Markus 16
16
Yesuse npaling hawe
1Sabtuca ni doram, orasna maralapise to wol Sabatca, wol ta smat agama Yahudina rkarajan pa, Salome, Maria smat Magdala fare Maria Yakobuse hnye, rfane rgon egat ta pauna mafia bo rmomsa Yesuse ni mayatca. 2Gabe wol gerejaca, orasna wolca bo nca, si rfan lali piling goaca. 3Mali lalingca fapaluan si rfauwo si, “Ya, gabe tlafo pulina, ise ta bo nfaulol pat cia bo ite tcung namu pilingca lolo?” 4Bo rdahle Yesuse ni pilingca to, si dem pat cia namolole to. Bo temna patca nmamagalna gaole.
5Oras ta si rcung namul pilingca lolo, si rgarayan ningalena si dem waiman isa npake juba bubulang ntotolang mali welana. 6Gabe waimanca nua si, “Mati famcaitna! Mewe fiyawa Yesus smat Nasaret ta rcalipi cia. I npaling hawe. I mantane pa. Co mewe fem! Tae gagaw ta si dising I ni mayatcana. 7Gabe tane, fpalane mewe to, fabinga I ni muritna fare Petrus bena fu, ‘Yesuse ntuba lali batang Galilea to. Pulina mew osta fem I, laisa ta I nua mewe tona.’ ”
8Rlonga tina, si damcait denabe damderer gabe rcapang mali piling cia. Poko be caitca, mali lalingca fapaluanna si isa-isa liori pa.
[Oras si rlafo, si rfabinga Yesuse ni fatnaw tina lali Petrus i fare murit ta nesana. Si rmautingna mlanga pa. Fola tina, Yesuse ntutuling npake ni muritna rfabinga Abar Mafia lali smatna, mulain po lawo denabe po lewo. Abar Mafia cia mfalaisa smatna rtub re Jou Lahatallana denabe lali. Abar Mafia cia namolang fare imana turus.]
Yesuse nfaeme ni dirica lali ni muritna
9Gerejaca dororam isube, oras Yesuse npalinge to, Yesuse nfaem I ni dirica lali Maria smat Magdalaca. Maria cia ta Yesuse nfaungo setan sifit mali ii. 10Gabe Maria nfane ga nfabinga smat ta jaga rderera Yesusna, ahai ta i nemna. Oras ciana si wlorina kangela gabe rtangis. 11Ga oras ta si rlonga Maria nu Yesuse npaling hawe fare i nem I, si rdela pa.
12Fola tina, Yesus nfaeme ni dirica lali murit smat silu ta bo rfan lali pnu i. Oras ciana si rfayala Yesus pa, ningalena si dem Yesuse ni kler nesa. Lomanta mnu taga rfayala I. 13Gabe smat silu tasa rpalanci ga rfabinga riri del ta nesana. Ga si riri delna ma rdela pa bena.
Yesuse ncula ni muritna
14Morco napna, Yesuse nfaemi lali ni murit yafasa re isa tasa oras ciana si rceli. Gabe Yesuse ntolea si, ningalena si wlorina cicoal fare si rdela smat ta demna pa, I npaling hawe. 15Fola tina Yesuse nua si, “Ffane to mali farumi dunia tae, bo ffabinga Abar Mafia mali Jou Lahatalla I lali farumi smatna. 16Ise ta ndela fare nduk waya rsisopca, i osta ncalamat. Ga ise ta ndela Ya pa, i osta ncalamat pa ga nduk sal. 17Smat ta rdela Ya tina, Jou Lahatalla osta npo si kawasa bo rpei fafayal laisa tane: Si osta rfaungo setanna rpake Ya ngahnyok, si osta rmauting rpake mauting ta si rto bahnga paubena, 18si le ma osta dice gu, fare si biarega rdom racong rpei paisapa. Si osta rfatige kakamorina mali smat ta dowilna, fare smat ta dowilna rmafia.”
19Jou Yesuse nmautinge fola re ni muritna, I ndawil nais sorogai, taga ntotolang mali gagaw ta nmafia cia mali Jou Lahatalla ni welana. 20Fola tina, Yesuse ni muritna rfan lali farumi smatna rfabinga Jou Yesus Kristuse ni Abar Mafia. Ga Jouca ma n'gali si rpei mujizat bo smatna ndadi rto Jou Lahatalla nmautingna fatutua.
Tans Gekies:
Markus 16: BZQ
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
2026 Indonesian Bible Society