Joani 1
1
Jesu, ijwi lyaconse lya Nyambe
1Ku matatikilo, Ijwi nko ka lili. Mi Ijwi no Nyambe ka li kele, mi Ijwi ka lili Nyambe. 2Ka joja no Nyambe ku zwa ku matatikilo. 3Nyambe sa bumba i bintu byonse ko ku mu litusisa. Takuli i bintu na bya bumbigwa uku ta na ga bumba. 4Kwakwe nkoko ku li u bumi mi bobo u bumi nde tuba lyo bantu bonse. 5Ituba kale lya munika mu kansindwe mi a kansindwe kale ka kangwa uku li zima.
6Nyambe kale ga tuma unkosi gwezina lya Joani u mukolobezi. 7Sa keza ku paka bya lelyo ituba, buti a bantu bonse ba zumine kwa lelyo ituba ko bupaki bwakwe. 8Joani ta li ndege ka li ituba, ige ka li mpaki uju ka sukulula byetuba.
9Lelyo ndituba lyaconse ili ka li keza mwilonga keza ku munikila a bantu bonse. 10Sa keza mwilonga ili sa bumba, kono ilonga ta na lya mu zekelela. 11Kale ga keza ku bakwakwe kono a bakwakwe ta na ba mu tambula. 12Kono ku bantu bonse aba na ba mu tambula, kwa ba na ba zumina mwizina lyakwe kale ga ba wa inguzu jo ku ba a bana Nyambe. 13A ba ta na ba zaligwa ko bu ka shakila u muntu, kampa ko mushakilo go buntu kampa ubu ka shakila unkosi kono ko bu ka shakila Nyambe.
14Ijwi kale lya zoka u muntu mi kale ga keza ku joja neswe, mi iswe kale twa bona impazimo jakwe iji ji botele Mwana Nyambe genke, uju na ga zwa kwa Tata na vumbite i cisemo no niti.
15Joani ka paka byakwe ku bantu na kugiliza nage, “Joju ndege ka ndi gamba byakwe aa ka ndi tanga buti, ‘Uju a keza mwishule lyangu a la ndi itilila kakuli ige nko ka li ku zwa koko ku nkulu-katanzi ime na ndi sini uku bako.’ ”
16Mu muvumbilila gwakwe, twense na twa tambula imfwijaguzi jo cisemo ci ita ici ka ci liko. 17Kakuli u mulao se gu wegwa ku bantu ko ku litusisa Mushe, kono i cisemo no niti na bya keza ko ku litusisa Jesu u Mushaligwa gwa Nyambe. 18Takuli uju ga la bona Nyambe, mbwita Mwana Nyambe genke bulyo mi nage kame ndi Nyambe, ndege genke bulyo a li afuwi no Nyambe Isi mi na ga mu zibaaza.
Joani aa gamba buti ta li nde Mushaligwa
(Mat 3:1-12; Male 1:1-8; Luk 3:1-18)
19Ubu mbo bupaki bwa Joani a bakulu bo Majuda ba mu munzi gwa Jelusalema aa na ba tuma a mapulisiti no Malivi buti ba ka mu buze buti, “Ndigweni?” 20Joani kale ga ba taba wawa nage, “Ime ta li ndime Mushaligwa gwa Nyambe.” 21Abo kale ba mu buza kame nabo, “Elu ndigweni? Ndigwe Eliya?” Joani kale ga ba taba nage, “Ntali ndime.” Kale ba mu buza kame nabo, “U li muboni gwa Nyambe?” Joani kale ga ba taba nage, “Afwoku.” 22Kale ba mu buza kame nabo, “Ndigweni? U tu tabe buti tu ka lugule kwa ba ba la tu tumi. Mbuti u co, buti ndigweni?” 23Joani kale ga ba taba ko majwi aga sa gamba u muboni gwa Nyambe Isaya nage,
“Ndime jwi lyo muntu a kugiliza mu mangusu li ta buti, ‘Mu golole inzila jo Mfumu.’ ”#Isaya 40:3.
24A Bafalisi aba na ba ka tumigwa, 25kale ba mu buza nabo, “Ati ta li ndigwe Mushaligwa gwa Nyambe kampa Eliya kampa u muboni gwa Nyambe, ncinzi aa u kolobeza?” 26Joani kale ga taba nage, “Ime kame ndi kolobeza ko menzi, kono nkwali uju a zimene mukati kenu uju ta mu zekelele. 27Ndege na tende u musebezi mwishule lyangu, buti mane ta ndi goli uku shumununa u tushuminiso to nshangu jakwe.” 28Bebyo byonse, mwilonga lya Bbetaniya mwisilya limwinya lyo Lwizi lwa Joodani ka bi tendaalila, u mu ka kele Joani na kolobeza.
Joani aa paka bya Jesu
29Ijuba na lya nungako, Joani kale ga bona Jesu na keza aa ka li mi kale ga ta nage, “Nga mu lole, Ingu-gana ja Nyambe, uju a inda i bitendantu i bimangoju byo bantu bonse ba mwilonga! 30Ndege ka ndi gamba byakwe aa ka ndi ta buti, ‘Nkwali unkosi uju a keza mwishule lyangu, ige a la ndi ita kakuli nko ka li ku zwa koko ku nkulu-katanzi, ime na ndi sini uku bako.’ 31Neme ta ka ndi mwizi kono ici ci ndi kolobezisa a bantu ko menzi, nku ta buti a ganunwe ku bantu ba Isilaele.”
32Mi Joani ka paka nage, “Ndi la boni u Moya go Kucena gu zwa kwigulu na gu bonaala sinagwe nu nziba no keza ku kala akwe. 33Neme ta na ndi la mu zibi, kono uju na ga ndi tuma buti ndi kolobeze a bantu ko menzi, ndege sa ndi lugwila buti, ‘Unkosi uju no bone u Moya go Kucena gu sezumukila no ku kala akwe, ndege na kolobeze ko Moya go Kucena.’ 34Na nda bona ku tendaala bulyao kwakwe mi nda sa paka buti nde Mwana Nyambe.”#1:34 Mu mabuka gamwinya mbuti ku ñolelwe buti “Mushaligwa gwa Nyambe”.
A bazigigwa ba Jesu betanzi
35Ijuba na lya nungako, Joani aa ka zimene ao kame no bo bile bo bazigigwa bakwe, 36kale ga bona Jesu na ita, mi kale ga ta nage, “Nga mu lole Ingu-gana ja Nyambe!” 37Babo a bazigigwa bo bile aa ba shugwa bulyao, kale ba umpilila Jesu.
38Jesu aa litemuna, kale ga ba bona na ba mu umpilile, mi kale ga ba buza nage, “Ncinzi mu shaka?” Abo kale ba mu taba nabo, “Rabbi” (ku toloka buti, “Muzigi”), “Kwibo u kalanga?” 39Jesu kale ga ba taba nage, “Mu keze mi kuti mu bone.” Abo kale ba ka ja mi kale ba ka bona uku ka kalanga. Se ka ji li inako jo ma 16 jo matengu mi kale ba kala nage lelyo ijuba. 40Andileya, mwancegwe gwa Simoni Pitolosi ka li jumwinya go bankosi bo bile aba na ba shugwa ibi ka ta Joani mi kale ga umpilila Jesu. 41I cintu ce tanzi ici na ga tenda Andileya, nku shaka-shaka mukulwe Simoni no ku mu ta buti, “Tu la gwani u Mushaligwa gwa Nyambe” (ku toloka “Kilesite”).
42Andileya kale ga leta Simoni kwa Jesu. Jesu kale ga lolelela Simoni mi kale ga ta nage, “Ndigwe Simoni mwana Joani, kono kuti u kugigwange Kefasi” (ku toloka “Pitolosi”).
Jesu aa kuga Filipi no Natanaele
43Ijuba ili na lya nungako, Jesu kale ga gaja uku ja kwilonga lya Galileya. Kale ga gwana Filipi mi kale ga mu ta nage, “U keze u ndi umpilile.” 44Filipi ka li gwa mu munzi gwa Bbesaida, mu munzi u mu ka ba kalanga ba Andileya no Pitolosi.
45Filipi kale ga gwana Natanaele mi kale ga mu ta nage, “Tu la gwani u muntu uju sa ñola Mushe mu mabuka go mulao, mane noju na ba ñola a baboni ba Nyambe, ndi Jesu gwa mu munzi gwa Nanzaleta, mwana Josefa.”
46Natanaele kale ga mu buza nage, “Mu munzi gwa Nanzaleta? Ncintunzi i cilotu ici ci gola uku zwa mu munzi gwa Nanzaleta?”
Filipi kale ga mu ta nage, “U keze u ka li bonene.”
47Jesu aa bona Natanaele na keza, kale ga ta nage, “Joju ndo Muisilaele wawa uju ta azi ku manya.”
48Natanaele kale ga mu buza nage, “Mbuti u ndi zibile?”
Jesu kale ga mu taba nage, “Ndi la ku boni no li mwisiko lyo cishamu co mulya-nshwi, Filipi na sini ka ku kuga.”
49Mi Natanaele kale ga mu ta nage, “Muzigi, ndigwe mwana Nyambe mi u li Mfumu go bantu ba Isilaele.”
50Jesu kale ga ta nage, “Gwa sa zumina kebaka lyo ku ta buti ndi la kuti buti ndi la ku boni no li mwisiko lyo cishamu co mulya-nshwi! Kuti no bone i bintu i binene ku ita byebyo.” 51Jesu kale ga mu ta kame nage, “Mbyaconse ndi ku lugwila, kuti no bone igulu li galuka no mañiloi ga Nyambe ga kambama no ku sezumukila egulu lyangu ime nde Mwana Muntu.”#1:51 Mwana muntu ncitulo ka litusisanga Jesu uku li kuga gemwini.
Tans Gekies:
Joani 1: TOI
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
2026 The Seed Company
