Maliko 3
3
Yesu akumuhonya mnt'hu mui siku ya Humulo
Matayo 12:9,14; Luka 6:6,11
1Siku imwenga ya Humulo, Yesu akeingila kaidi muna ikaya ya kufikanila Wayaudi na uko kukala na mnt'hu aholole mkono. 2Mafalisayo wamwenga wakamgozela Yesu amuhonye mnt'hu iyo muna Siku ya Humulo ili wapate mbuli ya kumgwilila. 3Yesu akamulongela ila mnt'hu aholole mkono “Inzo hano hagati.” 4Kamala, Yesu akawauza wala wakalile wakulonda mbuli ya kumgwilila, “Vino, Malagilizo yetu yakulonda chitende mbwani muna Isiku ya Humulo? Kutenda mbuli zidamane egu zihile? Kuhonya want'hu egu kwangamiza?” Mbali ao wakala wabule cha kulonga.
5Yesu akawalola wose kwa maya habwedezwe kwa vila hawamtogole akamulongela ila mnt'hu, “Golola mkono wako.” Nae akaugolola mkono wake nao ukahona. 6Ahoaho Mafalisayo hamwenga na want'hu wakalile wakumtaza Helode wakalawa kunze wakalonda nzila ya kumkoma Yesu.
Uyama wa want'hu ukumkola Yesu
7Yesu akasegela hamwenga na wanahina wake akaita ubanzi wa kulawila zua mnk'handa mwa ziwa Galilaya na want'hu wengi wakamkola. Want'hu ao wakala walawa Galilaya na Yudea, 8Want'hu ao wamkola Yesu kwa vila wahulika mbuli nyingi azitendile. Want'hu ao walawa Galilaya Yudea na Yelusalemu na Idumea na mwambo mwa mto Yolidani na banzi za Tilo na Sidoni. 9Yesu akawalongela wanahina wake wamsasalile dalu dimwe kwa vila want'hu wakala wengi ili wasekumsunk'hasunk'ha. 10Kwavila kawahonya want'hu wengi wala watamu wose wakawa wakumsunk'hasunk'ha wakulonda kumtoza. 11Na want'hu wakalile wamukilwa na vinyamkela ivo wamuonile Yesu wakatowa mavindi hasi halongozi ha Yesu wakaguta mazange wakalonga, “Weye ni Mwana wa Mulungu!”
12Mbali Yesu akavibwakila vila vinyamkela visekuwalongela want'hu gesa yeye niyani.
Yesu akuwasagula want'hu kuwa watumigwa
Matayo 10:1,4; Luka 6:12,16
13Yesu akakwela kudigamba na akawatanga wala awalondile. Na ao wakamkola, 14nae akawasagula want'hu kumi na waidi na akawatanga watumigwa. Akalonga, “Niwasagula mweye muwe hamwenga na nie vilavila naniwatume kuzilonga Mbuli Zidamane, 15na kuwenk'ha udahi wa kuviinga vinyamkela viwalawe want'hu.”
16Wano ndo want'hu kumi na waidi wasaguligwe na Yesu. Saimoni ndo amtangile Petulo 17na Yakobo mwana wa Zebedayo na Yohana ndugu yake Yakobo awatangile zina Boanelige, manake wana wa mdudumo 18na Andelea na Filipo na Batolomayo na Matayo na Tomaso na Yakobo wa Alifayo na Tadei na Saimoni mtoanila isi yake 19na Yuda Isikalioti ila ezile kumbiduka Yesu.
Yesu ni mkulu kuhuma Belizebuli
Matayo 12:22-32; Luka 11:14,23; 12:10
20Kamala Yesu akabwela ukaya want'hu wengi wakaiduganya kaidi hadi Yesu na wanahina wake hawapatile nyafasi ya kudya ndiya kwa vila kakala akuwasank'hanila want'hu. 21Ndugu zake ivo wahulike mbuli iyo wakalawa na kwita kumsola, kwa vila want'hu wakala wakulonga, “Ana chilalu.”
22Nao wafunza Malagilizo ya Musa walawile Yelusalemu wakalonga, “Akulongozwa na Belizebuli na akulava vinyamkela kwa want'hu kwa nguvu ya Belizabuli mkulu wa vinyamkela.”
23Aho Yesu akawatanga na kuwalongela kwa mlinganyo uno, mwenembago akudahaze kuiinga yeye mwenyewe? 24Kwa vila umwene ukaimwaga mmapelela haukudaha kugendelela. 25Kamala na want'hu wa kaya imwe wakaimwaga mmapelela, kaya iyo sekeigendelele. 26Ivo elo umwene wa mwenembago ukaimwaga mmapelela, haukudaha kugendelela, umwene uo nauwangamile.
27Habule mnt'hu akudaha kuingila mui kaya ya mnt'hu mwenye nguvu na kusola vint'hu vake bila ya kumgwila na kumkoteleza. Akamkotela ndo naanduse kusola vint'hu vake.
28Kweli huwalongeleni, zambi zose na madusi yose want'hu wadukane nawahalavilwe, 29mbali mnt'hu akulonda kumkufulu Muhe wa Mulungu sekeahalaviligwe zambi zake mbwi! Ivo naawe ana zambi siku zose.
30Yesu kalonga mbuli izo, kwa vila walonga akulongozwa na Belizebuli.
Ndugu wa kweli wa Yesu
Matayo 12:46,50; Luka 8:19,21
31Mami yake na ndugu zake Yesu wakafika hant'hu eli Yesu. Na wakatimalala kunze wakamtuma mnt'hu akamtange. 32Want'hu wengi wakala hant'hu hala wamzulunguka Yesu na wamwenga wakamulongela, “Mami yako na ndugu zako wakunze waukulonda.”
33Mbali Yesu akawauza, “Mami yangu na ndugu zangu walihi?”
34Akawalola wala want'hu wakalile wamzunguka na kuwalongela, “Loleni want'hu wano ndo mami yangu na ndugu zangu!” 35“Mnt'hu yoyote akutenda yala yakumbwedeza Mulungu iyo ndo mami yangu na ndugu yangu.”
Tans Gekies:
Maliko 3: DBV
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
The New Testament in Dowe @The Word for The World International and Dowe Language translation. All rights reserved.