Luka 22
22
Txikungo txa kudaya Jesu
(Matewu 26:1-5,14-16; Marku 14:1-2,10-11; Johani 11:45-53)
1 # Wona ni ka: Eks. 12:1-27. Ngako wu nga ti hafuhi M'buso wa mapawu o mbi tshumbelwa, wu dhanwako ku i Pasika, 2vaphaxeli va hombe ni vabhali va ti lava nzila ya tiya va no dayisa tona Jesu, nguko va ti thava vathu.
3Se Sathani a to wulela mbiluni ka Judha, awu a dhanwako ku i Iskariyoti, i nga ti mmweyo wa vale va Digumi ni Vambidi. 4Ene a to tsula a txi ya langana ni vaphaxeli va hombe ni tinduna ta yimbi, ati a no va ningelisa tona Jesu. 5Vona va to tala ngu kutsaka, ve tumelelana ku mninga male. 6Judha a to tumela, se e lava mbimo ya yinene kuya ningela Jesu ngu yona, na di si nga ho dibutho.
Jesu ngako a txi dya Pasika ni Vagondiswa
(Matewu 26:17-25; Marku 14:12-21; Johani 13:21-30)
7Se di di hokile ditshiku da mapawu o mbi tshumbelwa, i ku da kumaha ngu dona mhamba ya Txinvutana, 8Jesu a to ruma Pedro ni Johani, a txi va gela ku khene: “Tsulani mi txi ya longisela Pasika, kasiku hi na ya yi dya.” 9Vona va mu wotisile va txi kha vona: “U lava hi txi ya yi longisela hani kani?” 10Ene a ti khene: “Mbimo yi mi no wulela didhoropani, mi na manana ni wamwamna a di rwate lidhuwa la mati. Mu londiseni kala ka nyumba yi a no ya wulela ka yona. 11Mi na ya gela nyamne wa m'ti mi txi khanu: ‘M'gondisi a hi rumete ku ta womba kwako ti to yi hani nyumba yi ni no dyela ka yona Pasika ani ni vagondiswa vangu kani?’ 12Seko ene a na mi komba wukhalo wa hombe wu nga lulamiselwa txitimwi txitezini. Longiselani koneho.” 13Vona va to tsula veya mana totshe nga ti a nga va gelisa tona, se ve longisela Pasika.
Txilalelo txa Mkoma
(Matewu 26:26-30; Marku 14:22-26; 1 Vakorinto 11:23-25)
14Ngako txi di hokile txikhati, Jesu a to ya khalahatsha ha mezani kumweko ni Vapostoli. 15Se e va gela ku khene: “Ni xuvile ngu kunavela ka hombe kudya Pasika yiya kumweko ni nanu, ni sanzi kuxaniseka, 16nguko na mi gela ti to kha ni na mbiswa ni txi yi dya kambe, kala txikhati txi yona yi no ya tatiseka Mfumoni ka Txizimu.”
17Se a to teka digombe, a txi bonga, a txi khene: “Tekani mi txi siyetisana ngu dona, 18nguko na mi gela ti to kha ni na mbiswa ni sela kambe mihando ya m'vhinya kala kuta ka Mfumo wa Txizimu.”
19Ngu konaho a to teka dipawu, se a di bongile, a to di bhanda, a txi va ninga, a txi khene: “Asiya i mmidi wangu wu no ningelwa ngu kota yanu; mahani tiya kasi ku ni alakanya ngu tona.” 20Msana ka kuva va di lalete, a to mahisa toneto kambe ngu digombe a txi khene: “Digombe diya Njitumelelano txa Txiphya ka mnoha wangu, wu no theketwa ngu kota yanu. 21#Wona ni ka: Mas. 41:9. Hambi keto, wonani, dianza da wule a ni ningelako, di ni nani ha mezani. 22Mwanana wa M'thu a longoloka ngu nzila yakwe kota nga ti ti nga sikeliswa tona; aniko dikhombo da wule a ningelwako ngu ngene!” 23Se va to khata kuwotisana ngu txawe, ti to i mani kwawe, awu a no yi maha mhakeyo.
Vagondiswa va lava kuziva ti to wa hombe ngu mani
24 # Wona ni ka: Mat. 18:1; Mar. 9:34; Luk. 9:46. Sekoko, va to khata kukanetisana ngu kulava kuziva ti to i mani a alakanyelwako kuva i di wa hombe hagari kwawe. 25Ene a to va gela, a txi khene: “Vafumeli va vamatiko va ma fuma ngu mtamo, ni vale va ku txitimwi kwawe va dhanwa ku mbamahi va ta tinene. 26Kasi hagari kwanu, ti nga mahise eto: Awu i ku wa hombe, hagari kwanu, a na ti mahe wam'dotho; awu i ku mthangeli, a na ti fananise ni wule i ku txithumi. 27#Wona ni ka: Joh. 13:12-15. Nguko, kasi i mani i ku wa hombe kani? Awule a nga khalahatsha ha mezani mwendo awule a mu thumelako kani? Ina wa hombe hi nga wule a ku ha mezani kani? Aniko, ani ni maneka hagari kwanu nga wule a thumelako mmwani. 28Anu mi vathu va va nga timisela kumweko ni nani ka sotshe siduko sangu. 29Kufana ni kuwa Tate wangu a nga ni ninga wukoma, nanani na wu ningela wukoma wuwa kwanu, 30#Wona ni ka: Mat. 19:28. kasi ku mi txi dya ni kusela ha mezani kwangu, ka Mfumo wangu; ni ti to mi txi khalahatsha ka sikhalo sa wukoma mi txi lamula tihunzu ta digumi ni timbidi ta ka Israyeli.”
Pedro a ziviswa ti to a na lamba Mkoma
(Matewu 26:31-35; Marku 14:27-31; Johani 13:36-38)
31“Simoni, Simoni, wona: Sathani a kombete ku mi hehera nga kule ka fulaho. 32Aniko ani ni ku kombelete, kasiku likholo lako li si timeki. Se awe, ngako u di hundulukile, tsanisa vakwanu.” 33Ene a to womba a txi khene: “Mkoma ani ni ti longisete kutsula ku khotelwani kumweko ni nawe, hambi kuya kufani.”
34Aniko Jesu a to khene:
“Pedro, na kugela ku khani: Mkuku nyamsi kha wu na mbi emba, na awe u sa kaneta kuraru ti to wa ni ziva.”
Jesu e txharihisa vagondiswa vakwe
35Ngu msana a engetile a txi khene kwawe:
“Mbimo yi ni nga mi ruma, mi si nga ni mkwama mwendo msava mwendo masandazi, txi ho txi txi nga mi pwatekela kani?”
Vona va to angula va txi kha vona: “Lambi!”
36Se ene a to txhatekela dipswi daku khene:
“Se konkuwa, awule a ku ni mkwama a na wu teke, hambi msava ni wona; ani wule a ku si nga ni ditxhari, a na xavise dibhaji e xava ditxhari dimwedo. 37Nguko ani na mi gela ti to khani, di fanela kutatiseka kwangu dipswi di di nga bhalwa daku: ‘A batwe kumweko ni sindaka-milayo.’ Nguko ati ti nga bhalelwa ani, ti fanete kutatiseka.”
38Vona va to angula va txi kha vona:
“Mkoma, ahawa hi na ni matxhari mambidi!”
Ene a to xamula a txi khene: “Ma dingani!”
Jesu a di Getsemani, mmangoni ka Miolivha
(Matewu 26:36-46; Marku 14:32-42)
39Konaho ene a to huma e tsula mmangoni ka Miolivha, ngu tolovelo yakwe. Se vagondiswa ve mu londisa. 40Mbimo yi a nga hoka koneyo, a to va gela, a txi khene: “Khongelani kasiku mi si wi kudukwani.”
41Sekoko, e phawuka kwawe, a txi ya kule nyana ka kudingana kurinzwa ka dirigwi, ahawa a nga ya khizama, e khongela, a txi khene: 42“Tata, u txi ti lava, hambukisa digombe diya da sixaniso di txi ya kule ni nani. Aniko, ku nga mahwe kuranda kwangu, ku na mahwe kuranda kwako.”
43Konako, ku to humelela ngelozi ya kuta ngu nzumani, yi ta mtsanisa. 44Ene, a di tate ngu kupandiseka, a to simama kukhongela ngutu, mnyuko wu a nga txi dhunuka, wu txi nga mathotho a mnoha, ma nga txi thothoketela ha mafuni. 45A di gwitile kukhongela, a to wuya ka vagondiswa, a ta va mana va txi otela, ngu kupfa dikhodho. 46Se a txi khene kwawe: “Nji txani mi txi otela kani? Wukani, mi txi khongela, kasiku mi si wi kudukwani.”
Jesu a txi ñolwa
(Matewu 26:47-56; Marku 14:43-50; Johani 18:3-11)
47Ene a di ngadi a txi womba-womba, ku to haruka mtxawa wa vathu, na va txi thangelelwa ngu mmweyo wa va digumi ni vambidi, a dhanwako ku i Judha, a nga ti thangete masoni; ene a to tshuketela Jesu, a txi mu pswopswa. 48Jesu a to mu gela ku khene: “Judha, wa ningela Mwanana wa M'thu ngu kupswopswa, kani?” 49Ngako vale va nga ti nayo, va txi wona ti ti nga txi lava ku mu humelela, va to mu wotisa ku kha vona: “Mkoma, hi txi va limaza ngu matxhari kani?” 50Se mmweyo wawe a to peka txithumi txa mphaxeli wa hombe, e txi wila nzeve ya txinene. 51Kambe Jesu a to khene: “Basi! Lekani!” Se a to gwesa nzeve, e mu hanyisa.
52Ngu msana, a to gela vale va nga ta, va di mu xomete, vaphaxeli va hombe, tinduna ta Dithepele ni madhota a ditiko, a txi khene: “Mi ta ni matxhari ni migomba, nga mi to xomela dikhamba kani? 53Ka otshe masiku awa ni nga ti ni nanu Dithepeleni, kha ma ni gwesa ngu manza anu, aniko atxiya ngu txona txikhati txanu ni mfumo wa txidema.”
Pedro a kaneta ti to wam'ziva Jesu
(Matewu 26:69-75; Marku 14:53-54,66-72; Johani 18:15-18,25-27)
54Sekoko va to ñola Jesu, va txi mteka, ve m'yisa m'tini ka mphaxeli wa hombe. Pedro a txi londetela a di kule.
55Ngako va di dhivete mndilo ha mtendelani, va txi khalahatsha ve wora, Pedro a to khalahatsha kumweko navo. 56Sekoko, mmweyo wa txithumi txa wamsikati, a di mu woni a di khalahatshile ha txikho, a to mu wonisisa, a txi khene: “Awuwa nene a ti kumweko nayo!” 57Kambe Pedro a to kaneta, a txi khene: “He wamsikati, ani eyo kha ni mu zivi.”
58Msana ka mbimoanyana ya yidotho, mmwani a nga mu wona, a to khene: “Nanawe u mmweyo wawe!” Kambe Pedro a to angula a txi khene: “He mo, kha ni nga mmweyo wawe ani!”
59Msana ka mbimo yi yi dinganako txikhati tximwetxo, mmwani a to simama nene, a txi khene: “Kha ditshuri awuwa a ti kumweko nayo, nguko nene mbwa Galileya.” 60Pedro a to angula, a txi khene: “He mo, ani kha ni tizivi eto u wombako.” Se, kunukunuko, ene a di ngadi a txi womba-womba, ku to emba mkuku. 61Mkoma a to tshembereka a txi wonetela Pedro, se Pedro a txi khumbula dipswi da Mkoma, a nga mu gela ku khene: “Na mkuku wu sanzi kuemba, nyamsi awe u na ni lamba kararu.” 62Se ene a to huma hahanze eya dila ngu txiviti.
Vawoneleli ve peka Jesu
(Matewu 26:67-68; Marku 14:65)
63Ngu yoneyo mbimo, avale va nga txi woneleta Jesu, va ti mu poyilela ni ku mu peka. 64Va txi mu tsiva maso, va txi mu wotisa, va txi kha vona:
“Hinga huta! I mani a nga kupeka kani?”
65Va txi mu ruketela kambe ngu marukelo o tala.
Jesu masoni Madhotani ka Hombe
(Matewu 26:59-66; Marku 14:55-64; Johani 18:19-24)
66Mbimo yi di nga txa, di to sengeletana dibanza da madhota a ditiko, vaphaxeli va hombe ni vabhali, ava va nga mteka va txi mu yisa Wulamuleloni kwawe. 67Se va txi m'gela ku kha vona:
“Ngako awe u di Mesiya, hi gele.”
Ene a to xamula a txi khene:
“Hambi ni txi mi gela, kha mi na mbi kholwa; 68Se ni txi mi wotisa kambe, kha mi na mbi ni xamula. 69Aniko kukhukhela ka yona yiya mbimo, Mwanana wa M'thu a na ya khalahatsha txineneni ka Txizimu txa mtamo wotshe!”
70Konaho, votshe va to angula, va txi kha vona:
“Se awe u Mwanana wa Txizimu, kani?”
Ene a to va xamula a txi khene:
“Mi womba tonato. Ngani!”
71Sekoko va to kwangula va txi kha vona:
“Hi ngadi hi txi na lava wufakazi wa txani kambe kani? Athu hipune ha mu engisa, a txi womba ngu txisofu txakwe.”
Tans Gekies:
Luka 22: BEC2016
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
A Bíblia em Txitxopi © Bible Society in Mozambique, 2016.