Johani 1

Dipswi di ti mahile m'thu

1Kukhatani ku ti ni Dipswi; Dipswi di ti ni Txizimu, Dipswi i ti Txizimu. 2Dona Dipswi kukhatani di ti ka Txizimu. 3Sotshe si vangilwe ngu dona, kuwalo ni txa tximwetxo txi nga vangwa hahanze ka dona. 4Wutomi wu ti ti ka dona. Wutomi i ti ti liwoningo la vathu. 5Liwoningo liya li woningile txidemani, kambe txidema kha txa li xula.

6 # Wona ni ka: Mat. 3:1; Mar. 1:4; Luk. 3:1-2. Ku humelete m'thu wo rumelwa ngu Txizimu, ditina dakwe i ti Johani. 7Ene a tete ku ta fakazela liwoningo, ti to votshe ve tumela ngu ngene. 8Ene i ti si nga liwoningo, kambe a ti tete ku ta fakazela liwoningo. 9Dipswi i ti liwoningo la ditshuri, aliya li woningako votshe vathu, li txi ta ha mafuni.

10Dipswi di ti mu mafuni, ni mafu ma mahilwe ngu dona, kambe mafu kha ma di ziva. 11Ene i ku Dipswi a tile ka va ka kwawe, kambe va ka kwawe kha va mu amukela. 12Aniko votshe va va nga mu amukela, ava va nga tumela ka ditina dakwe, a va ningile mtamo wa kumaha vanana va Txizimu. 13Vona mbanana va Txizimu, i si nga ngu nzila ya mtumbuluko, mwendo kunavela ka mmidi hambi kuranda ka m'thu, aniko va velekilwe ngu Txizimu.

14Dipswi di ti mahile m'thu, e aka hagari kwathu; hi wu woni wudhumo wakwe, wudhumo wu Tate a nga ninga Mwanana wakwe wa Mmweyo ekha, wo tala ngu makatekwa ni ditshuri. 15Johani wa fakaza ngu ngene, a txi khene: “Ngene wu ni nga ti mu womba ni txi khani: ‘Awu a tako msana kwangu, ngene i ku wo khata, nguko Ene a ti ti ho ni sanzi ku va ho ani.’ ” 16Kha ditshuri, ngu kutalelwani kwakwe, hotshethu hi amukete kateko ni kateko. 17Nguko hi ningilwe Mlayo manzani ka Mosi, aniko kateko ni ditshuri hi wuyisetwe ngu Jesu Kristu. 18Txizimu kha txi zivi kuwonwa ngu m'thu; Mwanana wa txona wa Mmweyo ekha, awu a ku kumweko ni Tate, ngene a nga hi zivisa ati Txizimu txi ku ngu tona.

Wufakazi wa Johani Mubhabhatisi

(Matewu 3:1-12; Marku 1:1-8; Luka 3:1-18)

19Ngu wona wuwa wufakazi a nga wu maha Johani ditshiku di Vajudha va nga rumela vaphaxeli ni Valevhi ngu Jerusalema, kuya mu wotisa, va txi kha vona: “Awe ngawe mani?” 20Ene a wombile ditshuri, kha va langela, a wombile, a txi khene: “Ani kha ni nga Mesiya.” 21Se vona va to mu wotisa, va txi kha vona: “Ngawe mani kani? Ina ngawe Elija kani?” Ene a txi khene: “Kha ni nga ene.” “Mwendo u mprofeti kani?” Ene a txi angula, a so khene: “Ahim-him.” 22Konaho, va to womba kwakwe, va txi kha vona: “Se ngawe mani, kasi ku hi na ya sikota kuxamula ka vale va nga hi ruma kani? Kasi awe u ti maha mani kani?” 23Ene a xamute a txi khene: “Ani ni dipswi da wule a kwangulako txiwulani, a txi khene: ‘Lulamisani nzila ya Mkoma’, nga tiya a nga wombisa tona mprofeti Isaya.”

24Avale va nga ti rumetwe i ti Vafarisi. 25Vona va to mu wotisa va txi kha vona: “Se i mhaka muni u txi bhabhatisa na u si nga Mesiya, u si nga Elija, u si nga Mprofeti kani?” 26Johani a va xamute a txi khene: “Ani ni bhabhatisa ngu mati, kambe hagari kwanu waho awu mi si mu ziviko. 27Ene ngene a nota msana kwangu, awu hambi ani ni si sikotiko kuthukunyula tingoti ta tikathula takwe.” 28Atiya ti mahekile Bhetaniya, mtxhatuko ka Jordhani, ahawa Johani a nga txi bhabhatisa kona.

29Mangwanani ka kona, Johani a to wona Jesu, a nga txi ta kwakwe, se a txi khene: “Wonani Txinvutana txa Txizimu atxi txi kuwulako sionho sa ditiko. 30Ngene wu ni nga txi womba ngu ngene, ni txi khani: ‘Ngu msana kwangu, wata m'thu, awu a ni thangelako masoni, nguko a ti ti ho, na ni sanzi ku va ho ani.’ 31Nani ni ti si mu zivi, kambe ni tete ku ta bhabhatisa ngu mati, kasiku Ene e wonekiswa ka Israyeli.”

32Johani a fakazile kambe a txi khene: “Ni woni Moya wo Sawuleka wu txi txhika ngu nzumani, nga txituvani, wuta zumba txitimwi kwakwe. 33Nani ni ti si mu zivi, aniko awule a nga ni ruma kubhabhatisa ngu mati, ngene a nga ni gela a txi khene: ‘Awule u no wona Moya wo Sawuleka wu txi txhikela ku ta zumba txitimwi kwakwe, ngeneyo a bhabhatisako ngu Moya wo Sawuleka.’ 34Ni ti woni ngu maso angu, se na fakaza ti to Ene i Mwanana wa Txizimu.”

Vagondiswa vo khata

35Ka ditshiku di di londetako, Johani a ti maneka a di konaho kambe ni vambidi ka vagondiswa vakwe. 36Ku ti ngako a txi wona Jesu na a txi pinda, a to khene:

“Wonani Txinvutana txa Txizimu.”

37Vagondiswa vale va vambidi, ngako va txi engisa mapswi ale a nga ma womba, va to londisa Jesu. 38Mbimo yi a nga tshembereka a txi va wona, va txi mu londetela, Jesu a to khene kwawe:

“Mi lava txani kani?”

Vona va xamute va txi kha vona:

“Rabbi (ati ti wombako ku M'gondisi), u zumba hani kani?”

39Ene a to va xamula a txi khene: “Ngonani mi ta kuwona.”

Vona va nje kutsula veya wona ahawa a zumbako kona, se ve zumba nayo ditshikudo. I ti mbimo yo lava kuhoka ka txikhati txa wugumi.

40Andreya, mwanawe Simoni Pedro, i ti mmweyo wa vale vavambidi, va nga londisa Jesu ngu kuengisa ti a nga womba Johani. 41Ene a thangile ngu mwanawe Simoni, a txi mu mana, se a txi mu gela ku khene:

“Hi mmani Mesiya!” Ati ti wombako ku Kristu.

42Se a txi mu heleketa ka Jesu. Jesu a to mu wonisisa, se a txi khene:

“Awe ngawe Simoni, mwana Johani; u na dhanwa ku u Khefasi” (ati ti wombako ku Pedro, Dirigwi.)

Jesu e dhana Filipi ni Nathaniyele

43Ka ditshiku di di londetako, Jesu a ti xuva kuya Galileya, se e mana Filipi, a txi khene kwakwe:

“Ni londise.”

44Filipi i ti wa Bhetsayidha, didhoropa da va Andreya ni Pedro. 45Filipi a to mana Nathaniyele, a txi khene kwakwe:

“Hi mmani wule Mosi a nga bhala timhaka takwe Mlayoni, ni Vaprofeti ni vona va bhate: I Jesu wa Nazareta, Mwana Josefa.”

46Nathaniyele a txi khene kwakwe:

“Ina txilo txa txinene txi nga huma ngu Nazareta kani?”

Filipi a txi khene kwakwe:

“Ngono u ta ti wona.”

47Jesu a to wona Nathaniyele a txi mu tela, se e womba ngu ngene, a txi khene:

“Ndiyo Muisrayeli wa ditshuri, awu kwakwe, ku kuwalo kukanganyisa.”

48Nathaniyele a txi khene kwakwe:

“U ni zivela hani kani?”

Jesu a to mu xamula a txi khene:

“Na Filipi a sanzi ku kudhana, ani ni ku woni u di hahatshi ka mkuwu.”

49Nathaniyele a to xamula a txi khene kwakwe:

“M'gondisi, awe u Mwanana wa Txizimu, u Mkoma wa Israyeli.”

50Jesu a to xamula a txi khene kwakwe:

“U tumela ngu kuwa ni nga kugela ku khani: Ni ku woni hahatshi ka mkuwu. U na wona ta hombe kupala tiya.” 51#Wona ni ka: Gen. 28:12. A to engeta a txi khene: “Ngu ditshuri, ngu ditshuri, na mi gela ku khani: Kukhukhela konkuwa, mi na wona nzuma yi di tulekile, ni tingelozi ta Txizimu na ti txi kwela, ti va ti txhika txitimwi ka Mwanana wa M'thu.”

Tans Gekies:

Johani 1: BEC2016

Kleurmerk

Deel

Kopieer