Kesikpɛkpɛ 4
4
Kain nɛ̀ Abel
1Aɖam awɔsɔ̃ nɛ̀ yɛedzini Eva, kɛlɛ emunu ɛya kɛlɛ amɔ Kain. Aɖɔ asɛ, "Nɛ Apalete Akaa tɛpɛplɛnɔ mɛ ɛmɔ anyɛ." 2Kɛlɛ kidemeɛ amɔ́ yɛadzya Abel.
Otsiɛ nɔ Abel ezelu baagã, kɛlɛ Kain ázadɛ bɔya. 3Nɛ kibe teli kidiɛ Kain alɔkɔ yɛ bɔya mɛ bɔdɔ̃ amana Apaleteɛ asɛ bɔdɔ̃kɔkɔ ana. 4Pɔɔ Abel amana baagã gɛ ishumɛ gbaŋgbaŋ nɛ bɔbɔ zã balɛ ishu odenɔ yɛ baagã beeyie gɛeputɔ mɛ. Abel yɛ bɔdɔ̃kɔkɔ eku Apaleteɛ awɔ̃, 5pɔɔ Kain yɛ bɔdɔ̃kɔkɔ egiku yɛ awɔ̃. Kliso Kain akpɛ ɔmɔpɔɛ, kɛlɛ yɛ bameɛ ku otumũ.
6Kidegbaa Apaleteɛ ebisi Kain asɛ, "Kɛlɛso pɛ wɔ baameɛ eku otumũ ana? 7Ɔbhɛtɛ kibui gbangbã, batɛ bayɛkɛ wɔ dza? Pɔɔ ɔgɛ bhɛtɛ kibui gbangbã, kibuikpa bhɛbhɛtɛ aabata wɔ; kɛpɛ sɛtɛ yɛkɛ wɔ mɛ, pɔɔ kɛlɛ sɛ ɔŋã kɛlɛ abha."
8Otsialɛ Kain etseɖe yɛadzya Abel asɛ, "Kɔ tɛ bɔvɛ ayakpa mɛ. Kɛlɛ gɛ bakpasɛ ayakpaa mɛɛ, Kain alɔ atɔ̃ yɛadzya kɛlɛ eyii.
9Kidegbaa Apaleteɛ ebisi Kain asɛ, "Fakɔ wɔadzya Abel alɛ?"
Adɛmɛ akɔɛ asɛ, "Itinyi. Mɛɛ ɛbalɛ mɛadzyaa dza?"
10Apaleteɛ ebisi yɛasɛ, "Keɖe wɔ bhɛtɛ ana dza? Oolũa! Wɔ adzya yɛ dzosu nɔ ebi yoyo akɔmɛ denɔ tisiɛ mɛ. 11Otsi kibuiɖɔkpɛanɔ gɛ ede tisie mɛ, gɛ adãlɛ yɛ olũgbũɔ tɛ ayɛkɛ wɔ adzya yɛ dzosuu nɔ denɔ wɔ ahɔɛ mɛ, etsi ɖi wɔ abha. 12Onu pɛ ɔwa kesiakpaa, kazaa kɔ wɔ bɔŋãŋã. Anyɔnyɔ̃elete gɛ yɛishumɛ gɛ yɔ obodzi nɛ kesiakpa nabha."
13Kain etseɖe Apaleteɛ asɛ, "Mɛ baatɔ̃pɔpɔ̃ ekpe dɛ kana gɛ ɛbala. 14Obuɔ ɔkaka mɛ ɔshɛnɔ nɛ kesiakpa nabha, kɛlɛ ɛbakpũ denɔ wɔshu; ɛbadzi anyɔnyɔ̃elete gɛ yɛ ishumɛ gɛ yɔ nɛ kesiakpa nabha, kɛlɛ anɔnyianɔ gɛ amɔ mɛ ebe yi mɛ."
15Pɔɔ Apaleteɛ etseɖe asɛ, "Kɛma ɛlɛ mɛ ana; onupɛ anɔnyianɔ gɛ eyi Kain, abamɔ kɛlɛ tɛbuibuia bɔtɛ tegegene nɛ kɛlɛ abha tɛtɔtɔɖɔ." Kɛlideɛ, Apaleteɛ alɔkɔ kɛwɔ̃ tɔɖɔ Kain abha tɛ anɔnyianɔ tibe yii gɛ amɔɛ. 16Kliso Kain ashɛ nɛ Apaleteɛ ɔbha kɛlɛ adɛ zã Nɔd kesiakpa nabha.
17Kain awɔsɔ̃ nɛ yɛedzini kɛlɛ emunu ɛya kɛlɛ amɔ Enɔki. Kibeelɛ Kain aza bhɔ ɔma hohoe teli, kɛlɛ alɔkɔ yeyi anyɛɛ Enɔki kinyeɛ akɔ ɔmaa. 18Bamɔ Iraɖi akɔ Enɔk, kɛlɛ Iraɖi edzi aka kɔ Mehudzael, kɛlɛ Mehudzael edzi aka akɔ Lamɛk.
19Lamɛk agbana baadzɛ taabha, tenikpo nɔ kinyeɛ kɛlinu Aɖa kɛlɛ abhala bekuli yɛasɛ Zila. 20Aɖah amɔ Dzabal; yɛedzi aka kɔ baagɛ baazã kɛpɔtɛ agbã buvũɔ mɛ pɛ beelu baagã. 21Yɛadzya kinyeɛ kɛlinu Dzubal; yɛedzi aka akɔ baagɛ beepho dzita nɛ buxole. 22Zila tsyɛ amɔ eyianyɛ, Tubal-Kain, gɛ aafatɛ bɔxɔɛwadɔ̃ ediedi denɔ ɔɖatɛpɛ̃ nɛ kɛklagbuɔɖa mɛ. Tubal-Kain yɛadaa nɔ yɛedzi Naama.
23Lamɛk etseɖe yɛedzini alɛ,
"Aɖa nɛ Zila, nolũ mɛ kaɖɔ;
Lamɛk yɛedzini alɛ, nolũ mɛ ebuieɛ.
Iyi anyɛ teli gɛ akpɛ kɛpɔ̃ nɛ mɛishu,
ayĩsɔ̃ gɛ akpɛ kibi nɛ mɛishu so.
24Onu pɛ babhɛtɛ kɛkpa tɔɖɔ kɛkpa abha butegegene akɔ Kain,
kɛlɛ kekpa bhɛbhɛtɛ tɔɖɔ kɛkpa abha afɛtegegene nɛ̀ tegegene ba babhɛtɛ tɔɖɔ akɔ Lamek."
25Aɖam nɛ yɛedzini baza wɔsɔ̃, kɛlɛ bamɔ anyɛ kɛlɛ bakɔ yɛinye asɛ Seeti, gɛ kɛliesi kɛlinu asɛ, "Owusoso Akaa aza kɔmɛ eyi bhlatɔ akpɛ Abel ɔzãkɔ, gɛ Kain eyíí so." 26Seeti tsyɛ amɔ anyɛ, kɛlɛ akɔ yɛinye asɛ Enɔshi.
Kibee elɛ mɛ baanɔ akpa Apalete yɛinyeɛ kulu.
Tans Gekies:
Kesikpɛkpɛ 4: NYB
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
2026 Ghana Institute of Languages, Literacy and Bible Translation GILLBT
