LUK 5
5
Jisu Kataram Cheng Adunhel
1Konam Jisu Genesaret bilpe akung arjap dingsi kido, aro rat hel anangyok kom plengsi Arnam alam ka-one aphan ar-ih lo, 2anang tilong hini bilpe akung thekngo; aro ok-kirhi arleng hel tilong hel tikangsi anali lan hel cham jongsi kido. 3Jisu tilong isi along arlulo aro labang tilong ke Simon po atilong kido aro bilpe akung para bekso kapadol chotyok anang thano. Lapara ke anang iningsi tilong para arleng helyok Arnam alam thano. 4Konam anang lam kithan pajutno, anang Simon po yok pulo, “Lang abi aga ok kinep aphan lan pomar warnot.” 5Simon po pu phakngo, “Paklang po, hali ajo-pangthang tiki hokta beksota hlonghle yongot. Yongta nang lamthe ateng lan war phaknge.” 6Konam anali labadi waro, ok ako-ong ingjango aro anali lanpomar chingrak rang rango. 7Lasi anali kamprek ilong along kido alokjor helyok atewapisi pawang tolo aro anali parap tolo. Aro anali wango aro tilong hong-ni plengsop mo, lake mehel ardip rang-rango. 8Manta konam Simon Pitor po labang po thekngo, anang Jisu akeng-ari tarhuk bakngo, pulo, “O Hemphu, nang nedung para chiterekne damot, piyok pu tene neke ihut papi arleng!” 9Piyok pu tene anang aro ahuwit ta anangpen kido abangta anali ok ako-ong kihlong theksi asombhik hlong detno; 10aro ladisi Simon po alokjor Jibidi po asomar Jems po aro Johon po ta asombhik hlong detno. Laparake Simon po yok pulo, “Phere yek; minon parake nali munusi kirhi chiplang hlonge.” 11Konam anali tilong hel langpepe akung wano, anali kido kangwe abihini tikango aro anang pen duno.
Arje Ibeng Ihutyok Kiso Kapame
(Mot. 8:1-4; Mrk. 1:40-45)
12Iphong, konam Jisu rongpehel isi along kido, lalong arje-ibeng kiso arleng ihut kido. Konam anang Jisu yok thekngo, anang mahang lungle long tarhukngo aro chingduksi pulo, “Hemphu, nang anengdo, tene nang nepangthir une.” 13Laparake Jisu anang ari rung si, anangyok otno, aro pulo, “Ne aneng do. Ingthir phlen not.” Lajong jongsi arje-ibeng kiso anangyok tikango. 14Aro anang ihut yokta kithanthe yok anangyok thanklak ngo. “Damot,” anang pulo, “aro nangbithang bangthepo yok chipaklang damot, aro, Mosi po kithan badi, anali hakhi aphan, kachipangthir nibot pajir not.” 15Manta minonke anang lamthepo kahalo yokta chitha-ang detno; rat ako-ong anang lamthe ka-one yok aro anali so-lak hel kachipame yok wang chingrumo. 16Manta anang nisotjot athem yok chiterekngo aro pingkit damo.
Atot-Kangwe Kiso Arleng Ihutyok Kapame
17Inirsi ke, konam anang paklang jongsi kido, Galili aro Judiya arongten, aro Jerusalem para kiwang Pharisi aro kanong paklang hel anang dung iningsi kido; aro kiso kapame yok Hemphu apharan ananglong plengsi kido. 18La-amunsi angkhan arleng hel atot kangwe kiso arleng ihutyok hongpen chirchongsi wano. Anali anangyok hem arlo kiponyok aro Jisu ango kibipon yok chirono; 19manta rat ako-ong kido apot, awak hlonghle si sarnuk athak damo aro sarnuk phloksi anang tar pen rat asitem Jisu amahang pasuno. 20Konam anang lahel kikrol thekngo, anang pulo, “Ei khoi, nang paphel ron tango.” 21Laparake kanong paklang hel pen Pharisi hel adak chipujo lo, ‘Labang arlengpo inghote, Arnam yok haldongsi puman? Ihut Arnam aparke ingho te pap ron unman?’ 22Konam anali kachironhel thek krengsi Jisu anali yok pulo, “Nali ingthin long piyokte ladi akangho chirondo? 23Dak bangpo kipu jalso chot, ‘Nang pap hel rontango,’ kipusi ma lale ‘Ingthurnot aro kengkam chijornot’ kipusi jalsodak chot? 24Manta Arleng Aso pirthepe athak pap kiron unyok apharan do,” —bangpo nali kichithan unyok, anang atot kangwe kiso arlengpo yok pulo, “Ne nang thando, ingthur not, aro nang tarpo hem chi-ol ponot.” 25Lajongsi arlengpo rat hel ango thur penpansi ki-ih atar chi-ol lo aro Arnam yok bokhonesi hem damo. 26Anali ahuwit ta asombhik hlongsi chiphere detno aro anali Arnam yok bokhonesi pulo, “Mini ili ki-un-eh pen asombhik apot thek hlongo!”
Lebi poyok Jisu Kataram
(Mot. 9:9-13; Mrk. 2:13-17)
27Labang aphel, Jisu olesi damo, aro Lebi amen khajana kirung kalukdar ihutyok khajana nohok kirung ahem iningsi kido thekngo, aro Jisu anangyok pulo, “Nephel angdunot.” 28Anang thuro, kido kangwe abihini tikango aro anangpen wangduno. 29Lapara ke Lebipo anang hem along Jisu aphan akithe chojun honjokngo; aro lalong ako-ong kalukdar aro kamprek arleng hel kicho ahonglong ining duno. 30Pharisi hel pen anali kanong paklang hel theksi Jisu adun hel yok ado kolsi pulo, “Piyok te nali kalukdar hel aro papi hel pensi inan cho jundo?” 31Jisu analiyok pulo, “Akime arleng aphan dactor nangne; manta kiso-kilak abangsi kanange do; 32ne dhorom kangthir ayok kataram aphan kalek; manta neng kachipharlep papi hel kataram aphansi wangdo.”
An-kihum Alam Karju
(Mot. 9:14-17; Mrk. 2:18-22)
33Laparake anali Jisu yok pulo, “Johon po adun hel ke an-hum Pharisi hel badi an-hum jongdo aro pingkit do, manta nang adun helke choman aro junman.” 34Jisu analiyok pulo, “Nang jorme pachihap long don helyok osopo kido alengke an pahum rul un ma? 35Inirsi ladi apor wang hlenge la-arnike osopo yok anali para pon detne aro la aporsi anali an-humme.” 36Anang isi athenghlan pensi analiyok thano: “Ihut ta akimi ape para icherta ingsekse aro aban ape athak bang-tunte, ladi ote tene anang akimipo chingseknge aro akimi ape, aban ape pen michangche ye. 37Aro aban areng mathi long akimi alang ahor kaita thalthe; thal yongta, akime ahorpo labang mathipo inghoman, aro alangta jangdet man, aro mathipo modet man. 38Manta hor-akimi ke akimi thon-thon areng mathi alongsi thal pon nange. 39Aro hor aban po junsi, kaita akimi ahoryok aneng weman, manta puman, “Abanpo si akime.”
Tans Gekies:
LUK 5: AMRI-BSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.