Akisy. 4
4
Toar Kain Abel
(Luk. 11:51; Ŋibur. 11:4, 12:24)
1Kiryamakin Adam ka aberu keŋ Epa, toryamu akook, kidou Kain, ido tema, “Edou ayoŋ ekile anakiŋarakinet a ŋina ke Ekapolon.” 2Kidou nabo Epa Abel lokaato a Kain. Abu Abel toruwor ekeyokon a ŋamesekin, toruwor Kain eketan. 3Ekaku a ŋirwa a ŋice, yau Kain ainakinet ŋina a ŋaraito a ŋuna a emanikor keŋ neni ke Ekapolon. 4Yau Abel daŋ ipei a ŋikiyae a ŋamesekin toar inak Ekapolon akiriŋ ŋina ataronon. Tolakari Ekapolon aŋuna ka Abel ka ainakinet keŋ. 5Nai nyelakar Ekapolon aŋuna a Kain ka ainakinet keŋ. Aŋun, toŋo Kain nooi, tonyoridid ereet. 6Kiŋit Akuj Kain tema, “Anukiro iŋoitor iyoŋ nooi ka anukiro enyorididio ereet kon? 7Ani mono kitiya iyoŋ ejok, nyikicamunio mono iyoŋ a? Nai ani pa kitiya iyoŋ ejok, erubakini asecit ikidapit iyoŋ a lopuke, ikiitanit iyoŋ; nai itemokino iyoŋ kilou asecit.”
8Tema Kain neni ka Abel a lokaato keŋ, “Bua apena nariet.” Ani eriŋa ikes eya nariet, tonyoik Kain Abel lokaato keŋ, toar. 9Kiŋit Ekapolon Kain tema, “Ai eyai lokaato kon Abel?” Toboŋok Kain tema, “Nyayeni ayoŋ, arae ayoŋ ekeyokon lokaato kaŋ a?” 10Kiŋit Akuj iŋes tema, “Nyo itiya iyoŋ? Igworosi neni kaŋ ŋaokot alokaato kon analup. 11Anyoun tokona, iruwor iyoŋ ŋolo ilamam nooi, nyitae iyoŋ nabo ŋalup ŋuna apotu toŋaar kijuwasi ŋaokot alokaato kon a ŋolo ibu iyoŋ toar. 12Ani ŋina itaa iyoŋ ŋalup, nyitokokete ejok ŋikinyom ŋulu itae iyoŋ. Idokini iyoŋ nariyet, toruwor ekerimiton anakwap.” 13Tolimok Kain Ekapolon tema, “Epol akisicanet kaŋ nooi nyapedori ayoŋ akidaŋidaŋ! 14Ikirita iyoŋ ayoŋ nakoloŋit na analup, ido aŋopiyari ayoŋ aneni kon; aruwor ayoŋ ŋolo adokinit ka ekerimiton anakwap, ido epedori ŋinituŋanan ikiryama ka ayoŋ akiar ayoŋ.” 15Tolimok Ekapolon Kain tema, “Nyikote neni! Ani ca ŋini ikiari iyoŋ, inyaŋaryo ŋakinyaŋaret ŋakanikaarei.” Tosodi Ekapolon kiwuak emacar neni a Kain, ikotere nyearya ituŋanan ŋini iryamun ka Kain iŋes. 16Torotok Kain alokiŋaren Ekapolon, tolot akiboi Nod, nakwap ŋina ayai Kide Eden.
Ŋipapae a Kain
17Kiryamakin Kain ka aberu keŋ, toryamu aberu ŋin akook, kidou ikoku tolimok ekiro a ikoku Enok. Toduku Kain etaun ŋolo abu tolimok ekiro Enok, ekiro alokoku keŋ.
18Touru Enok Irad, touru Irad Meuyael, touru Meuyael Metusael, touru Metusael Lamek. 19Kiit Lamek ŋaberu ŋaarei, ekiro a ŋina esyaunan arae Ada ka ŋolo a ŋina a ŋaarei arae Sila. 20Touru Ada Yabal; Yabal iŋes arae papa a ŋituŋa a ŋulu eboiyete aloeemae, torae ŋikeyokok a ŋibaren. 21Arae Yubal lokaato a Yabal, iŋes arae papa a ŋituŋa a ŋulu aramete agita ka tokusete apilu. 22Touru nabo Sila Tubalikain, ŋolo etiyae anasuwa ŋiboro ŋulu egelegelya. Arae Naama nakaato a Tubalikain.
23Tema Lamek neni a ŋaberu keŋ,
“Ada ka Sila, kiirarae ayoŋ,
iyes ŋaberu kaŋ; topupokisi ŋakiro kaŋ!
Aar ayoŋ ekile aŋuna akawania ayoŋ,
aar ayoŋ esorokit aŋuna akaramya ayoŋ.
24Ani kinyaŋaritae Kain ŋakinyaŋaret ŋakanikaarei,
inyaŋaryo Lamek ŋakinyaŋaret ŋatomonikanikaarei.”
25Kiryamakin nabo Adam ka Epa, kidou Epa isapat tolimok ekiro Set, anerae abu iŋes tema, “Akainaki ayoŋ Ekapolon ikoku ice ŋini ilunyokin lorot ka Abel a ŋolo abu Kain toar.”
26Touru Set daŋ isapat, tolimok ekiro Enos. Apaki ŋin nai esyakiniata ŋituŋa akikinyomit ekiro ŋolo ke Ekapolon.
Tans Gekies:
Akisy. 4: NIB2008
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Ngakarimojong Interconfessional Bible © Bible Society of Uganda, 2008.