Mateu 8
8
Jesu aa oza unkosi ka lwala i cisenda
(Male 1:40-45; Luk 5:12-16)
1A bantu a bangi kale ba umpilila Jesu aa ka sezumuka ku zwa elundu. 2Aobulyo kale kwa keza unkosi uju ka lwala i cisenda no keza ku tongama afuwi no Jesu mi kale ga ta nage, “Mfumwangu, ati u la shaka u ndi oze.” 3Jesu kale ga golola iganja no ka mu kwata mi kale ga ta nage, “Ndi la shaka, u lwaluke!” Aobulyo i cisenda cakwe kale ca mana. 4Jesu kale ga mu ta nage, “U leke ka gambaguza a bantu kono u je bulyo ku mupulisiti aka ku tatube mi u itule no citagilo ku ja ko bu gu tela u mulao gwa Mushe kwa ba ba ozwa ku bulwele bo cisenda. Ko ku tenda bulyao, a bantu kuti na ba be no bupaki buti na gwa ozwa no ku cenisigwa.”
Byo nzumino jo nkosi gwa mwa Kapenauma
(Luk 7:1-10)
5Jesu aa sa la bogoli ku munzi gwa Kapenauma, u mujendesi go masole go Muloma kale ga keza kwakwe, ku kumbila intuso nage, 6“Mfumwangu, u muika gwangu mpa bulo a kwashamite bu golomene mi a li shugwile lwini uku shisha.”
7Jesu kale ga ta nage, “Ndi la keza ndi mu oze.”
8Kono u mujendesi go masole kale ga ta Jesu nage, “Mfumwangu, ta ndi botele buti igwe u ngine mu njugo jangu. U gambe bulyo ijwi mi u muika gwangu kuti a lwaluke. 9Ndi li zekelele buti nko ba li a bajendesi a bakulu kwangu ku nguzu jo bujendesi kono neme nko ba li a masole aba ndi jendesa. Ndi la gola uku ta jumwinya kwa babo buti, ‘U jende,’ mi sa la ka ja, kampa ku mu ta buti, ‘U keze,’ sa la keza. Kampa uku ta u muika gwangu buti, ‘U tende ci,’ sa la ci tenda.”
10Jesu aa shugwa bulyao, kale ga komokwa lwini. Kale ga sigulukila ku bantu aba ka ba mu umpilile no ku ba ta nage, “Mbyaconse ndi mi lugwila buti, ka ndi sini uku bona u muntu go nzumino inene lwini bulyao mwilonga lya Isilaele. 11Kame nda sa mi lugwila buti u bungi bo bantu aba ta ba li a Majuda kuti na ba ka zwe mu malonga ga andene-andene ga ku buzwe-juba no ga ku bugwe-juba no keza ku lya u mukiti no Abbulaama no Isaka no Jakobo mu mubuso gwegulu. 12Kono u bungi bo bantu ba Isilaele aba na ba lukisezwa u mubuso gwa kwigulu, kuti na ba ka shonjelwe kunze mu kansindwe u mu na ku ka be a malilo no ku kweka a meno.”
13Cwale Jesu kale ga ta jojo u mujendesi go masole nage, “U bogole ku njugo mi kakuli u la zumini ku la tendaali ubu shakila.” Mi u muika kale ga lwaluka mwa jejo inako.
Jesu aa oza mukwe gwa Pitolosi go mwanakazi
(Male 1:29-34; Luk 4:38-41)
14Jesu aa sa la siki ku njugo ja Pitolosi, kale ga bona mukwe gwa Pitolosi go mwanakazi na lele a bulo na lwala ielenge. 15Jesu kale ga mu kwata kwiganja, mi ielenge kale lya zwa kwakwe mi kale ga buka no ku mu tendela byo ku lya.
16Gago a matengu a bantu aba ka ba munitwe ku mayauma, kale ba ba leta kwa Jesu mi kale ga tanda i myoya i mibi ko ku gamba bulyo, no ku oza bonse aba ka ba lwala. 17Gogu u mutendelo ka gu li go ku vumbiliza ijwi lyo muboni gwa Nyambe Isaya aa sa ta buti,
“Sa inda a malwalila getu
no ku oza a malwele getu.”#Isaya 53:4.
Byo ku umpilila Jesu
(Luk 9:57-62)
18Jesu aa bona buti a bantu a bangi se ba li mu bunganine, kale ga ta a bazigigwa bakwe buti ba shatukile mwisilya lyeziba. 19Mi jumwinya go bazigi bo mulao kale ga ta Jesu nage, “Muzigi, kuti ndi ku umpilile konse uku so ko je.”
20Kono Jesu kale ga mu taba nage, “A basibwe ba li kwesi a malambo, no bijuni bi li kwesi i bijakilo, kono ime nde Mwana Muntu#8:20 “Mwana Muntu” ncitulo ici ka litusisanga Jesu mu ku li kuganga gemwini. ta ndi kwesi i cibaka o ku lalika u mutwi gwangu.”
21Jumwinya u muzigigwa kale ga ta nage, “Mfumwangu u ndi leke tanzila ndi bogole ndi ka zike tata.”
22Kono Jesu kale ga mu ta nage, “U ndi umpilile, mi u leke aba ba fwite ba zike a bafu babo.”
Jesu aa ombeleza inkuli
(Male 4:35-41; Luk 8:22-25)
23Jesu kale ga ngina mu bwato mi u bazigigwa bakwe kale ba mu umpilila. 24Aobulyo inkuli kale ja fukuka ku ukusa iziba buti a makupezi se ka ga ja bu ngina mu bwato. Kono Jesu kame ka lele. 25A bazigigwa bakwe kale ba mu jila no ka mu busa na ba kumbagana nabo, “Mfumwetu, u tu jojese! Mane tu lobele!”
26Jesu kale ga taba nage, “Inwe bo nzumino inunu, ncinzi aa mu jogete bulyao?” Kale ga zimana no ku jukukila inkuli no makupezi mi kale kwa ombelela lwini.
27A bazigigwa kale ba komokwa lwini mi kale ba buza nabo, “Nu nkosi gwa buti joju buti inkuli no makupezi bi mu kutike?”
A mayauma aa ga ngina mu banjili
(Male 5:1-20; Luk 8:26-39)
28Jesu aa sa la ka siki mwisilya lyeziba lya Galileya mwilonga lyo Magadala, a bankosi bo bile aba ka ba munitwe ku mayauma kale ba li shangana nage. Mpa mabita ka ba zwa mi ka ba shanshuwite lwini buti mane takuli u muntu uju ka gola uku itila koko ku cibaka. 29Kale ba tatika uku mu kumbaganina nabo, “Ncinzi u shaka kwetu igwe gwe Mwana Nyambe? Kame u la kezi ku tu bangisa inako na ji sini ku sika?”
30Nko ka gu li u mugona go banjili ugu ka gu yangila u kule kanunu no ao. 31A mayauma kale ga kumbila Jesu nago, “Ati gwa sa tu tanda u tu tandile mu mugona go banjili.”
32Kale ga ga ta nage, “Mu jende!” A mayauma kale ga zwa kwa babo a bankosi bo bile, no ka ngina mu mugona go banjili. Mi u mugona gonse kale gwa landumukila ku nsezumusi je nkonkomwa lyeziba no ka shotaukila mu menzi no ka fwilamo. 33A bankosi aba ka ba lisa a banjili kale ba tigila ku minzi ja afuwi, na ba ja bu gambaguza a bantu i bintu byonse ibi na bya tendaala ku bankosi ka ba munitwe ku mayauma. 34A bantu bonse ba mu munzi kale ba keza kwa Jesu, mi kale ba mu kumbila lwini buti a zwe mwilonga lyabo no ku ba leka bonke.
Tans Gekies:
Mateu 8: TOI
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
2026 The Seed Company
