TOMAHA NINUNI 19
19
Na rahugana na puruka memera
1Na Araha ki bonasirerua o Moise mo Aroni, 2karu vatera na Isiraelita renigi na ramata igê. “Mu urua me na puruka memera, i apeapekoro ma ki pe baubêga ma ka pe hagatagarahia rârâ, 3tanga o Eleasare na mane ni vogasiha. Mu urua hura na puruka tarege râ tenia na tênga ma kamu nahuia ki meme i maana o Eleasare. 4Hemuri o Eleasare ki torea tagua na gapuna na puruka ma ki tahusigenia hagepi bê râ tanga na ruma na gahu apuna renia na kakêna. 5Mu sungia na puruka hagenani i maana na mane ni vogasiha: na gavona, na hasigona, na gapuna ma na aunâbana. 6Hemuri na mane ni vogasiha ki taugi nga na bogona na apinige, na kere arana na apinige na hisope ma na varo memera ma ki kasi akê igê na gi. 7Hemuri ngaia ki tananigi nga na gahu iana, ki karangia na ve huria marena ma ki kahu bêbanu igê na tênga. Henaka ma ngaia ki pe matarotaro mataro me ki bungibungi. 8Na mane i sungia na puruka ki tananigi nogana na gahu iana ma ki karangia na ve huria marena. Henaka ma ngaia nogana ki pe matarotaro mataro me ki bungibungi. 9Hemuri ta na mane i matarotaro ki raguigi nga na rahugana na puruka ma ki nakagi igê na agua matarotaro tarege râ tenia na tênga. Ma i ngekana ka gâga nga igê tangara na Isiraelita tanga na hagarêana na ve ni hagamatarotaroha ni bonoteniha ni tasi. 10Na mane i raguigi na rahu, ki tananigi nga nogana na gahu iana. Henaka ma ngaia ki pe matarotaro mataro me ki bungibungi. Ngaia nga ka na ramata i tâtâ hagahu tangara na Isiraelita ma na mahuara i berarogata.
Na hatariana na gahua
11Na enoni i hataria na gahua, ngaia ki pe matarotaro surigi na tangiani gi pi. 12Ngaia ki hagamatarotaroa marena nga renia na ve ni hagamatarotaroha igê na oruta ma na pita na tangiana ma hemuri ki kahu matarotaro aporo. Manga vi ngaia ma ki pe katokato vikana igê na tangiani ngegana, ngaia ki ama ni pe matarotaro nga. 13Na enoni i hataria na gahua ma ki pe hagamatarotaroa marena, ngaia ki ama ni pe matarotaro nga, suria na ve ni hagamatarotaroha ki pe gogo huria. Vikana ngaia ki hagaerasia na ruma na gahu apuna iana na Araha ma ki hato tenira na kariana na Araha.
14Manga ta na enoni ma ki me i rarona na ruma na gahu, na anima na enoni i oga igê matena i me na enoni ngekana se i bêbanu me, ngaia ki pe matarotaro surigi na tangiani gi pi. 15Na ara ni pi ma na apira i rarona na ruma na gahu ngekana ma ka pe tonga na bubuhini, ngaigi nogani ka pe matarotaro. 16Manga na enoni ma ki hataria na gahuana na enoni ga nahuia ki me se i me suri parongana i metara, se na enoni i hataria na surina na enoni i me se na anoanona, ngaia ki pe matarotaro surigi na tangiani gi pi.
17Tanga na hagamatarotaroana ga toregi tani na rahugana na puruka memera, ga bani sungia tanga na bonoteniha ni tasi, ka nakagi igê na apira ma ka karangia na ve marava henia. 18Igê na tarana hagenago ta na enoni i matarotaro ki tavoa nga na kere arana na apinige na hisope, ki anumia igê na ve ma ki kamusia na ruma na gahu henigi na ara ni marâ igê ma henira na enoni hato ga oga i rarona igê na matena ngekana. Igê na ruata na tarana na enoni i matarotaro ki kamusia nga na enoni i hataria na surina na enoni i me se na gahuana se na anoanona renia na ve. 19Igê na oruta ma na pita na tangiana na enoni i matarotaro ki kamusia nga na enoni i pe matarotaro renia na ve. Igê na pita na tangiana ngaia ki hagamatarotaroa nga na mane, hanana i matarotaro aporo, matena i susu na arito, i murina i tananigi hato na gahu iana ma ki karangia na ve huria marena.
20Na enoni i pe matarotaro ma ki pe hagamatarotaroa marena, ngaia ki ama ni pe matarotaroa nga, suria na ve ni hagamatarotaroana ki pe gogo huria. Tahema ngaia ki hagaerasia na ruma na gahu apuna iana na Araha ma ki hato tenira na kariana God. 21Mu marupea nga na ramata ngekana tare ki bê ki arâ. Na enoni i tahusigenia na ve ni hagamatarotaroha, ngaia ki tananigi nga nogana na gahu iana. Na enoni i hataria na ve ngekana, ngaia ki pe matarotaro mataro me ki bungibungi. 22Na anima na marâ na enoni i pe matarotaro i hataria, ngaia ki pe matarotaro nogana, ma na enoni i hataria hemuri ngaia ki pe matarotaro nogana mataro me ki bungibungi.
Okuqokiwe okwamanje:
TOMAHA NINUNI 19: KCB
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2011 Bible Society of the South Pacific