Joani 3
3
Jesu no nkosi ka kugigwa Nekudema
1Nko ka li unkosi ka kugigwa Nekudema, uju ka li Mufalisi mi ka li jumwinya go bajendesi bo nkuta inene jo Majuda. 2Kale ga keza kwa Jesu a masiku no keza ku mu ta nage, “Muzigi, tu li zekelele buti u li muzigi uju a zwa kwa Nyambe. Kakuli takuli uju a gola uku tenda i bijuliko ibi bi makaza u kwesi uku tenda ati Nyambe ta kele nage.”
3Jesu kale ga mu taba nage, “Mbyaconse wawa ndi ku lugwila buti, takuli u muntu a gola uku bona u mubuso gwa Nyambe ati ta la bonegwa lyabili kame.”
4Nekudema kale ga buza Jesu nage, “U muntu mbuti a gola uku bonenwa lyabili kame uku sa li kulite? A bogole mwivumo lya nyina buti a bonegwe lyabili?”
5Jesu kale ga mu taba kame nage, “Mbyaconse ndi ku lugwila buti takuli u muntu uju na ngine mu mubuso gwa Nyambe ati ta bonegwa ko menzi no ko Moya. 6U muntu, muntu kame a gola uku zala, mi Moya bulyo gwa Nyambe gu gola uku zola u muntu buti a be mwana Nyambe. 7U leke uku komokwa aa ndi ku ta buti ‘Mu li botele uku bonegwa lyabili.’ 8Inkuli ji la ku unganga ku tunguluza uku ji shaka konse. Igwe mbulyo u gola uku shugwa ijaba lyo ku unga kwajo, kono to goli uku ziba uku ji zwa kampa uku ji ja. Mbobo ku kalile no ku muntu uju a la bonegwa ko Moya.”
9Nekudema kale ga buza Jesu nage, “Mbuti bi gola uku tendaalila byebyo?”
10Jesu kale ga mu taba nage, “U li muzigi go bantu ba Isilaele kanti negwe to bi shugwilisi byebi i bintu? 11Mbyaconse wawa ndi ku lugwila buti, iswe tu li bo ku gambanga i bintu tu zekelele, mi tu la ku paka ibi na twa bona, kono inwe mwe bantu ta mu tambuli u bupaki bwetu. 12Ndi la ku gambaguzi i bintu bya mwilonga kono to la zumini, mbuti u gola uku zumina aa ndi ku gambaguza i bintu bya kwigulu? 13Takuli u muntu sa ja kwigulu mbwita ime nde Mwana Muntu na nda zwa kwigulu. 14Sinagwe ndi Mushe ubu sa angikila ijoka mu mangusu, neme nde Mwana Muntu ndi li botele uku angikigwa, 15buti u muntu gense uju a zumina kwangu na gwane u bumi ta bu mani.
16“Kakuli Nyambe sa shaka lwini ilonga mane kale ga li wa Mwane genke, buti u muntu gense uju a zumina kwakwe na leke uku fwa kono na gwane u bumi ta bu mani. 17Kakuli Nyambe ta sa tuma Mwane mwilonga buti a keze a atule ilonga, kono buti a keze a jojese ilonga.
18“U muntu gense uju a zumina kwakwe ta na atuligwe, kono u muntu gense uju ta zumini kwakwe, sa li atulitwe kakuli ta na ga zumina mwizina lya Mwana Nyambe genke. 19Mi inkatulo nji jeji. Ituba na lya keza mwilonga, kono a bantu na ba shaka a kansindwe ku ita ituba kakuli i bitendantu byabo ka bi li bimangoju. 20U muntu gense uju a tenda i bitendantu i bimangoju ngwa ku zimba ituba, mi ta goli uku keza mwituba kebaka lyo bujoge buti i bitendantu i bimangoju byakwe mane bi bonaazwe. 21Kono u muntu uju a joja mu niti ga sa keza mwituba, buti ku bonaale wawa buti ibi na ga tenda kame ka bi tenda Nyambe na mu wene.”#3:21 A mabuka gamwinya na ga ñola a majwi ga Joani mu ntimana ja 16 ku twala nku ntimana ja 21.
Joani aa paka bya Jesu kame
22Bebyo aa se bi la mani, Jesu no bazigigwa bakwe kale ba ja mu cibaka ka ci li mwilonga lya Judeya, u mu na ba ka kala inako inde na ba kolobeza.
23Joani u mukolobezi nage ka kwesi uku kolobeza a bantu mu cibaka ici ka ci kugigwa Enoni afuwi no munzi gwa Salimi, kakuli a menzi momo ka ga ngiite mi a bantu ka ba keza kwakwe na ba kolobezigwa. 24Bebyo ka bi tendaala Joani u mukolobezi na sini uku tuligwa mu ntolongo. 25Kale kwa buka inkani mukati ko bazigigwa bamwinya ba Joani no jumwinya u muntu go Mujuda. Kame ka ba li kanana a ntaba jo ku shamba no ku li cenesa ko cizo. 26Kale ba keza kwa Joani no keza ku mu ta nabo, “Muzigi, ngo lole julya unkosi uju ko paka byakwe, uju ka ka kele negwe mwisilya lyo Lwizi lwa Joodani, nage sa li kwesi uku kolobeza, mi a bantu bonse nkwakwe se ba manina.”
27Joani kale ga ba taba nage, “U muntu ta goli uku tenda i cintu ici ta na ga mu wa Nyambe gwa kwigulu. 28Inwe wawa mu la gola uku ndi pakila buti ka ndi tanga buti, ‘Ime ta li ndime Mushaligwa gwa Nyambe kono mbulyo se ndi tumigwa uku li tangiza kwakwe.’ 29U musesi ngwa musesigwa. U musele go musesi mbulyo a keza ku mu tusa, mbulyo a lindila no ku tegeleza, mi sa la jangala aa shugwa ijwi lyo musesi. Mi koko uku jangala nkwangu, mi aano se ku li vumbite. 30Ige a li botele uku ba u munene, ime ndi kujuke.
31“Ige nkwigulu a zwa mi a li botele uku ba egulu lyo bantu bonse, kono uju a zwa mwilonga ngwelonga mi mbyelonga a gamba. Uju a zwa kwigulu mpegulu lyo bantu bonse a li. 32Ga sa paka i bintu byonse ibi na ga bona no ku shugwa, kono takuli u muntu uju a tambula u bupaki bwakwe. 33U muntu gense uju sa tambula no ku zumina bobo u bupaki na ga paka wawa buti Nyambe ngwa niti. 34Kakuli uju sa tumigwa kwa Nyambe, ga sa gamba a majwi ga Nyambe kakuli Nyambe ga sa mu wa u Moya ko bungi. 35Tata a la shaka Mwane mi sa wa i bintu byonse mu nguzu jakwe. 36U muntu gense uju a zumina kwa Mwana Nyambe a li kwesi u bumi ta bu mani, kono u muntu gense uju a kana Mwana Nyambe ta na bone u bumi, kakuli u bukali bwa Nyambe se bu lili egulu lyakwe.”
Tans Gekies:
Joani 3: TOI
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
2026 The Seed Company
