Araha ki hagaitangira ka me renia na ringa. 38I berarogata na mane tangahuru matarerua ga râ bâbâ ngairerua o Josua mo Kalebe karu tahi.
Na Isiraelita ka uhungia vige henahuraua i Kanani
(Ramata 1.41-46)
39Matena o Moise ki hagarongora na Isiraelita renigi na tamasinga iana na Araha, ngaira ka angi teha ngavê. 40Igê na mahogotana i tangi me, ngaira ka uhungia, viga bêbanu igê na agua i huhunganiga. Ngaira ka vi: “Nika, ge nanê ni râha tanga na agua, na Araha ki bani surua tangagia. I monari, igia ka pe tê viteana God.”
41Ma o Moise ki hagate, ki vi: “Ma ki tanu hega, igamu kamu pe tê viteana na Araha i ngekê? I bara tangagamu! 42Siana kamu arâ. Na Araha ki pe ngahisigamu. Na merongami ka page teharigamu. 43Matena mu meraheariha na Amalekita ma na Kananita, igamu kamu page meme. Na Araha ki asa, vige page ngahisigamu, suria igamu kamu usi, vigamu toto suria.”
44Henaka, ma ngaira ka uhungia nga ka tagere igê na hungani igê na agua, naka ma na bokesi na suruheri iana na Araha ma o Moise karu oga so ma igê na tênga. 45Na Amalekita ma na Kananita, ga oga i ngekana, ka taharira ma ka teharira ma ka tarigenira rârâ ma ka mataro me i Goroma.
Okuqokiwe okwamanje:
TOMAHA NINUNI 14: KCB
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2011 Bible Society of the South Pacific