Ad’u Tinda 2
2
1Ni hina ba, Alona mi dap akulod’a kandagad’a kahle suma kuruzina pet. 2Ata yima Alona mi dap vun sun mama dapma, mi tuk tam kur bur ma kid’iziyana yam sun mam mba mi lata pet. 3Alona mi b’e vunam yam bur ma kid’iziyana, mi tinim iram vamu, kayam mam tuk tam yam sun mam mba mi lata pet. 4Wana nad’u tinda hakulod’a kandagad’id’a kid’a Alona mi lazid’a.
Adam ki Ef a nga kur Eden
Ata yima Ma didina Alona mi landagad’a kakulod’ina, 5agu tu pî mi nga kat ti, asu tu pî mi deî nga kat tuo mi, kayam Ma didina Alona mi se nga alona yam andagad’a d’uo tua, sama zum andagad’a nga d’uo tua mi. 6Vana nga mi d’us akulo yam andagad’a d’igi andosâ na, mi lab’at yad’u.
7Ata yima Ma didina Alona mi min sana kandaga d’a gugud’upina, mi fom muzugam ma he arid’ina atchinamu, sa máma mi mbut sama arina.
8Bugola, Ma didina Alona mi tin asinena kur Eden abo ma yorogona, mi tin sama mi luma kuru. 9Ma didina Alona mi deî andjaf agu ma lara ge pet ata yi máma; djivid’a á gola, djivid’a á ted’a mi. Mi deî agu ma he arid’a aduk asinena, kagu ma tak á we djivid’a ki tchod’ina mi.
10Aluma mi tcholï kur Eden, nga mi lap ahle suma hur asinenina. Bugol Eden, mi wal ad’u fid’i. 11Alum ma avo’â a yum ala Pison; ni ma ngui ambas sa Havila d’a lora nga kuad’a. 12Lora yam ambas ndatid’a ti djivid’a heî; bedeliyum#2.12 bedeliyum: Nala, Mbul ma his ma afufuî ma guzum ngolâ heîna. kahina onisa#2.12 onisa: Nala, Ahina d’a guzut kal teglesa. a nga kua mi. 13Alum ma mbàna a yum ala Gihon, ni ma ngui ambas sa Kus-sina. 14Alum ma hindina a yum ala Tigre, nga mi djang iram abo ma yorogona hambas sa Asiri-d’a. Alum ma fid’ina a yum ala Efrat.
15Wani Ma didina Alona mi hle sa máma, mi tinim kur asine ma Eden-na, kayam mi zumumu, mi ngomom mi. 16Ma didina Alona mi hum vuna ala: Ang ndak á te vud’agu ma lara ge pet ma nga kur asinenina, 17wani ang te vud’agu ma tak we djivid’a ki tchod’ina d’i. Bur ma ang le tum wa ni, ang mba mid’a.
18Wani Ma didina Alona mi de kurum ala: Nga djivid’a tala sana mi kak vam tu d’a d’i. An nga ni lum mba ndjun nda hle tat d’igi mam na d’a.
19Ma didina Alona mi yo andagad’a, mi lazureina, ambureina kaluweina pet, mi mbazi mi sa máma á we mam mba mi yazi nana ge, kayam ahle suma arina pet a fe simi ma sa máma mba mi tinizizina. 20Sa máma mi tin simiyê d’uwarâ, aluweina, ambureina kazureina pet. Wani mi fe nga vama mi hle tam d’igi mam na á ndjunuma nga d’i.
21Ma didina Alona mi bur sa máma sen ma ngolâ, mi pat asok ma pepeyema, mi vrak hliuna balumu. 22Ma didina Alona mi mbut asok ma mam pad’am máma atchad’a, mi mbat mi sa máma. 23Sa máma mi dala: Ahâ! Wana ni vama hle tam d’igi an na na, naso’â hasogona, ni hliuna hi hliwina, an mba ni yat ala Atchad’a#2.23 Atchad’a: Ki vun Hebre-na a yat ala Isa. Adam mi tinit simiyêt hina, kayam Alona mi pad’at ni ata sana., kayam Alona mi pad’at ni ata sana#2.23 sana: Ki vun Hebre-na a yi mandjufâ ala Is..
24Kayam ndata, sana mba mi ar abum kasumu, mba mi reî kamamba, azi djak a mba mbut ni hliu ma tuna.
25Sa máma kamamba djak a ni gandilad’a; azi kamamba djak a we nga zulona d’uo mi.
Okuqokiwe okwamanje:
Ad’u Tinda 2: BA
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Azumeina Bible © Alliance Biblique du Tchad, 1999.