LUK 21
21
Himepe Banta Kipi Alam
(Mot. 12:41-44)
1Jisu lango aro ahem kime arleng hel apuru along banta kithal thekngo; 2anang ihut kicho kangwe himepe lalong tanga atheng hini kithal thekngo. 3Anang pulo, “Aserengsi ne nali thando, labang kicho kangwe himepesi anali ahuwit yok ongchot pilo; 4piyok pu tene analike odoi-okhoi kido parasi banta pilo, manta anangke labang kangwe yongta, kachibunsi kidoso, labang ahuwit pilo.
Jisu Arnam Ahem Kapangho Alam
(Mot. 24:1-2; Mrk. 13:1-2)
5Konam angkhan adun hel, Arnam ahem alam chithansi kido, pot badi kilang me-at arlong pen kikem aro banta hel Arnam aphan kipajir konbak kilang me-at, Jisu pulo, 6“Nang kithek labang arlong hel, konam labang hel isi athak isi tikangkesi warsi pasun detne, labang adin wange.”
Aduk-Tap Kihlong
(Mot. 24:3-14; Mrk. 13:3-13)
7Adunhel anangyok arjulo, “Paklang po, konam te ladi chiplange? Aro ladi kachiplang cheng-cheng yok pot te asin paklange?” 8Aro Jisu pulo, “Kangho duwar aga nali kiponpe yok mesone do; piyok pu tene amokha nemen pen wange aro puye, “Nesi anango! aro, “Aporpo adungo!” puye manta analiphel dunek. 9Konam nali dhawa aro kapangjar alam, arju tene phereyek, piyok pu tene mehel ango chiplang pene, manta kijut apor wangwe lang.” 10Laparake anang analiyok pulo, “Ason isi para isiyok chilang setsetne, aro longri isi para isiyok chilang setsetne; 11along along akal pen kiso awur aro chiklik akithe wange, sunengpe para phere-meme aro akithe asin paklange. 12“Manta lamehel kachiplang ango, arleng hel nali otne, duktap nali piye; kachirdom ahem bisar aphan champi ye aro akrol long thale; aro ne natsi naliyok recho pen gobornor adung nalipone. 13Labang aporsi nang Arnam alam kithan awak pahlong yok naliyok bangpomar chiplange. 14Lasi, nang thin long chipachip, nang pot than nange pu ke chironek. 15Piyok pu tene ladi alam aro agiyan ne nali piye aro nali hutur hel ihut ta lam teng un-eh ye, lale lampo wangwe yong puke nali pu un-eh ye. 16Aro nang ai, nang pa, nang muso, nang hem bang aro nanglok hel aro anali angkhan yok ke mariye. 17Naliyok ne natsi ahuwit ta nali sime. 18Manta nali phu achu ikokta ingbobe ye. 19Nali bithang kachihi ding parasi, nali abithang ajiu chipajok hlonge.
Jerusalem po Kapangho Alam Jisu Kithan
(Mot. 24:15-28; Mrk. 13:14-23)
20“Manta konam sonturihel para Jerusalem kikom det theknge, laparake prel dapbo pusi nali theknge. 21Laparake Judiya long kido abang inglongpe yok pakat nang, aro rongpe long kido abangke rongpe patikang nang aro bang alongri kido abangyok ke rongpe yok palut nek; 22piyok pu tene jipe kiwi alamthe do labang ahuwit kichok yoksi lamehel adin hel ke angban kipi arni badi wange. 23Labang arni agat kido oso hel aro mok kipi arloso hel konbak kaphere-meme apor wange! piyok pu tene longri jon aduk-tap, aro labang arleng hel aphuthak Arnam akang wange; 24analiyok nokjir pen mariye, aro ahuwit alongri ason hel asitem nepsi pone; aro Bang-ajat hel apor chokche lengke, Jerusalem yok Bang-ajat hel dong repme.
Arleng Aso Kiwange Alam
(Mot. 24:29-31; Mrk. 13:24-27)
25“La amun chiklo, arni, aro chiklolangso long ajat-jat asin paklange, aro pirthimipe longta langpe aro anang adul hel kangreng rul anat asonhel neng aduksi angthin klem detne. 26Pirthimipe long pot chiplange pusi arleng hel kapheresi arti ye; piyok pu tene ethakpe long apharan hel chihujuknge. 27Laparake anali apharan aro jortang aghai pensi “Arleng Aso inghun long kiwang” thek hlonge. 28Minon konam lamehel chiplangpon chenge, ingthurnot aro nangphu rungne angsong langnot, piyok pu tene nali kijoktang adung wang hlengdo.”
Dumuru Arongpe Para Kachirli Alam
(Mot. 24:36-44; Mrk. 13:32-37)
29Laparake anang athenghlan isi analiyok thano: “Dumuru arongpe pen ahuwit thengpe-thengso hel yok langot; 30thengpe arwo chingjok penpan phang-oh aporo adung wang hlengo pusi nali bithang thek. 31Labadisi, konam nali lamehel apot kachiplang theknge, Arnam-alongri adung het wanghlengdo pusi nali than une. 32Khanangsi ne nali thando, lamehel apot chok phrotphe lengke labang owepo prelpe ye. 33Ethakpe pen pirthimipe prel detne manta ne lamthe hel prelpe ye.
Trepsi Kanghong Nange Alam
(Mot. 24:36-44; Mrk. 13:32-37)
34“Trepne do, nali ingthin hel katiki kabunsi, kangri-kangkrang, aro cho-junle ke la-an kiduk chiron hapmek aro honjat badi labang adin nalilong photsi kiwangwe ayok, lasi nali bithang yok meso chilangwen, 35piyok pu tene labang adin pirthimipe dung kido ahuwit arleng hel aphuthak wange. 36Nali lamehel kachiplang apot hel para kachipajok ayok, aro Arleng Aso ango karjap unyok, aro labang anat arniten Arnam yok pingkit.” 37Arniten ta Jisu Arnam ahem long paklangsi kido, aro anuweke olesi daman aro Olip anglongpe along ajo do damman. 38Aro ahuwit arleng Arnam ahem long anang lam ka-one yok anang dung kiwang.
Tans Gekies:
LUK 21: AMRI-BSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.