Start 1
1
God Make Da World
1Da time wen eryting wen start, God make da sky an da world. 2Da world come so no mo notting inside, no mo shape notting. On top da wild ocean dat cova eryting, neva had light notting. Ony had God Spirit dea, moving aroun ova da watta.
Day Numba One
3 #
2Cor 4:6
Den God tell, “I like light fo shine!” an da light start fo shine. 4God see how good da light. Den he put da light on one side, an da dark on da odda side. 5Da light time, he give um da name “Day time.” Da dark time, he give um da name “Nite time.” So, had da nite time an da day time, az day numba one.
Day Numba Two
6 #
2Pet 3:5
Den God tell, “I like get someting inside da middo fo no let da watta up dea an da watta undaneat come togedda!” 7An dass wat God do. God make someting fo no let da watta up dea an da watta undaneat come togedda. 8Da ting inside da middo, God give um da name “Da Sky.” Had da nite time an da day time, az day numba two.
Day Numba Three
9Den God tell, “I like da watta unda da sky come togedda one place, so dat get dry land!” An dass wat God wen do. 10Da dry groun, God give um da name “Land,” an da watta dat wen come togedda one side, he give um da name “Ocean.” God look da dry groun an da ocean, an he tell, “Real, real good, all dat!”
11Den God tell, “I like da land get all diffren kine plants! Da kine plants dat get seed, an da kine trees dat get fruits wit da seed inside, eryting!” An dass wat God do. 12So da land get all diffren kine plants, da kine plants dat get seed, an da kine trees dat get fruits wit da seed inside, eryting. An God look da plants, an he tell, “Real, real good, all dat!” 13Had da nite time an da day time, az day numba three.
Day Numba Four
14Den God tell, “I like put lights up dea inside da sky, da sun an moon an stars! Dass fo make da day time diffren den da nite time. Dass fo show da parts a da year fo do tings, an da days an da years. 15I like get lights up dea inside da sky fo shine light all ova da world!” An dass wat God wen do. 16God make da two big lights. Da big light, he make um fo be da main one day time, an da odda light, he make um fo be da main one nite time. 17God put da lights up dea inside da sky fo shine light on top da groun, 18day time an nite time, an fo make da light an da dark diffren. An God look da day an da nite, an he tell, “Real, real good, all dat!” 19Had da nite time an da day time, az day numba four.
Day Numba Five
20Den God tell, “Inside da watta, I like get choke diffren kine tings dat live dea! Up inside da sky, I like get plenny bird an all kine tings dat fly up ova da groun!” 21God make all da big kine fish an odda kine tings dat live inside da ocean, an choke plenny small kine fish an odda kine tings dat move aroun inside da watta, an all kine birds an bugs wit wings. An God look da tings inside da watta an da tings dat fly, an he tell, “Real, real good, all dat!” 22Den God tell da fish an birds an all da odda kine life, “I give you da powa fo you do eryting I wen make you fo do. So, I like you get plenny bebes, an fill up da ocean wit um. You birds too, I like you fo do da same ting an fill up da world!” 23Had da nite time an da day time, az day numba five.
Day Numba Six
24Den God tell, “I like da land get all kine diffren tings! da animals dat live wit peopo, an da small kine animals, an da wild animals.” An dass wat wen happen. 25God make um all: all kine wild animals, an all kine animals dat live wit peopo, an all da small kine animals dat run aroun on top da groun. An God look da animals, an he tell, “Real, real good, all dat!”
26 #
1Cor 11:7
Den God tell, “Now, I like make peopo. I like dem be jalike me, jalike one copy. Dey goin be in charge a eryting: da fish inside da ocean, da birds inside da sky, da animals, all da land, an all da small kine animals dat go aroun on top da groun.” 27#Start 5:1-2#Matt 19:4; Mark 10:6; James 3:9So God make da peopo, same same jalike one copy a him. He make guy kine an wahine kine. 28Den God tell um, “I give you guys da powa fo you do eryting I wen make you fo do. So, born plenny bebes, an fill up da world wit um, an take ova! You guys, in charge a da fish inside da ocean, an da birds inside da sky, an all da animals dat move aroun on top da groun.”
29An God tell dis too: “You know wat? I give you guys all da plants all ova da world dat make seed, an all da trees dat make fruits wit da seed inside. Dass fo you guys eat. 30An fo all da wild animals, an fo all da birds inside da sky, an fo all da animals moving aroun on top da groun—eryting dat stay alive, I give dem all da grasses an odda kine green plants fo dea food.” An dass wat God wen do.
31God look eryting he wen make, an he tell, “Real, real good, all dat!” An had da nite time an da day time, az day numba six.
Okuqokiwe okwamanje:
Start 1: HPB
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
©2020 Hawaii Pidgin Bible Ministries
hawaiipidginbible.org
Funda kabanzi mayelana ne Hawaii Pidgin Bible