Joannostir 9
9
Džeļ, 9.
1Te javindoi, iedikša mānušes, korores ločibnastir.
2Sikļaibnangīre Leskīre phučne Lestir: Ravvi! kon grehidža, jov vai phūredīra leskīre, so locija kororo?
3Iisusos otphendža: nagrehindža ni jov ni pūredīra leskīre, ne dava vašo dova, sobi pe leske javen Davleskīre butča.
4Mange čhebi kērav butča Doleskīre Kon Man bičadža, poskil oščo isi dīves; javela rat, kedi nikon našti kērel.
5Poskil Me ano svetos, Me švatluma svetoske.
6Pheni dava, Jov čhungardija pe phu, kerdža makhibnaskīro čhungardipnastir, te pomakša makhibnaskiresa jakha kokoreske,
7Te phendža leske: dža, nomortut ano moribnaskiro Siloam (so značini: bičādo), Jov gija, te nomordžapes, te javdža dikhibnaske jakhensa.
8Doi pašatune te kon dikhle vāgo, so jov isis kororo, rakirdle: hobi dava nāni dova, savo bešelas te mangelas žaļuma?
9Vāvīra rakirdle: dava jov. Ne vāvīra: dičola pe leske: Jov phendža: dava me.
10Togi phučle lestir: sir otkerdepen tuke jakha?
11Jov phendža ano otpheniben: mānuš, Sajes dena goli Iisusos, kerdža makhibnaskīro, makša mīre jakha, te phendža mange: dža po moribnaskīro Siloam te nomortut. Me gijom, nomordžoman te otkerdžapes mange dikhiben.
12Togi phendle leske; kai Jov? Jov otphendža: nadžinav.
13Lidžīne doles savo isis kororo ko fariseji.
14Dova isis kurke, kedi Iisusos kerdža makhibnaskīro te otkerdža leske jakha.
15Phučle lestir fariseji nin, sir jov lija dikhel. Jov phendža lenge: makhibnaskīro čhudža Jov pe mīre jakha, te me nomordžoman te dikhava.
16Togi vār farisejendir rakirdle: nāni Davlestir da mānuš, vašo dova so narakhela kurko. Vāvira rakirdle: sir vašti grehviļo mānuš kērel dasaij džīvi? te isis maškir lenge gola.
17Noko rakirna kororeske: tu so phenesa Lestir, vašo dova so Jov otkerdža tuke jakha? Jov phendža: dava prorokos.
18Togi Judi napačandīne, so Jov isis kororo te lija dikhel, poskil nakherdle da dikhibnaskīreske phūredīren.
19Te phučle lendir: hobi dava tumāro čhāvo, sajestir tume rakirna, so ločija kororo? sir že jov kana dikhela?
20Leskīre phūredīra phendle lenge ano otpheniben: me džinas, so da čhāvo isi māro te so jov ločija kororo:
21Ne sir kana dikhela, na džinas, vaj kon otkerdža leske jakha, me nadžinas. Kokoro ano pherde berša; kokorestir phučen; mephenel kokoro pestir.
22Jake otphendle phūredīra leskīre, vašo dova so strahandīne Judendir; hai Judi zarakirdepen uže, kon dodžinela Les Hristoske Doles vičhinen sinogogatir.
23Vaša dava phūredīra leskīre phendle: jov ano pherde berša; kokorestir phūčen.
24Te jake vār molos dīne goli mānuses, savo isis kororo, te phendle leske: de Davleske slava; me džinas, so do mānuš grehengīro.
25Jov phendža lenge ano otpheniben: vai Jov grehengīro, nadžinav; dova feņu džīnav, so me isomas kororo, ne kana dikhava.
26Noko phučle lestir: so kērdža Jov tusa? sir otkerdža tīre jakha?
27Otphendža lenge: me uže phendžom tumenge, te tume nakandīne; so oščo kamena šunen? te hobi tume kamena kēretumen Leske sikļaibnangīrenge?
28Togi jone les čhingardīne te phendle: tu Lesko sikļaibnangīro; ne me Moisejoskīre sikļaibnangīre.
29Me džinas sir Moisejosa rakirdža Dēvel; Dales nadžinas, karīg Jov.
30Mānuš sav lija dikhel phendža lenge ano otpheniben: dava isi dživos, sir tume nadžinen, kārig Jov, ne Jov otkērdža mange jakha.
31Ne me džinas, so grehengīren Dēvel našunela; ne kon rožini Davles te kērla Leskīri voļa, doles kandela.
32Ņigdi nasis šundlo, sobi kon otkērel jakha korore ločīneske.
33Keļi Jov najāl Davlestir, naštuvelas kērel niso.
34Phendle leske ano otpheniben: ano grehi tu sāro ločijan, te tu men sikļakiresa? te vitrādīne les avri.
35Iisusos, dolija šunel, so vitrādīne les avri, te ke lača les, phendža leske: tu pačasa an Davleske Čhāveske?
36Jov otphendža te rakirdža: ne kon Jov, Raija, sobi mange pačav an Leske?
37Iisusos phendža leske: te tu Les dikšan, te Jov tusa rakirla.
38Jov phendža: pačava, Raija! te poklonidžapes Leske.
39Te phendža Iisusos: po sendos javdžom Me an da svetos, sobi nadikhibnaskīre dikhen, ne dikhibnaskīre jačen korore.
40Kedi vār farisejendir šundle dava, saj isis Lesa, phendle Leske: hobi me nin korore.
41Iisusos phendža lenge: keļi tume javdlesis korore, togi pe tumenge najavdžasis grehos; ne sir tume rakirna, so dikhena, vašo dova grehos jačela pe tumenge.
Tans Gekies:
Joannostir 9: LET1933
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© British and Foreign Bible Society 1933, 2016
