LUKAS 23
23
Isa ri a'rakanna Pilatus
23:1-7
(Mat. 27:1-2, 11-14; Mark. 15:1-5; Yah. 18:28-38)
1Jari ammenteng ngase'mu tau a'rappung injo na laparapa'i Isa mange ri Pilatus. 2Ri injo pakaramulamu lapitinai Isa, lakua, ”Kambe tauppai ma'nassana tau inni laajara salai bangsaba, na appisangkai a'bajara bea mange ri kaisar, na passala ri kalenNa lapaui ma'nassana Iamo Almase, iamo intu Karaeng.” 3Akuta'nangi Pilatus mange ri Isa, ”Kaumoka Karaeng tau Yahudi?” Pappihalinna Isa, ”Kaumo appau.” 4Appaui Pilatus mange risikonjo imang ponggaha na ri tau lohe rie' ri injo, ”Gelea nguppa kasalaang manna siso'di' ri tau inni.” 5Mingka pela' bakkaki sa'ranna appau, lakua, ”Ia ngajara salai tau lohe riajaranNa risibatu Yudea, pakaramula ri Galilea na ambattumu mae konni.” 6Rihattu lalangngere'na injo akkuta'nangi Pilatus, Apa tau intu se'rei tau battu ri Galilea? 7Sungka'i laisse' ma'nassana Isa tau battu ripamarentaanna Herodes, ia lasuro erangi Isa mange ri Herodes, narihattu injo rie' todo'i ri Yerusalem.
Isa ri a'rakanna Herodes
23:8-12
8Rihattunna Herodes lajanjangi Isa, ia sanna' rannuna. Saba' sangga sallomo ia a'ra' lajanjang, kanara ia sanging lalangngere passala'na Isa na ampa pole ia tutajalli akkulle lajanjang anteekamua ta'ranna Isa appaa'jari se're numasagala. 9Ia assare lohe pakkuta'nang mange ri Isa, mingka Isa gele appihali. 10Rihattu injomo sikonjo imang ponggaha na guru Tora' rieki todo'i mange ri a'rakang na tulusu appitinai mange ri Isa. 11Injo pole Herodes surang tantarana assalla na attua-tua ri Isa, lapipakei baju bakka' kakaraengang mange ri Isa ampai lasuro erang muliang mange ri Pilatus. 12Ri allo injo ampamu a'baji' Herodes surang Pilatus; rigelenapa injo assibaliangi.
Riparapa'i muliang Isa ri Pilatus
23:13-25
(Mat. 27:15-26; Mark. 15:6-15; Yah. 18:38–19:16)
13Jari Pilatus lapasse'rei sikonjo imang ponggaha na sikonjo ponggaha surang lohe pole tau maraeng, 14na appaui mange ri iyai, ”Muerangi tau inni mae ri nakke assimpole tungajara sala ri tau lohea. Janjangi, Ia maemmu kuparessa ri a'rakammu, na battu risikonjo kasalaang numupitina injo mange ri Ia gelekale rie' kurumpa'. 15Herodes gele todo'i anrumpa' kasalaanna, injomo saba'na ia lasuro erangi muliang mae ri kambe. Sitoje'na gele rie' manna siso'di' ripanggeokanNa nusiratang larihukkungang matei. 16Jari, lakurabunna jua, ampai kulappasang.” [ 17Saba' parallui allappasang se're tau ritarungku ri iyai ri allo passua'-suarang injo.] 18Mingka assama-samai a'gora bakka', ”Hunoi Isa, na Barabasmo lappasangangkang!” 19Barabas inni ripantama'i ri pattarungkuang saba' maengi appakajuja lalang ri kota na kanara ripamunoang. 20Sikalipa pole appau bakka'i Pilatus mange ri iyai, saba' ia a'ra'i lalappasang Isa. 21Mingka tulusu a'gora bakka'i lapihalii, lakuai, ”Salli'i Isa! Salli'i Isa!” 22Lakua Pilatus makapintallunna mange ri iyai, ”Sitoje'na panggeokang daa anteekamua numaeng lageokang tau inni? Gele rie' kasalaang manna siso'di' kurumpa ri Ia, nasiratangi larihukkung mate. Jari, lakurabunna jua, ampai kulappasang.” 23Mingka a'gora bakka' ngase'i massa-massa na laerai, solanna Ia risalli', kateppusanna ambetai ripa'gora-gora bakka'nai. 24Jari latappuki Pilatus, solanna laturuki ripangeranai. 25Ia lalappasangi tau ripantama' injo ri pattarungkuang saba' appakajuja na ripamunoang injo assituru' ripangeranai, mingka Isa lapassareangi mange ri iyai laripaa'jari assituru' a'ra'nai.
Isa rierang larisalli'
23:26-32
26Rihattu laeranginnamo Isa, akkeo'i se're tau riareng Simon battu ri Kirene, tuampa rie' battu pantanrang kota, maeng injo lataroi salli' injo rate ri salangganna, solanna lasompo ampai minahang ri Isa. 27Sanna' lohena tau lapinahangi Isa; na lohe todo' tau bahine lapammarrangangi na laparaui. 28A'gilingi Isa mange ri iyai na lakua, ”Oe tau bahinena Yerusalem, akomo mupammarranganga, mingka kalemmu tommo mupammarrangang surang ana'-ana'mu! 29Saba' janjangi, larie' hattunna lalapaui tau: Sunggulalo bahine tamanang na pompong gele injo minang allaherang ana', surang tugele injo minang appasusu. 30#Hos. 10:8; Pan. 6:16Jari pakaramulamu tau inni lappau mange risikonjo bonto: La'boromoko taburikang mae! na mange risikonjo buttu: Tambungimakang mae! 31Saba' ampa tau a'geo' appakonjo injo ri kaju attallasa, la'bipa pole nulaa'jari injo ri kaju mate?”
32Rie' todo' rua tau maraeng rirenreng, iamo intu rua tau palukka' bakka' larihukkung mate surangi Isa.
Isa risalli'
23:33-43
(Mat. 27:33-44; Mark. 15:22-32; Yah. 19:17-24)
33Sungka'i ambattumo ri tampa' nuriare' injo Bonto Ka'daroulu, lasallikimu Isa ri injo surang ruaiya palukka' bakka', se're risa'ri kananNa na se're risa'ri kairinNa. 34#Mzm. 22:19Appaui Isa: ”O Amma, riampungi kadorakaannai, saba' gele lapahang apa lageokangi.” Rihattu injo anggorongimu tantara injo laladahu-dahui pakeanNa. 35Tau lohe ammenteng injo na lajanjangi sikuanna. Mingka sikonjo ponggaha attua-tuai ri Isa, lakua, ”Tau maraeng lapakasalama', konni-konnia lappasang tommoi mange Ia tompa lapakasalama' kalenNa, ampa pade' Iamo Almase, tau ripile injo ri Allataala.” 36Tantara injo attua-tua todo'i ri Ia; lapatanjoangi anggoro kassi mange ri Ia 37na lakua, ”Ampa kaumo Karaeng tau Yahudi, pakasalama'i kalemMu!” 38Rie' todo' ukirang rateang ulunNa, ”Iamo inni Karaenna tau Yahudi.”
39Sala se're tau palukka' bakka' uranna Isa risalli' appau daa ri Ia, lakua, ”Gelejua kaumo Almase? Pakasalama'i kalemMu na kambe.” 40Mingka sitauang injo lapisangkai, lakua, ”Geleko malla' manna ri Allataala, saba' assimpolei hukkungang muuppa injo? 41Ditte inni siratangki rihukkung, saba' riuppamu pa'balasa nusiratang battu ripanggeokanta, mingka tau inni gelekale rie' geo' salana manna siso'di'.” 42Maeng injo appaui, ”Isa, riu'rangia, ampa rie'Ki mae assimpole Karaeng.” 43Lakua Isa mange ri ia, ”Sitoje'na Nakke appau ri kau, allo innimo kau assurangki lalang ri Suruga.”
Matei Isa
23:44-49
(Mat. 27:45-46; Mark. 15:33-41; Yah. 19:28-30)
44Sungka'i latette' sampuloruamo ritangnga allona na sikali kalammangi laappu tampa' injo sa'genna tette' tallu, 45#Kel. 26:31-33saba' gele assau matanna allo. Kaeng ampang-ampang rie' injo lalang ri Sapo Tangkasa bissa'i a'jari rua. 46#Mzm. 31:6Maeng injo appaui Isa bakka' sa'ranNa, ”O Amma, lalang ri limamMu Kupassareang nyahaKu.” Rimaenna appau appakonjo tappu'mu nyahaNa. 47Sungka'i ponggahana tantara injo lajanjang apa kajariang, ia lapakala'biri Allataala, lakua, ”Toje'i, tau inni tide' salaNa!” 48Sungka'i sikuanna tau lohe, tubattu injo a'domung ri injo lanilingi, lajanjangimu apa kajariang, muliangimu ampai lajaguri kalenna. 49#Luk. 8:2-3Sikuanna tau uranna assiisse' Isa, antama' todo'i bahi'-bahine tuminahang injo battu ri Galilea, ammenteng dere ngase'i lajanjangi iangase'na nua'jari ri injo.
Isa riloangang
23:50-56a
(Mat. 27:57-61; Mark. 15:42-47; Yah. 19:38-42)
50Rie'mo se're tau riareng Yusuf. Ia se'rei urang ri Pangadelang Agama, na se'rei tau baji' na naba todo'i. Ia gele assamaturu' ripanappukinna surang ripanggeokanna hakking injo. 51Ia tau battu ri Arimatea, se're kota Yahudi na ia latajang-tajangi Pakkaraengang Allataala. 52Iamo a'lampa mange ri Pilatus na laerai batangkalenna Isa. 53Rimaennamo lapanaung batangkalenna Isa battu ri salli', ia laroko'i kaeng lenan, ampai lapaonrang lalang ri kuburu ta'keke ri batu a'poong, na nugelepa minang ripappaonrangi tau mate. 54Allo injo allo pappasadiaang na a'birimmu laantama' allo Passambajangang.
55Sikonjo bahine rieki injo assurangi Isa battu ri Galilea, minahangi todo'i na lajanjangi kuburu injo na anteekamua batangkalenNa ripaonrang. 56aSungka'i muliangimo, appakasadiaimu rampa-rampa na minnya' hondu.
Attallasai muliang Isa
23:56b–24:12
(Mat. 28:1-10; Mark. 16:1-8; Yah. 20:1-10)
56b #
Kel. 20:10; Ul. 5:14 Ri allo Passambajangang injo ammari-mari ngase'i anjama assituru' hukkung Tora'.
Tans Gekies:
LUKAS 23: LAI_SLY
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
@LAI 2012 Indonesian Bible Society (Lembaga Alkitab Indonesia)