1 Konings 10
10
Die koningin van Skeba kom na Salomo toe
(Ook 2 Kron 9:1-12)
1Die koningin van die land Skeba het gehoor dat die mense oor Salomo en oor die Here praat, en sy het gekom om te hoor of Salomo regtig so baie wysheid het. 2Sy het na Jerusalem gekom, en daar was baie mense saam met haar, ook kamele wat speserye en baie goud en duur edelstene gedra het. Sy het na Salomo toe gekom en sy het vir hom alles gevra wat sy wou vra. 3Koning Salomo het geweet hoe om alles te antwoord wat sy gevra het. Daar was nie een vraag wat vir hom te moeilik was nie. 4Toe die koningin van Skeba alles hoor wat hy sê en toe sy alles sien, was sy baie verbaas oor Salomo se wysheid. Sy het die tempel gesien wat hy gebou het, 5ook die kos op sy tafel en sy amptenare wat by die tafel sit, sy bediendes wat daar staan, die klere wat hulle aangetrek het, die manne wat wyn in die bekers gooi, en die brand-offer wat Salomo by die tempel offer. 6Sy het vir die koning gesê: “Ek het in my land gehoor van die dinge wat jy alles doen en ek het gehoor van jou wysheid. Dit is alles waar. 7Ek het dit nie geglo nie, maar nou het ek gekom en ek het dit self gesien. En regtig, ek het nog nie alles gehoor nie, ek het minder as die helfte gehoor. Jy is 'n wyse man. Die mense het vir my vertel dat jy ryk is, maar ek sien nou dat jy baie ryk is. 8Die manne wat vir jou werk en wat altyd by jou is, is gelukkige mense, want hulle kan luister na die wyse dinge wat jy sê. 9Ek prys jou God die Here wat so baie van jou hou dat Hy jou koning laat word het oor Israel, Hy is altyd lief vir die volk. Hy het jou koning laat word om reg te doen en regverdig te wees.”
10Die koningin van Skeba het vir koning Salomo 120 talente goud gegee en baie speserye en edelstene. Daar het nooit weer so baie speserye in die land gekom nie. 11Die skepe van koning Hiram wat goud in Ofir gaan haal het, het ook baie jenewerhout en edelstene saamgebring. 12Die koning het die jenewerhout gebruik om tralies te maak in die tempel en in die paleis en ook om liere en harpe te maak vir die mense wat sing. Daar het nooit weer jenewerhout in die land gekom wat so mooi was nie. Tot vandag toe het niemand weer hout gesien wat so mooi is nie. 13Koning Salomo het vir die koningin van Skeba alles gegee wat sy wou hê, hy het alles gegee, alles wat sy gevra het. Hy het ook nog ander presente vir haar gegee, presente wat hy self besluit het om vir haar te gee. Sy en haar amptenare het toe teruggegaan na haar land.
Salomo was ryk en belangrik
(Kyk ook 2 Kron 9:13-28)
14Salomo het elke jaar 666 talente goud gekry. 15Hy het ook nog goud gekry van die mense wat deur sy land gegaan het, en van die handelaars, en van al die konings van Arabië, en van die goewerneurs in die land Israel. 16Hy het 200 groot skilde laat maak. Hulle het 600 sikkels goud vir elke skild gebruik. 17Hy het ook 300 klein skilde laat maak. Hulle het drie mines goud vir elke skild gebruik. Die koning het die skilde in die houthuis gesit.
18Hy het ook 'n groot troon laat maak van ivoor en hy het dit laat toemaak met skoon goud. 19Die troon het ses trappe gehad en die kopstuk was agter rond. Langs altwee kante van die sitplek was armleunings waar die koning se arms kon rus, en daar was twee leeus langs die armleunings. 20Langs altwee kante van die ses trappe het twaalf leeus gestaan. Daar was nêrens in 'n ander land so 'n mooi troon nie.
21Al die bekers waaruit koning Salomo gedrink het, was van goud, en in die houthuis was al die bekers van fyn goud. In die tyd toe Salomo gelewe het, was silwer nie belangrik nie.
22Koning Salomo se skepe waarop die handelaars was, was op die see saam met die skepe van koning Hiram. Die skepe het elke drie jaar teruggekom. Die skepe was vol goud en silwer, ivoor, ape en bobbejane.
23Koning Salomo het ryker geword as al die konings van die aarde en hy het meer wysheid gehad as hulle. 24Mense het van oral gekom om vir Salomo te sien en om te luister na sy wysheid, die wysheid wat God vir hom gegee het. 25Die mense het almal presente saamgebring. Dit was silwergoed of goue goed of klere of wapens of speserye of perde of muile. Dit het elke jaar gebeur.
Salomo koop oorlogkarre en perde
(Kyk ook 2 Kron 1:14-17)
26Salomo het oorlogkarre en ryperde bymekaargemaak. Hy het 1 400 oorlogkarre en 12 000 ryperde gehad. Hy het party perde in die stede laat bly om die oorlogkarre te trek en hy het party perde by hom in Jerusalem laat bly. 27Die koning het so baie silwer gehad soos die klippe in Jerusalem en so baie sederhout soos die wildevyebome in die Laeveld. 28Salomo het perde uit Egipte en uit die land Kewe gekry. Sy handelaars het die perde in Kewe gaan koop. 29'n Oorlogkar van Egipte het 600 sikkels silwer gekos en 'n perd het 150 sikkels silwer gekos. Salomo het dit ook betaal vir die perde en oorlogkarre van die konings van die Hetiete en die Arameërs.
Tans Gekies:
1 Konings 10: ABA
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© Bybelgenootskap van Suid-Afrika 2007. Gebruik met toestemming. Alle regte voorbehou.