Matta 2
2
Yesu Mama
1Aɓo ma Yesu n Baitalami nu, n. Yahudiya kni, dna n Hirudus begyi-sa. Nsahi, aɓeyekpeyi ɓai kun n nyipyei kpe bwa (akpasu-wyekayi), ɓaɓe Urushelima ɓai nyaɓo, 2“A Yahudawayi esu gni-na nna ma nyia? Ntuge yi ku gye owo kpasu n nyipyeyi kpe bwa, ya ɓe ya ga wo mwa-mwa nu.” 3Ɓenya yi konu, kwa dami nsu Hiridus yi har Urushelima vinya ai wo aɓedeye gbogbo. 4Wa ye a Yahudawayi adini a tukwo da zhi. Wa nya ɓa ge, “Anabi ɓo ku aba wu na ɓa ma Masifu?” 5Ɓa gna, “E, N Baitalami nu, ntu ge enya nu anabi Mika ɓei ka. 6‘O ezhi ɓiyi Baitalami nya, ho to zhin ezhi wyegbaci nya nu dna n Yahudan, ntu ge Gwamna ɓa gmi n ho nu wa gyi ebe tu n maza tukwo, a Israilayi’.”
7Hiridus a pmi wa tnu ga aɓeye-kpei fya ge ɓa ɓe ɓa gye wo, wa nya ɓa esa ɓo nu ɓa gye kpasu cei. Wa gna ɓa ge, 8“Fye lo Baitalami fye zan ebi shin. N fya wo gye wye, fya ɓe fya gna mi ntu ge ma lo mi ga wo mwa-mwa ce.”
9Shi a ɓo ku aɓo zo ɓa nya ɓa ku ka. Ho gye! Kpasu la je gmitu, n wu Baitalami. 10A daɓa n mwa! 11Shi ɓa ɓei lo nyakun mi ɓa gye eɓi n wo ʼya yi Maryamu, ɓa ya zhi ɓa ga wo mwa-mwa. Ɓa gu oɓa nyabwa ya, ɓa ga wo cauta, zinali, n tulale yi ɓedo n emi sundayi yi. 12Esa ɓa ɓo jeze lo ɓa kni, to ɓa lo Urushelima ɓa ga esu Hiridus nabarim, ntu ge Shekwoyi ɓo ku wu ɓa dna ena ge ɓa lo n zokwo do yi.
13Shi ɓa ɓo ku lo, malaika Dagayi nya wa ɓe Yusufu aba dna ena nu, wa gna wo, “Laka ha la eɓi n wo ʼya yi ha busi lo Masar. Ho la dna bwayi har esa nmiɓa gna ho ge ho jeze ɓe, ntu ge esu Hiridus ye lo wa wu eɓi ye.” 14Dna sukwoyi wa laka wa la Maryamu ɓedo n ɓei yi ɓa lo Masar. 15Ɓa fi n bwayi har Hirudus wa fi. Ɓo Dagayi ɓei da n anabi gbe, kwa ku nu, nge, “Ma yi Mi Nugun n Masar.”
16Shi Hiridus ɓo gye aɓeye-kpei to vi wo ɓedam, wa gyi minagyi. Wa tnu a soja, ɓa lo Baitalami nna zhi ɓiyi yi nge ɓa wu eɓi doho dohoyi n wo ʼye ɓei ku gun aba koi ɓe kni. Wo ɓo dna kwo ngye shi aɓeye-kpeyi ɓo gna wo ge ɓa ɓo ya kpasi gye ce yi nu. 17Hirudus hali nukwoyi deye ɓo ku ɓo nu n anabi Irimiya ɓeida,
18“A wo begye n Rama ebwi nya n bugba wun dnagmayi yi, Rahila woi ci bwi ntu wo aɓi ɓo, to woi wo atnazhin ntu ge ɓa ku fi.”
19Shi Hirudus ɓo la fi, malaika Dagayi nya wa ɓe Yusufu aba n Masar dna ena nu, 20Wa gna wo, “Laka ha la eɓi nwo ʼya yi ɓa je ze lo Israila kni, ntu ge aza n ɓa ɓo ye ɓa wu eɓi ye nyi, ɓa ku fi.”
21Wa laka wa la eɓi n wo ʼya yi wa jeze lo a Israila yi ʼkni. 22Amma shi wo ɓo wo ge Akilos nu gyibe tu wo dada-Hirudus, wa wo dna to wa ye wa je lo ɓo m. Wa gwo pmagna n na nu, wa lo Galili ʼkni. 23Wa lo wa sase n ʼzhi ai yi kwo Nazarati. Deye kwa nu anabi ɓeda nge “A ɓei yi wo ge Nazarati yi.”
Tans Gekies:
Matta 2: GAW
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.