MATIUS 2
2
Tau Majusi battu ri Timoro
2:1-12
1Rimaennamo Isa rilaherang ri Betlehem ri tana Yudea ri jammanna karaeng Herodes, rie'mo tau majusi battu ri Timoro mange ri Yerusalem 2na akkuta'nangi, ”Ri anteei mae Ia, karaeng tau Yahudi ampa injo rilaherang? Kambe maemmu tajanjang bintoenNa ri Timoro na kambe rie'kang mae lanyomba ri Ia.” 3Rihattu lalangngere'na karaeng Herodes passala injo ia sanna' ta'bangkana surang sibatu Yerusalem. 4Jari lapasse'remu sikonjo imang ponggaha na guru Tora' tau Yahudi, maeng injo ngerai panguppa battu ri iyai, ri antee mae Almase larianakang. 5Appauimu mange ri ia, ”Ri Betlehem ri tana Yudea, saba' appakonjomu rie' ta'ukiri lalang ri kitta' nabbi: 6#Mi. 5:1Na kau Betlehem, tana Yehuda, kau gele lakaminang ki'di' battu ri iyai tumarenta injo ri Yehuda, saba' battu ri kau laammumba se're' ponggaha, lalakalahaki umma'Ku Israele.” 7Jari assa'bu-sa'bu Herodes lakeo' tau Majusi injo na lakuta'nang baji'i mange ri iyai risikuraiya bintoeng injo na pakaramula kajanjangang. 8Maeng injo ia lasuroimu mange ri Betlehem, pauna, ”A'lampako na boja baji'i Ana' injo na ampa muuppaimu, lassiriko assare kareba mae ri nakke solanna nakke pole a'lampa mange nyomba ri Ia.” 9Sungka'i maeng lalangngere pauna karaeng injo, a'lampaimu. Janjangimu, bintoeng nulajanjangi injo ri timoro lapilombai sa'genna larapi' na attaangi rise're tampa', ripammarianna Ana' injo. 10Rihattu lajanjanna bintoeng injo, sanna'mu rannuinna. 11Antamakimu ri sapo injo na lajanjangi Ana' injo surang Maria, idonNa, jari joppa'i nyomba ri Ia. Labungkarimu tampa' pa'barang-barangang laerang injo na lapassidakkaangi mange ri Ia, iamo intu bulaeng, dupa, na gambere. 12Maeng injo kanara ripiu'rangi riso'na, solanna andai muliang mange ri Herodes, muliangimu mange ri kamponna a'molong ripa'lalangang maraeng.
Amminsa'bu' mange ri tana Massere
2:13-15
13Sungka'i a'lampaimo tau majusi injo, kajanjangammu malaeka'na Allataala mange ri Yusuf lalang riso'na na appaui, ”Ambaungko, alle Ana' intu surang idonNa, a'lampako mange ri tana Massere na ammariko konjomange sa'gengKu appau mange ri kau, saba' Herodes a'ra'i laboja Ana' intu lalahuno.” 14Jari ambaummu Yusuf, laalle Ana' injo surang idonNa ribangngina juapa, ampai a'lampa mange ri tana Massere, 15#Hos. 11:1na ammari konjomange sa'genna mate karaeng Herodes. Passala injo a'jari solanna ripa'rupa numaeng lapau injo Allataala patteteang ri nabbi: ”Battu ri Massere Kukeo' Ana'Ku.”
Pamunoang ana' ki'di' ri Betlehem
2:16-18
16Rihattu laisse'na Herodes ma'nassana ia ribura-burai ri tau majusi injo, sarromu kuku'na. Jari lasuro huno ngase'i sikonjo ana' ki'di' rie' ri Betlehem surang riampi'-ampi'na, iamo intu ana' a'ummuru ruang taung naungang, assituru' hattu nulapakkuta'nangang baji' injo mange ri tau majusi injo. 17Ri appakonjona ripa'rupamu pau nulapabattu injo patteteang ri Nabbi Yeremia: 18#Yer. 31:15”Kalangngeram mu sa'ra ri Rama, pammarrangang na parau sanna' pa'risi'na; Rahel lapammarrangang ana'na na ia gele a'ra' risihi-sihi, saba' geleimu rieki.”
Muliangi battu ri tana Massere
2:19-23
19Sungka'i matemo Herodes, kajanjangammu malaeka' Allataala mange ri Yusuf lalang riso'na ri tana Massere, lakua, 20”Apparuruko, alle Ana' intu surang idonNa na a'lampako mange ri tana Israele, saba' iyai tua'ra' injo lahuno Ana' intu, matemu.” 21Jari apparuru toje'mu Yusuf, laalle Ana' injo surang idonNa na a'lampai mange ri tana Israele. 22Mingka rihattu lalangngere'na ma'nassana Arkhelaus a'jari karaeng ri Yudea lasambei Herodes, ammanna, ia malla'i mange konjo. Saba' ripiu'rangi lalang riso'na, a'lampai Yusuf mange ri Galilea. 23#Mark. 1:24; Luk. 2:39; Yah. 1:45Riambattuna ri injo ia ammari rise're kota nuriare' Nazaret. Passala injo a'jari solanna ripa'rupa pau nulapabattu injo patteteang risikonjo nabbi ma'nassana Ia lariare'i: ”Tau Nazaret.”
Tans Gekies:
MATIUS 2: LAI_SLY
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
@LAI 2012 Indonesian Bible Society (Lembaga Alkitab Indonesia)