Gênesis 1
1
Deusũ mai hirabi damiwanikiaki, na hãtxarã
1Deusũ nai inũ mai dami wakĩ eska wakĩ taewanikiaki. 2Mai hayariama hawa hayamahairakẽ Deusũ uiã dasibi henewãs uke merã dasibi meshui keyua dakakẽ habiatiãri Deusũ Yushĩ Pepa hene mamakishũ tũkash akaya
3Deusũ shinãkĩ yuikĩ:
“Hau shabanũwẽ”, aka ma hawaira shaba inikiaki. 4-5Haska watã Deusũ uiã shaba pehaira dakakẽ hanushũ meshuri pashkatã ha dabe kenakĩ: “Shabaki”, ashũ meshuri kenakĩ: “Yameki”, atã ha dukũ 1 dia shabatiã hati Deusũ damiwakĩ taewanikiaki.
6-7Ha katxu Deusũ damiwakĩ ana yuikĩ:
“Natukã watã hene pashkakĩ meribi watã hau haskanũwẽ”, anikiaki. Deusũ haska watã natukã wakĩ heneri pashkatã haska washũ meribi natukã namã hene washũ manaũriari nai anuri hene warianikiaki. 8Haska washũ natukã Deusũ kenakĩ:
“Naiki”, atã haska wakĩ 2 dia shaba Deusũ damiwakĩ taewanikiaki.
9Haska washĩshũ Deusũ ana yuikĩ:
“Nai namanu hau henẽ itxayunũwẽ, mai metui uinubisirã”, aka nai namanua hene hanus itxai keyukẽ 10mai metu yẽkẽ dakakẽ Deusũ ha kenakĩ:
“Maiki”, ashũ heneri itxa Deusũ kenakĩ: “Henewãki”, ashũ uiã pekẽ 11Deusũ ana yuikĩ:
“Basi inũ yunu hesheya inũ hi hawẽ bimi hesheya ha mai metu anu hau dasibi benei keyunũwẽ”, ashũ 12haska wa maĩ basi benemakĩ yunu hesheya bestibu benemakĩ hi bestibu bimi hesheya benemakĩ dasibi ma benemakẽ Deusũ uiã pekẽ 13haska wakĩ 3 dia shaba Deusũ damiwakĩ taewanikiaki.
14Haska dayakũkaĩkĩ Deusũ ana yuikĩ:
“Shaba inũ meshu tari meribi pashkakĩ nai anu hau txashati inũwẽ, shaba inũ, yame inũ, bari inũ, betsa betsapatiã tanakĩ unãmatirã. 15Nai anua mai hirabi anu txashapakeshãkanikiki”, ishũ 16Deusũ txashati ewapahaira dabe, bari inũ, ushe inũ, bishi itxapa damiwashũ ewapatũ hau shaba duawanunã, hatiumatũ hau yame duawanunã, 17-18mai hirabi anu txashapakemakĩ shaba duawamakĩ yame duawamakĩ shaba inũ yame tari shekakĩ meribi wakĩ nai anu Deusũ haska hanakeakeshũ uiã pekẽ 19haska wakĩ 4 dia shaba Deusũ damiwakĩ taewanikiaki.
20Haska dayakũkaĩkĩ Deusũ hene yunukĩ:
“Habu hene merã hiweabũ dasibi damiwakĩ ha hamẽ imashanũwẽ”, iwanã, “Nai natukã anuari manaũriabu peiyaburi hau nuyabaunũbũwẽ”, ishũ 21hene merã hiweaburi ewapabu bestibu damiwakĩ baka betsa betsapa bestibu damiwakĩ peiyabu betsa betsapa bestibu damiwakĩ haska washũ uiã pekẽ 22pepawakĩ Deusũ hatu yunukĩ:
“Bake wakĩ hau pa wapakeshanũbũwẽ. Hene tibi merã hau matashanũbũwẽ. Mai hirabi anu peiyabu betsa betsapari hau papakeshanũbũwẽ”, hatu watã 235 dia shaba damiwai dayanikiaki, Deusrã.
24Haska wabaishĩshũ Deusũ mai yunukĩ:
“Hamapai betsa betsapa bestibu maĩ hau habu damiwayunũwẽ, piti yuinaka inũ, pitibuma yuinaka inũ, ina wati yuinaka inũ, ina watima yuinaka inũ, taeyabu inũ, tae hayabumarã”, 25haska piti yuinaka inũ pitibuma yuinaka Deusũ damiwashũ dasibi uiã pekẽ 26Deusũ ana yuikĩ: “Yurabu damiwanãwẽ, nuku itsarã, nukũ yushĩ keska wakinã, mai hirabi anu baka inũ, piti yuinaka inũ, pitibuma yuinaka hau hatũ ibu washanũbunã”, ishũ 27ha itsa huni inũ aĩbu hatu damiwashũ 28hatu duawakĩ yunukĩ yuikĩ: “Matũ bakebu bawakĩ hatu pa wapakeshãkãwẽ. Hiweakeakebaũkĩ mai hirabi anu matuna wakĩ ibu wai shanẽ ibupakeshãkãwẽ, hene anu baka inũ, manaũria peiyabu inũ, yuinaka dasibi maĩ sharaibu dikabi ibu wakinã”, iwanã, 29“Uiã, yunu hesheya inũ hi bimi hesheya mai hirabi anu ẽ matu inaiĩ, matũ pitirã. 30Hamẽ yuinaka dasibi hiweaibu pubẽ inũ pubẽbumarã, peiyabu inũ maĩ sharaibu dasibi ni mashu inũ ni bimi ẽ hatu inaiĩ, dasibi yuinakapã pitirã”, haska washũ 31dasibi ma damiwa uiã pehairakẽ 6 dia shaba dayanikiaki, Deusrã.
Tans Gekies:
Gênesis 1: cbsBR
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.