गलाती 3
3
परमेसर आला बरदान बिसवास तरअः भेटाआ
1ए का बुझाअ वाला गलातीकु, ओके आपे के जादु केदपेआकु? आपे केदो जामाकु मड़ांग रे, ईसु ख्रीस्त आला कुरूस रअः मराईन रअः पूरा जानकारी एम लअः ताहिना! 2ईङ आपे तरअः नुमिन पा-पाड़ी चहाअ तानिङ, ची आपे के कनहुन के प-पालन रेनअः चलते आतमा रअः बरदान भेटाव ताना चाहे बेस खभाईर रअः सन्देस आ-आयुम आउर बिसवास रअः चलते? 3एतान आपे नुमिन बे-समझापे ची आपे जिनगी के आतमा तरअः एहेःब लआपे! नहाअः होना के अपन होड़ो रअः सवांग तरअः आअखरी चहाअ तानापे? 4एतान आपे के बेकार रअः नुमिन दुख भेटाव नेना? ईङ के नोकान बिसवास कनोआँ! 5जब परमेसर आपे के आतमा रअः बराकाईत एमेआय आउर आपे ताला रे समरथ काम देखायाय, दो एतान होना कनहुन रअः काम चलते नोका नेआय चाहे निआँ लःअय ची आपे बेस खभाईर रअः सन्देस रे बिसवासेआपे?
6 #
एहेः 15:6; रोमी 4:3 अब्राहम “परमेसर रे बिसवास लःअय आउर निआँ तरअः हुनी धरमी गिनती नेनाय।” 7#रोमी 4:16निआँ लःअय आपे नोःआँ पड़ीपे ची जे होड़ बिसवासे आकु, हिंकु गी अब्राहम आलकु बंसवाईर हेके। 8#एहेः 12:3धरम पुथी पहिल तरअः नोःआँ के पाड़ी केते ची परमेसर बिसवास रअः चलते एटाअ जाईतकु के धरमी बनाव किकुआय, हिना लःअय हुनी पहिल तरअः अब्राहम के नोःआँ बेस खभाईर उदूऊ लियाय ची “आपे रअः चलते पुरा धरती रिनकु एटाअ जाईतकु बराकाईत नाम केआकु।” 9हिना लःअय जे बिसवास रे बनाल ताही नोआकु, बि-बिसवासी अब्राहम लोः गी आसीस नामेआकु।
10 #
कन 27:26
बकिर जे कनहुन रअः काम रे भरसा दोहोयाकु, हुंकू सराप रअः कबजा रे जिवीडोआकु, एता लःअय ची लिखा लअः एदनअ, “जे मुसा आला कनहुन रअः पुथी रे लिखा उना जामा बात रअः काय पालनेआ, हुनी भखाल हेके।” 11#हब 2:4नोःआँ दो सफा-सफा नेलोअ ताना ची जाहें मुसा आला कनहुन पलाने रअः चलते परमेसर आला नजाईर रे धरमी काय ठहराआ, एता लःअय ची लिखा लअः एदनअ, “धरमी होड़ अपन बिसवास रअः चलते जिनगी नाम केआय।” 12#लेवी 18:5आउर मुसा आला कनहुन रअः बिसवास रे एतान होः नाता कनोआँ, एता लःअय ची धरम पुथी रे लिखा लअः एदनअ ची “जे नोःआँ बात कुन रअः पालानेआय, हुनी के निआँ रअः चलते जिनगी भेटाव कोआ।”
13 #
कन 21:23
ख्रीस्त आबु लःअय सराप उनी बनाव नेनाय आउर नोःआँ लकान हुनी आबु के कनहुन रअः सराप तरअः छोड़ाव लिबुआय, एता लःअय ची धरम पुथी रे लिखा लअः एदनअ, “जेके काठ रे हाका कुआकु, हुनी सरपाव उनी हेके।” 14नोःआँ निआँ लःअय हुयाव नेना ची अब्राहम आला आसीस ख्रीस्त ईसु रअः दोवासते एटाअ जाईतकु के होः भेटाआ आउर आबु के बिसवास रअः चलते होना आतमा भेटाआ, जेकर वादा एम ताही लःअय।
अब्राहम आलकु बंसवाईर ओके
15ए बोको बोयहाकु! ईङ आपे के सधारन जिनगी रअः नमुना उदूः दिपीईंग, जाहें होड़ जहान करार इदी तदाय, ना दो होना के इरकु काँट-छाँट दड़ीआ आउर ना दो होना रे घटाव ना बढ़ाव दाड़ी केआकु। 16हिना लकान गी अब्राहम आउर हुनी आलकु हिजोअ वाला बंसवाईर लोः वादा एम लअः एदनअ। नेलेपे, पुथी नोःआँ काय कंहड़ीआ, हुनी आलकु “बंसवाईरकु” के, जदि नोकान हुयाआ दो ढेरकु पखी संकेत हुयाआ, बकिर पुथी रे मियांड ठुका होड़ रअः बारे उदूगेआय। पुथी कंहड़ीआय, आउर “आपे आला बंसवाईर के” जे ख्रीस्त हेके। 17#उइठ 12:40ईङ आला क-कंहड़ी नोःआँ हेके ची परमेसर अब्राहम लोः मियांड करार लःअय आउर होना के दो-दोहो लःअय पसीठा लःअय। मुसा आला कनहुन, जेके चाईर साव तीस बरीस तयोम एम लअः थिना, होना, होना करार के एरे तोड़ाव सकाया आउर परमेसर आला वादा के रद्द दाड़ी केआय। 18#रोमी 4:14एता लःअय ची जदि जे परमेसर तरअः भेटाआ होना मुसा आला कनहुन रेनअः पलाने रे भेटाआ, दो फिन वादा तरअः कोवान, बकिर परमेसर दो अब्राहम लःअय वादा रेनअः दोवारा हुनी के एम लअः एदनाआ।
19तब मुसा आला कनहुन एता लःअय एम लअः थिना? अब्राहम आला बंसवाईर जेके वादा एम लअः थिना, हुनी आला हिजोअ जगुत मुसा आला कनहुन पाप रेनअः चलते एम लअः थिना। होना कनहुन सिरमादूत दोवारा परमेसर आउर मनवा आला बि-बिचवाई वाला मुसा दोवारा तीः रे एम लआ थिना। 20नहाअः नेलेपे, बिचवाई दो बरिया रअः बिच-बिचवा रे ताहिनोआँ, बकिर परमेसर दो मियांड गी इदानियाँ।
मुसा आला जोगाड़ रअः कनहुन रअः जोजना
21-22दो एतान कनहुन आउर वादा परमेसर रे बिरोध एदनअ? हिरगीस कोवान! जदि मुसा आला कनहुन नोकान एम लअः एमा ताही कोआ जे जिनगी भेटाअः रे समरथ ताही नेना, दो कनहुन के पलाने रेनअः चलते गी पाप तरअः छुटकारा भेटाव ताही कोआ। बकिर धरम पुथी जामा कुछ पाप रेनअः सकती रेनअः अधीन बंदी बनाव केदाय, ताकी ईसु ख्रीस्त रे बिसवास रअः मोताबिक रे जे बचन एम तदाय, होना बि-बिसवासकु के होः भेटाअः।
23बिसवास रअः हिजोअ तरअः पहिल रे आबु के होना बिसवास दिसतारोः बेरा जगुत मुसा आला कनहुन रअः देखा-तखा रे दोहो केते बंदी बनाव लिनकु ताहिनाकु। 24नोःआँ लकान ख्रीस्त हिजोअ जगुत कनहुन आबु आला देखा-तखा लःअय, ताकी आबु बिसवास रेनअः दोवासते धरमी बनाव बु, 25बकिर नहाअः बिसवास हीःग ताना, आउर आबु देखा-तखा कु रअः कबजा रे कानिबुआ।
26एता लःअय ची आपे जामा ख्रीस्त ईसु रे बिसवास रअः चलते आपे जामा परमेसर आलकु होपोन हेके। 27एता लःअय ची जेतना होड़कु ख्रीस्त लोः हुयाअः लःअय बतिस्मा इदी लअकु, हुंकू ख्रीस्त लकान बनाअः लःअय हुनी के सोलोंग तदियाकु।
28नहाअः दो जाहें ना जाहुदी आउर ना एटाअ जाईतकु, ना दो जाहें बंधाउवा आउर ना निछुंद, ना दो जाहें मरदाना हेके आउर ना लाईं आपे जामा ख्रीस्त ईसु रे मियांड नापे। 29#रोमी 4:13 एता लःअय ची आपे ख्रीस्त आलकु हेके, दो फिन आपे अब्राहम आलकु बंसवाईर हेके, आउर परमेसर जे वादा अब्राहम के एमा ताही लियाय, होना वादा रिनकु हकदार हेके।
Tans Gekies:
गलाती 3: ASR
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2023 NLCI CC BY-NC-ND 4.0