LUKAS 24
24
Yesus numpak mudip cen patai
(Un te neng Matius 28.1-10; Markus 16.1-8; Yaya 20.1-10)
1Dalau sepurat dema mempam Tau Mingku, sulo ketai leto dina kaʹ liang, ngkin kudaʹ naʹan kemanyan iaʹ ban ida petenup didai. 2Tai re abeʹ kidi, ina re taʹan batu kep paʹ liang ina lepa ban lubit. 3Penco re tai kedalem, ngan abeʹ patai Tuhan Yesus ban un ne. 4Dalau re maru tekaʹ pekina, belekaʹ idi dua usa laki diaʹ un sapai menyerening diseʹ nekejeng dudo ida. 5Tai takut laleʹ tekaʹ leto dina, sulo re muʹup kaʹ tanaʹ dalau laki dua dina pisiu ida, un dau re: “Moʹ inu hem nai mita iaʹ mudip kukoʹ diaʹ matai tupe? 6Abeʹ e un kini laʹa. Lepa ne ia nai beteʹ mudip. Petawai ne dau ue badaʹ mikem dalau ue un kaʹ Galilia are, ngan un dau ue are: 7‘Anak Sio ini atek dulu ke mencai kaʹ ujoʹ kelunan diaʹ sangan kuʹun penyalaʹ. Ida ke napek keʹ neng kayu tecek ʹo. Ngan neng tau iaʹ ketelu ue, kenai heʹ beteʹ mudip pelaʹa.’ ”
8Tegoʹ ina lete, leto dina petawai dau tiraʹ Yesus are. 9Penco tai leto dina uleʹ cen liang ina, sulo re badaʹ ketoʹ puyan ina me diaʹ puloʹ ca usa diaʹ ban bayaʹ katuk Yesus are, ngan pekina pe me diaʹ ca laʹa. 10Un pe leto dina, Mariam Madalina, ngan Yuana, ngan Mariam ueʹ Yakup. Un pe leto diaʹ ca iaʹ pemung ngan nte. Mung nte badaʹ puyan ina me diaʹ lawa Tuhan didai. 11Kun diaʹ lawa Tuhan dina pekimet dau tiraʹ leto dina, abeʹ e lan kaʹ baʹan nte. Penco re abeʹ un ngelan dau leto dina. 12Un sepuʹo belekaʹ kenai Peterus beteʹ, sulo tai ie ngasa kaʹ liang, penco ho muʹup naʹat kedalem. Abeʹ un ca inu ia taʹan, bang apeʹ bino usa ha tuaʹ le. Uʹo ina nai ie uleʹ kaʹ amin, ngan salam tekaʹ a neng puyan iaʹ lepa nuyan ina.
Pejahi tai kaʹ lepoʹ Imaus
(Un te neng Markus 16.12-13)
13Neng tau ina lete un dua usa mida diaʹ bayaʹ katuk Yesus are, tai masat kaʹ ca lepoʹ iaʹ ngadan ne Imaus, kihoʹ kihoʹ asat telu jam coʹ o cen Yerusalim. 14Pisiu mentung le ida dua neng toʹ puyan iaʹ ban lepa nuyan dalau idai are. 15Dalau re dua pata pata dau neng isiu re dua, belekaʹ un en Yesus nai nyeng pata ngan nte dua, sulo re kejahi masat. 16Naʹ pe ida dua taʹan ia, un sepuʹo Allah ngelipau taʹat de ngetisen ia. 17Kun Yesus lemutu ida dua: “Inu iaʹ ikem dua pisiu muʹo tai puli dau mentung ngkem dua masat ini tupe?”
Sulo re dua pekenaʹ, ngan nekejeng ngan meba seʹ. 18Un dau ca usa mida dua iaʹ ngadan ne Kelupas, kun dau ue: “Masaʹ bang ikoʹ tengen le kaʹ Yerusalim iaʹ turan dau neng puyan iaʹ lepa nuyan kina laho ini are?”
19Un dau Yesus neng ida: “Puyan inu ne tupe?”
Un dau re dua mipa ia: “Puyan neng Yesus lepoʹ Nasarit idai. Ban ca pegawa bioʹ laki ina, ngan bioʹ ban penyukat te neng tiraʹ a, pekina pe neng pemuyan ne, sihoʹ neng penaʹat Allah, ngan pekina pe neng kelunan. 20Un sepuʹo, un ban diaʹ detaʹu lataʹ ngan diaʹ pengencam lepoʹ ilu cuk dulu dakep ia, ngan lematai ia neng kayu tecek. 21Cen kena un kaʹ tebelum meʹ ia iaʹ ke nakau lepoʹ Israil cen mung jaʹat de. Un sepuʹo tau ini ne tai sukung ketelu tau ue cen ʹo puyan ina. 22Pincaʹ pe tau ini, un pe palai leto diaʹ ngan meʹ ngecet dau neng ameʹ. Tau ini lete, dalau kenai sepurat dema, ban tai re naʹat liang nge. 23Abeʹ de taʹan patai ie ina kina. Nai re ngeliwet badaʹ a iaʹ ida ban taʹan neng penaʹat de, iaʹ ina melikat iaʹ kuma ha mudip ne ia. 24Sulo ketai kudaʹ usa diaʹ ngan meʹ kaʹ liang. Ida taʹan lan koʹ baʹan dau leto dina are. Un sepuʹo abeʹ de taʹan Yesus.”
25Sulo dau Yesus pisiu ida dua: “Adeʹ tepa laleʹ ban kimet cem. Duʹai kimet cem ngelan mung dau tiraʹ pegawa Tuhan cen kena are. 26Moʹ abeʹ tekep lete Keristus iaʹ ngkang pungu udip ke sihoʹ tuyen ina tupe? Ina le ia kenai luhaʹ kedalem serema peniga ha.” 27Sulo Yesus badaʹ mida dua mung dau katuk iaʹ sihoʹ neng ia tengen dalem isiu Kitap Tuhan. Kun ne nading nge cen Kitap Musa ngan mung surat pegawa ne.
28Dalau ina nyeng le laʹa ida ke abeʹ kaʹ lepoʹ Imaus, kukoʹ ke ketai re. Un seʹ puyan Yesus ubaʹ seʹ ketai ie penco lapa ida dua. 29Kun nte dua mapo ia, kuma: “Ngelineʹ ne ngan meʹ baʹan le, moʹ tau lenca ketai mentem ne ini.” Kun ne ngelineʹ neng amin ina pemung ngan nte dua. 30Pemung madung le Yesus ngan nte dua kena re ke uman, kun ne alaʹ ca luʹung ruti, ngan nyuaʹ tiga saheʹ palaʹ Allah. Sulo ho piding nge, ngan naʹ a mida. 31Dalau ina lete, pesik ne mata re dua ngetisen Yesus. Belekaʹ nyahin tai ie abeʹ un pelaʹa. 32Un dau re enng ida dua selepeʹ: “Meto nepahang tekaʹ dalem kimet le, dalau ue pisiu tua ngalang janan are, dalau ue badaʹ sen isiu Kitap are.”
33Laho ina lete nai re dua beteʹ ketai ngeliwet kaʹ Yerusalim, penco re taʹan diaʹ puloʹ ca usa diaʹ bayaʹ katuk Tuhan didai lepa ban pempun pemung ngan nte diaʹ ca. 34Un dau re: “Atek lan laleʹ le, nai Tuhan numpak mudip. Simun iaʹ ban taʹan ia.”
35Kun nte dua badaʹ pelaʹa puyan iaʹ ban nuyan jinan tai re dua kaʹ Imaus are, ngan kumpin ban tai re dua tisen Yesus tegoʹ o miding ruti ina.
Yesus nai luhaʹ kata diaʹ bayaʹ katuk ke
(Un te neng Matius 28.16-20; Markus 16.14-18; Yaya 20.19-23; Pemuyan Lawa Injil 1.6-8)
36Dalau re pisiu pisiu pekina, belekaʹ un ne Yesus nekejeng neng beluaʹ ida, sulo dau ue mida: “Tadan ne ikem.”
37Bisau ngan takut tekaʹ de, moʹ de kuma ha ca bali iaʹ ida taʹan ina. 38Dau Yesus neng ida: “Moʹ inu caʹ meba seʹ kem tupe? Ngan inu caʹ babak seʹ kimet cem tupe? 39Naʹat ne ujoʹ keʹ, ngan taket ceʹ. Akeʹ lete ini. Ngkang ne akeʹ, ngan naʹat diseʹ keʹ, moʹ bali abeʹ de un sin ngan tulang koʹ baʹan ncem taʹan seʹ keʹ ne.”
40Mentung nge pekina dau, kun ne peluhaʹ ujoʹ o ngan taket te mida. 41Abeʹ un tekaʹ de ke ngelan ne moʹ de bangen laleʹ, ngan muʹo tekaʹ tawai re. Kun Yesus lemutu ida: “Un ncem mampin penguman kini mo?” 42Kun nte naʹ ca peʹ atuk saga mia. 43Sulo Yesus alaʹ a, ngan uman ne kata ida.
44Uʹo ina un dau Yesus mida: “Puyan ini lete iaʹ akeʹ badaʹ mikem dalau heʹ pemung ngan ncem are. Pekini dau heʹ are: Ketoʹ tiraʹ iaʹ ida badaʹ ke sihoʹ akeʹ dalem Katuk Adet Musa, pekina pe dalem Kitap Pegawa Tuhan, pekina pe dalem Kitap Kentau Masmur, atek ke palup mung.”
45Penco ho mesik penisen nte apan nte ke tisen neng isiu Kitap Tuhan. 46Kun dau ue neng ida: “Ini le tiraʹ iaʹ un dalem Kitap: Atek ke sihoʹ tuyen lete Keristus iaʹ ngkang pungu udip. Uʹo ina kenai ie numpak mudip cen patai ie neng ketelu tau ue. 47Moʹ kuʹun ngadan ne, atek le ke menco katuk neng puyan nesen ngan nyepuleʹ kimet, pekina pe neng puyan sau penyalaʹ me ketoʹ lepoʹ kusun tanaʹ ne, tading nge cen Yerusalim. 48Ikem ne diaʹ ke badaʹ ban ncem tugen kaʹ neng toʹ puyan dina. 49Ia iaʹ Amai heʹ lepa petuket ke naʹ mikem are, akeʹ tengen ke cuk ia nai mesun neng ikem ʹo. Un sepuʹo pekena ne ikem dalem lepoʹ ini, pa kenai penyukat cen surga mesun neng ikem ʹo.”
Yesus tai pejung kaʹ surga
(Un te neng Markus 16.19-20; Pemuyan Lawa Injil 1.9-11)
50Abeʹ majan uʹo ina, tai kun Yesus ngkin ida kaʹ awang cen lepoʹ Yerusalim, tai pabeʹ kaʹ lepoʹ Bitani. Kina Yesus mejung ujoʹ o naʹ peniga mida. 51Dalau ue naʹ peniga mida, ina tai ie pejung mentung tai kaʹ surga. 52Kun nte nyelama palaʹ ia, ngan sulo ketai re ngeliwet kaʹ Yerusalim ngan bangen laleʹ tekaʹ tawai re. 53Lemuto tai re kedalem Umaʹ Palan Allah, ngan nyuaʹ tiga saheʹ de palaʹ Allah.
Okuqokiwe okwamanje:
LUKAS 24: KNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Kenyah New Testament © Bible Society of Malaysia, 1984.