Johani 13

Jesu ngako a txi kuwula mikondo ya vagondiswa vakwe

1Na kusanzi kuhoka M'buso wa Pasika, Jesu, ngu kuziva ti to txi hokile txikhati txakwe, txa kupinda ka ditiko diya e tsula ka Tate, Ene a nga ti ti va randa vathu vakwe, va ku ha mafuni, a va kombile lirando kala kuhoka magwito. 2Se hagari ka kulalela, ngako Sathani a nga ti wulete mapimoni ka Judha Iskariyoti, mwanana wa Simoni, kufela ku ene e ningela Jesu; 3Se, kota nga ti Ene Jesu a nga txi tiziva ti to Tate a mu ningile sotshe manzani kwakwe, ni kuziva ti to Ene a ta ngu ka Txizimu, kambe a na tshumela e tsula ka txona Txizimu, 4a to khukha e leka sakudya e thavisa nguwo, a txi teka dithawula e di sunga txiwununi. 5Msana keto, a to thela mati mu ka mkamba, e khata kusambisa mikondo ya vagondiswa e yi bahulela ngu dithawula di a nga ti di sungile txiwununi. 6Mbimo yi a nga hokela Simoni Pedro, ene Pedro a to angula, a txi khene: “Mkoma, u lava ku ni kuwula mikondo awe?” 7Jesu a to mu xamula, a txi khene: “Ati ni ti mahako khu na ku tiziva konkuwa. U na ti manisisa msana ka mbimo.” 8Kambe Pedro a to khene: “Ani txima khu na mbi ni sambisa mikondo.” Konaho Jesu a to khene: “Ngako ni si ku sambisi mikondo, khu sikoti kuva ni txyavelo ni nani.” 9Se Simoni Pedro a to khene: “Mkoma, u nga sambise mikondo dwe, aniko ni sambise ni ona manza ni msungo.” 10Se Jesu a to khene: “Awu a nga samba, kha nga ni fanelo ya kusambiswa kambe, hahanze ka mikondo dwe, nguko wotshe mmidi wakwe wu basile: Se na nanu mi basile, kambe hi nga anu motshe.” 11Nguko ene a ti m'ziva awu a no mu ningela. Ngu mhaka yeto, a wombile a txi khene: “Hi nga anu motshe mi nga basa.”

12 # Wona ni ka: Luk. 22:27. Msana ka kuva a di va sambisile mikondo, a to tshumela a txi ambala syambalo sakwe, a txi ya khalahatsha kambe ha sakudyani, a txi khene: “Ma ti mana ati ni nga ti maha kwanu kani? 13Anu mi ni dhana ngu ditina daku ni M'gondisi ni Mkoma; inna, mi womba tona, nguko ani, ngani. 14Se ngako ani ni ku M'gondisi ni Mkoma, ni nga mi sambisa mikondo, na nanu mi fanela kusambisana mikondo ngu txanu. 15Ani ni mi mahete txikombiso, kufela ku, ati ni nga mahisa tona kwanu, na nanu mi na mahisa toneto. 16#Wona ni ka: Mat. 10:24; Luk. 6:40; Joh. 15:20. Ngu ditshuri, ngu ditshuri na mi gela ku khani: Txithumi hi nga txa hombe ka mkoma wa txona; ni txirumwa hi nga txa hombe ka wule a nga txi ruma. 17Ngako mi txi tiziva tiya ni ku ti thuma, mi katekile.”

18“Kha ni wombi ngu nganu motshe; na va ziva ava ni nga va sawula. Aniko ta laveka ti to Mibhalo yi tatiseka, ayi yi kha yona: ‘Awu a dyako mndiwo ni nani, a ni wukete a txi ni ganyata ngu txizenende txakwe.’ 19Na mi gela mhaka yiya, yi sinzi kumaheka, kasiku, ditshiku di yi humelelako, mi na kholwa ti to ‘Ani Ngani.’ 20Ngu ditshuri, ngu ditshuri, na mi gela ku khani: Awule a amukelako wuhi ni wuhi ni no mruma, a amukela ani nipune; awule a ni amukelako, a amukela awu a nga ni ruma.”

Jesu a txi landula wukanganyisi wa Judha

(Matewu 26:20-25; Marku 14:17-21; Luka 22:21-23)

21Ku ti ngako Jesu a di wombile timhaka tiya, a to pandiseka moyani, e tsanisa a txi khene: “Ngu ditshuri, ngu ditshuri, na mi gela ku khani: Mmweyo wanu a na ni ningela.” 22Sekoko vagondiswa va to wonana ngu txawe, va si ti zivi ti to a womba-womba ngu mani. 23Kambe mmwani wa vagondiswa vakwe, awuwa Jesu a mu randako, a ti khigetete hakhana ka Jesu. 24Sekoko Simoni a to mkweseta, a txi khene:

“Mu wotise ti to a womba mani.” 25Ene, ku ti ngako a di wekelete hakhana ka Jesu, a to mu wotisa, a txi khene: “Mkoma, i mani kani?” 26Jesu, a to mu xamula a txi khene: “Ngu wule ni no mninga txikhwemu txi ni no thanga ngu ku txi beta.” Ku ti ngako a di txi betile, a to txi ninga Judha Iskariyoti, mwana Simoni. 27Ku ti ngako ene a di amukete txikhwemu, Sathani a to mu wulelela. Se Jesu a txi khene kwakwe: “Ati u ti mahako, kuluveta u txi ti maha.” 28Kambe ku ti si nga ni wammweyo ka vale va nga ti ti ho koneho, a nga ti manisisa ti to a wombela txani mapswiyo. 29Ngako Judha i nga ti ene mñoli wa msava wa male, vamwani va to alakanya ti to Jesu a mu gela ku a na xave asi si lavekako m'busoni, mwendo kuya ninga somaha ka sisiwana. 30Ku ti ngako a di tekile txikhwemu txile, Judha a to huma kunukunuko. I ti wusiku.

Mlayo wa wuphya

31Msana ka kuva ene Judha a di humile, Jesu a to womba a txi khene: “Konkuwa se a pfalisilwe Mwanana wa M'thu. Txizimu ni txona txi pfalisilwe kwakwe. 32Ngako Txizimu txi di pfalisilwe kwakwe Mwanana, ni txona Txizimu txi na mpfalisa kunukunuko. 33Vanangu: Ani ni ngadi ni nanu txikhatianyana txidotho. Mi na ni lava, aniko, nga ti ni nga wombisa tona ka Vajudha, na nanu konkuwa na mi gela ku khani: ‘Ahawa ani ni yako kona, anu kha mi sikoti kuta kona.’ 34#Wona ni ka: Joh. 15:12,17; 1 Joh. 3:23; 2 Joh. 5. Na mi ninga mlayo wa wuphya: Randanani! Nga ti ani ni nga mi randa, na nanu mi fanete kurandana. 35Ngu toneto, va no mi zivisa tona ti taku mi vagondiswa vangu: Ngako mi txi randana.”

Jesu a zivisa kulamba ka Pedro

(Matewu 26:31-35; Marku 4:27-31; Luka 22:31-34)

36Simoni Pedro a txi khene kwakwe: “Mkoma, u ya hani kani?” Jesu a to mu xamula, a txi khene: “Ahawa ani ni yako kona, awe khu na ku ni londisa konkuwa. Aniko ngu msana, u na ni londisa.” 37Pedro a to khene kwakwe: “Mkoma, ni nga tandekisa kutxani ku kulondisa konkuwa kani? Ni na ningela wutomi wangu ngu kota yako.” 38Jesu a to mu xamula a txi khene: “U khawe u na ningela wutomi wako ngu kota yangu? Ngu ditshuri, ngu ditshuri, na kugela ku khani: Mkuku wu sinzi kuemba, awe u na va u di ni lambile kararu.”

Tans Gekies:

Johani 13: BEC2016

Kleurmerk

Deel

Kopieer