Genesisi 13
13
Kuhambana ka Abramu ni Loti
1Abramu a to huma ditikoni ka Egipta, ni msikati wakwe, ni sotshe si a nga ti naso, ni Loti a ti kumweko navo, kala ditikoni ka Negebhe. 2Abramu a ti ni sifuyo ngutu, ni silivhela ni nzalama. 3Ene a to ya masoni ni dipfhumba dakwe, kukhukhela Negebhe, kala Bheteli, ka wukhalo wu kukhatani ka kona a nga ti emisile ditenda dakwe, hagari ka Bheteli ni Ayi. 4Ka wukhalo wule kukhata ka kona a nga ti akile txiluvelo, Abramu a to khozela ditina da Mkoma.
5Loti a nga ti londetela Abramu, nene a ti ti ni mitxhambi ya tinvuta, ni tihomu, ni matenda. 6Ditikoni muwa va nga ya maneka kona, mafu ma ti si dingani kuve zumba votshe wukhalo wumwewo, nguko va ti ti fuyile ngutu. 7Se ku ti ti ho kuphikizana hagari ka vadyisi va sifuyo sa Abramu ni vadyisi va sifuyo sa Loti, ka yona mbimo yile; sekoko Vakanana, Vaferezi va ti ti zumba kona ditikoni mule. 8Abramu a to khene ka Loti:
“Kha kulaveki ku txi vaho kuphikizana hagari kwangu ni nawe, hagari ka vadyisi vangu ni vako, nguko hi vamwevo. 9Dotshe ditiko kha di nga masoni kwako kani? Na ku kombela ti to u tshuketa kule ni nani. Nga ti u txi ya txibhabha, ani ni na ya txinene, nga ti u txi ya txinene, ani ni na ya txibhabha.”
10 # Wona ni ka: Gen. 2:10. Loti a to gula maso e wona lotshe libala la Jordhani, lotshe li ti ni mati amangi, na Mkoma asanzi kuhaxula Sodhoma ni Gomora, ku ti fana ni thembwe ya Mkoma, kufana ni ditiko da Egipta di gwitelako Zowari. 11Sekoko Loti a to ti sawulela libala la Jordhani, e rumela kuya wutxani. Ngu tona tiya Abramu ni Loti va nga hambanisa tona. 12Abramu a to aka ditikoni ka Kanana, se Loti a txi aka ka madhoropa ale ma nga ti hafuhi ni mnambo wa Jordhani, e tshuketisela matenda akwe, kala kuya hoka Sodhoma. 13Kambe vathu va Sodhoma va ti ti ni tshofu ngutu, va txi mahetela sionho sasingi masoni ka Mkoma.
Txithembiso txa Txizimu ka Abramu
14 Mkoma a wombile ka Abramu, msana ka kuhambana ka Loti nayo, a txi khene:
“Sekoko Gula maso, kukhukhela ka wukhalo wu u ku ka wona, u wona wuphemba ni wulambwe, wutxani ni mswa-ditambo! 15#Wona ni ka: Mit. 7:5. Dotshe ditikodo u di wonako, ni na kuninga, awe ni lotshe liveleko lako, kala kupinduka. 16Liveleko lako ni na li maha li txi fanana ni lithulu la mafu. Ku walo wu a sikotako kubala lithulu la mafu, kufana ni toneto, kuwalo wu a no sikota kubala situkulwana sako. 17Konkuwa, khukha u txi dhawula ditiko diya u wona kulapha ka dona ni kuanama ka dona, nguko ni na kuninga dona.”
18Abramu a to khukha ni matenda akwe a txi ya aka mikusuni ka Mambre, i ku hafuhi ni Hebroni, se koneyo, a to akela Mkoma txiluvelo.
Tans Gekies:
Genesisi 13: BEC2016
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
A Bíblia em Txitxopi © Bible Society in Mozambique, 2016.