Johani 4

Jesu ni wamsikati wa Msamariya

1Jesu a ti zivile ti to Vafarisi va engisile vathu va txi womba ku ene wa pala Johani kumana vagondiswa ni kubhabhatisa vathu. 2(Hambiko a nga ti si Jesu apune bhabhatisiko, aniko i ti vagondiswa vakwe). 3Konaho Jesu a to khukha Judheya a tshumelela Galileya. 4Kambe a ti fanela kutshawunyeta ngu Samariya.

5Se a to hoka ka m'ti wumwani wa Samariya, awu wu dhanwako ku i Sikari, hafuhi ni thembwe yi Jakobe a nga ninga Josefa, mwanana wakwe. Konaho ku ti ni txisima txa Jakobe. 6A di karate ngu kutsimbila, Jesu a to khalahatsha hafuhi ni txisima txa Jakobe. I ti txikhati txa wutxhanu ni tximwetxo.

7A to bwaka wamsikati wa Samariya, ku ta reka mati. Se Jesu a to womba kwakwe a txi khene:

“Hi nga niha mati o sela.”

8Kasi vagondiswa vakwe va ti tsute didhoropani kuya xava sakudya.

9Wamsikati wule wa Msamariya a to mu xamula a txi khene:

“Ti nga mahisa kutxani awe u ku Mujudha kukombela mati kwangu ni ku Msamariya kani?” (Nguko Vajudha kha va tolovelani ni Vasamariya).

10Se Jesu a to xamula a txi khene:

“Idiku wo txi ziva txihiwa txa Txizimu, ni ti to i mani wule a ku khene: ‘Hi nga niha mati o sela’ nga i di awe u mu kombelako ti to ene e kuninga mati a kuhanya.”

11Wamsikati a to khene:

“Mkoma, khu nga ni txo reka ngu txona mati txisimani, kambe ni txona txisima txi hokomile, se u na ma mana hani mati a kuhanya kani? 12U nga va u di wa hombe awe kupinda tate wathu Jakobe, a nga hi ninga txisima txiya, atxiya nene a nga sela ka txona, kumweko ni vanana vakwe, ni sifuyo sakwe kani?”

13Jesu a to engeta e xamula a txi khene:

“Awule a selako awa mati, a na tshumela kambe a txi pfa ditora; 14aniko awule a selako mati yawa ni no mninga ani, kha na mbiswa a txi pfa ditora; kambe mati yawa ni no mninga, ma na hinduka mndani kwakwe ma txi maha txisima txa mati yawa ma mu ningako wutomi wo mbi guma.”

15Se wamsikati a to khene kwakwe:

“Mkoma, ni he matiyo, kasiku ni si swi ni txi pfa ditora, ni ti to ni si swi kambe ni ta hawa ni ta reka.”

16Jesu a txi khene kwakwe: “Tsula u txi ya dhana mwamna wako, u tshumela u wuya.”

17Wamsikati a txi mu angula, a txi khene: “Kha ni nga ni mwamna.”

Jesu a to khene kwakwe:

“U wombile ditshuri, u txi khawe: ‘Kha ni nga ni mwamna.’ 18Nguko u zumbile ni mtxhanu wa vavamna, se awu u ku nayo konkuwa, hi nga wako. Ngu toneto, u wombile ditshuri.”

19Wamsikati a to khene:

“Mkoma, na ti wona ti to kasi u Mprofeti: 20Vatate vathu va ti ti khozela ka mmango wuwa, se awe u khawe Jerusalema ngu kona va fanelako kuya khozela kona.”

21Jesu a to khene:

“Wamsikati, tumela ti ni kugelako: Yata mbimo yi mi no mbiswa mi txi khozela ka mmango wuwa, hambi ni Jerusalema. 22Anu mi khozela txa ku ambi txi ziva, athu hi khozela txi hi txi zivako, nguko kuhanyiswa kuta ngu ka Vajudha. 23Aniko txi na hoka txikhati, kambe txi hokile, atxi vakhozeli va ditshuri va no khozela Tate ngu moya ni ditshuri, nguko ngu vonevo vakhozeli vava Tate a va dhundako. 24Txizimu i Moya, se vakhozeli va txona va fanela ku txi khozela ngu Moya ni ditshuri.”

25Wamsikati a to engeta a txi khene:

“Na tiziva ti to wata Mesiya, awu a dhanwako ku i Kristu, se a di tile, Ene a nata hi gondisa totshe.”

26Jesu a nje khene kwakwe:

“Ngani ni wombawombako ni nawe.”

27Kunukunuko va to bwaka vagondiswa vakwe, se ni vona va to xamala ngu kuwa Ene a nga txi womba-womba ni wamsikati. Hambi keto, kuwalo ni wammweyo wa vagondiswa, a nga mu wotisa tito: “U lava txani kani?” Mwendo ku: “Njitxani u bhulako nayo kani?”

28Konaho wamsikati a to leka lidhuwa, e tsula didhoropani eya gela vathu, a txi khene:

29“Ngonani mi ta wona m'thu wu a nga ni gela totshe ti ni nga ti maha. Ina hi nga ene Mesiya kani?”

30Vona va to huma ngu didhoropani, ve tsula kuya wonana ni Jesu.

31Ngu kumaha keto, vagondiswa vakwe va to mkhongotela, va txi kha vona:

“Dyana, M'gondisi!”

32Aniko Ene a to va xamula a txi khene:

“Ani ni na ni sakudya, si anu mi si si ziviko.”

33Sekoko vagondiswa va to wotisana, va txi kha vona:

“A nga va a diho a nga mu tisela sakudya kani?”

34Se Jesu a nje khene kwawe: “Sakudya sangu ngu kumaha kuranda ka wule a nga ni ruma ni kuhetisa mthumo wakwe. 35Kasi kha mi wombi anu, tito: ‘Ku sate mune wa mitxima, se yi na hoka mbimo ya kuelula’, kani? Kha ditshuri na mi gela ni khani: Gulani maso mi wona: Tithembwe ti nga xwee, ti lavako kuelulwa. 36Awule a elulako wa amukela hakhelo, e sengeleta mihando ya wutomi wo mbi guma. Se ti di mahile eto, awu a phayako wa tsaka kumweko ni wu a elulako. 37Ngu toneto, di na ni ditshuri dipswi di diku: ‘Mmwani wa phaya, mmwani wa elula.’ 38Ni mi rumete kuya elula asi anu mi nga mbi si thumela; vamwani va thumile se anu ma londola mithumo yawe.”

39Vasamariya vavangi va didhoropa dile va to kholwa kwakwe, ngu mhaka ya wule wamsikati, a nga fakaza a txi khene: “Ene a ni gete totshe ti ni nga ti maha.” 40Ngu toneto, mbimo yi va nga mu yela Jesu, va mu kombete ti to e zumba navo, se ene a zumbile navo masiku mambidi.

41Vamwani kambe vavangi va to kholwa ngu kuengisa kuwombawomba kwakwe. 42Se va to womba ka wule wamsikati va txi kha vona:

“Se athu hi nga ngadi i di mapswi ako, ma hi ningako kukholwa, aniko ngathu hipune hi ti engisako ni ku tiziva ti to Ene ngene Muhanyisi wa Ditiko.”

Jesu e hanyisa mwanana wa mthumeli wa vathu

43Ngako ma di pindile masiku mambidi, a to khukha hale, e tsula Galileya. 44#Wona ni ka: Mat. 13:57; Mar. 6:4; Luk. 4:24. Ene Jesu apune a ti wombile a txi khene: “Mprofeti kha dhundwi ditikoni kwawe.” 45#Wona ni ka: Joh. 2:23. Ku ti ngako a di hokile Galileya, Vagalileya va to mu amukela kwati, nguko va ti woni totshe ti a nga ti maha Jerusalema ngu ditshiku da m'buso, ngako ni vona va nga ti yite m'busoni.

46 # Wona ni ka: Joh. 2:1-11. Se Jesu a to tshumela eya Kana ka Galileya, ahawa a nga phindula mati me maha vhinya. Yi ti ti ho nduna ya mfumeli, yi nga ti lwalelwa ngu mwanana, a nga ti Kapernawume. 47Nduna yiya, ngako yi di engisile ti to Jesu wata Galileya ngu Judheya, yi to mu yela yi ya mkombela ku e tsula nayo m'tini ka yona, a txi ya hanyisa mwanana wa yona, a nga ti hafuhi ni kufa. 48Sekoko Jesu a to womba a txi khene kwakwe:

“Anu, ngako mi si woni sixamaliso ni sidiwukiso, kha mi kholwi.”

49Awule wa nduna a to khene:

“Mkoma, kuluveta u txi ta, a sinzi kufa mwanana wangu.”

50Jesu a to mu angula a txi khene: “Tsula, mwanana wako a hanyile.”

M'thu wuwa a to kholwa ka mapswi a Jesu, e tsula.

51Se mbimo yi a nga txi tsula, si to mu hingeta sithumi sakwe, si txi ya mu gela taku:

Mwanana wako wa hanya.

52Ene a va wotisile mbimo yi a nga kalamuka ngu yona. Va txi kha vona kwakwe:

“Nyamnova, ngu txikhati txa wutxhanu ni simbidi, txindeyandeya txi mu lekile.”

53Se ngu konaho tate wa mwanana a nga tiziva ti to ngu yona yile mbimo Jesu a nga khene: “Mwanana wako a hanyile,” Se ene ni yotshe ngamu yakwe va to kholwa ka Jesu.

54Ngu txona txidiwukiso txa wumbidi, atxi Jesu a nga txi maha, ngako a di hokile Galileya, a txi ta ngu Judheya.

Tans Gekies:

Johani 4: BEC2016

Kleurmerk

Deel

Kopieer