Yuel 3
3
Ebiere ikpe mme Idịd
# 3: Ke mme ikpañwed Hibru ewet Yu 3:1-21 nte Yu 4:1-21. 1“Ke mme usen ado ye ke ini ado,
ke idaha a-ami mmaamaana ñkappa uforo nnọ Yuda ye Yeruselem,
2ami ñyaakoono afịd mme idịd mbok itie keed,
ñnyʌñ mben ammọ nsuuhọ ndi ke Abedeñ Yehosafad.#3:2 Yehosafadawuọñọ ke Abọọñakpe ikpe;se ñko ke Yuel 3:12.
Do ke ami ndiidaaha ammọ ke ikpe,
ke abaña se ammọ ekenam ye udeeme mmi, ikọd mmi Isrel,
sia ammọ emaesuan ikọd mmi ke atu mme idịd,
enyʌñ ebakka isọñ mmi.
3Ammọ emaesịn afia enọ ikọd mmi,
enyʌñ enyam nditọ ideen esịn ke akpara;
ammọ enyam nditọ ibaan enyʌñ edat akʌk ekama enwọñ ukọd.
4“Idahami nsoo ke ndufo enie edinam ye ami, Tai ye Sidọn ye afịd ndufo mbon Filistia? Ado nte ndufo ensio miin usiene ebaña ñkpọ se ami ñkenam? Akpedo ensio miin usiene, ami ñyaasọsọp mben usiene ñkpọ se ndufo enam idot ndufo ke iwuod. 5Sia ndufo emaetañ silfa ye kold mmi, enyʌñ ekoono ataa nti inie mmi esio ekaa ke tembịd ndufo. 6Ndufo emaenyam mbon Yuda ye Yeruselem enọ mbon Krik, nọ etañ ammọ esio eka ke anyan usʌñ ekpọñ isọñ emana ammọ.
7“Se, ami ñyaademme ammọ nọ ewuọñọ eto mme itie se ndufo ekenyam ammọ, ñko ami ñyaaben usiene se ndufo ekenam ntịmme ndot ke iwuod ndufo. 8Ami ñyaanyam nditọ ideen ye ibaan ndufo nnọ ikọd Yuda, ndin ammọ eyaenyʌñ enyam ammọ enọ mbon Sabiin, a-adooho anyan idịd,” Abọọñ atañ.
9Isian ami ke atu mme idịd:
Ibeeñe idem inọ ekọñ!
Idemme mme anwana ekọñ!
Yak afịd ideen se isinwana ekọñ esaña ekpere enyʌñ enwana.
10Imia mme ukwak ukịmisọñ ndufo nọ ekappa akañkañ,
inyʌñ imia mme akọbọ udiọñeto ndufo nọ ekappa eduad,
Yak mme idek ebo,
“Ami mmekop adudu!”
11Isọp idi, afịd mme idịd ke afịd itie,
inyʌñ ibono do.
Abọọñ, ben mme anwana ekọñ mfo sọiyọ di!
12“Yak mme idịd edakka eda;
yak ammọ edʌk eka ke Abedeñ Yehosafad,
sia do ke ami ndiitie
adibiide ikpe nnọọ afịd mme idịd ke mme ñkanñkʌk.
13Ifịm ikwa ukpeeñe,
sia ini idọk akem.
Ndufo idi, inuak mme kreb,
sia ukwak unam ukọd ayọhọ,
mme abañ ukọd enyʌñ eyọhọ eduọi,
ibak ammọ anekke akpon!”
14Mme udịm awo, mme udịm awo
ke abedeñ ñkpembiere!
Sia usen Abọọñ adikpere
ke abedeñ ñkpembiere.
15Utịn mme afiọñ eyaenwen,
ndin ntantaafiọñ idiiyammake aba.
16 Abọọñ ayaato ke Saiyọn akuun,
anyʌñ asakka nte aduma ato ke Yeruselem;
isọñ ye mme anyọñ eyaenyeeñe.
Ado Abọọñ ayaado itie udịbe anọ ikọd amọ,
ayaado itie ubọkkọ anọ mbon Isrel.
Adidiọñ Ikọd Abasi
17“Do ndin afo ayaadiọọñọ ke ami, Abọọñ Abasi mfo,
ndʌñ ke Saiyọn, adisana abod mmi.
Yeruselem adiido adisana;
mme isenawo idiinamma ekọñ ye anye aba.
18“Ke usen ado ufa ukọd ayaatọi ato ke mme ikpọabod adi,
mmọọñeba ayaanyʌñ afiọrọ ke mme ntək abod;
ñko mmọọñ ayaafeghe ke afịd mme itịkke Yuda.
Inua mmọọñ ayaawuọ ato ufọk Abọọñ,
ayaanyʌñ akedeññe abedeñ akasia.
19Ado Iyib ayaadʌk ke ñwuudo,
Edọm ñko adiido ukpọk akpautatan,
ato ke ntak afai e-ekenamma mbon Yuda,
ke adiduọk iyiib mbon i-imiidueghe ke isọñ ammọ.
20Mme awo eyaedʌñ ke Yuda ke nsi-nsi,
eyaenyʌñ edʌñ ke Yeruselem ke afịd emana.
21Nte ami ñyaayaak iyiib mbon se imiidueghe ñkpọ atak?
Iyoo, ami ndiiyakka.”
Abọọñ adọdʌñ ke Saiyọn!
Tans Gekies:
Yuel 3: ICB
Kleurmerk
Deel
Vergelyk
Kopieer
Wil jy jou kleurmerke oor al jou toestelle gestoor hê? Teken in of teken aan
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.