NÚMERI 34
34
Beskrywing van die grense van Kanaän deur God.
1VERDER het die Here met Moses gespreek en gesê:
2Gee bevel aan die kinders van Israel en sê vir hulle: As julle in die land Kanaän kom, sal dit die land wees wat aan julle as erfdeel sal val; die land Kanaän volgens sy grense.
3 Julle suidekant dan moet van die woestyn Sin af langs Edom wees; en julle suidelike grens moet aan die oostekant van die einde van die Soutsee af wees;
4en julle grens moet suid van Skerpioennek swaai en oorloop na Sin toe, totdat dit doodloop suid van Kades-Barnéa; dan moet dit aanloop na Hasar-Addar en oor na Asmon toe.
5Verder moet die grens swaai van Asmon af na die spruit van Egipte toe, sodat dit by die see doodloop.
6Aangaande die westelike grens, dit moet vir julle die Groot See saam met sy gebied wees; dit moet julle westelike grens wees.
7En dit moet julle noordelike grens wees: van die Groot See af moet julle jul grenslyn trek na die berg Hor.
8Van die berg Hor af moet julle die grenslyn trek tot by die ingang na Hamat; en die grens moet doodloop by Sedad.
9Dan moet die grens aanloop na Sifron toe, en dit moet doodloop by Hasar-Enan. Dit moet julle noordelike grens wees.
10Verder moet julle as jul oostelike grens die lyn trek van Hasar-Enan af na Sefam toe.
11En die grens moet afloop van Sefam af na Haribla toe, oos van Ajin; dan moet die grens afloop en skrams oor die hange van die meer Kinnéret gaan, aan die oostekant.
12Verder moet die grens afloop na die Jordaan totdat dit doodloop by die Soutsee. Dit moet vir julle die land wees volgens sy grense rondom.
13En Moses het aan die kinders van Israel bevel gegee en gesê: Dit is die land wat julle deur die lot as erfdeel sal verwerwe, wat die Here beveel het om aan die nege stamme en aan die halwe stam te gee.
14 Want die stam van die kinders van die Rubeniete volgens hulle families en die stam van die kinders van die Gadiete volgens hulle families en die halwe stam van Manasse het al ontvang — hulle het hul erfdeel ontvang.
15Die twee stamme en die halwe stam het hulle erfdeel aan die oostekant van die Jordaan van Jérigo, teen sonop, ontvang.
16Verder het die Here met Moses gespreek en gesê:
17Dit is die name van die manne wat vir julle die land as erfenis moet verdeel: die priester Eleásar en Josua, die seun van Nun.
18Daarby moet julle uit elke stam een owerste neem om die land as erfenis te verdeel.
19En dit is die name van die manne: van die stam van Juda — Kaleb, die seun van Jefúnne;
20en van die stam van Símeon se kinders — Sémuel, die seun van Ámmihud;
21van die stam van Benjamin — Elídad, die seun van Kislon;
22en van die stam van Dan se kinders as owerste — Bukki, die seun van Jogli;
23van die kinders van Josef: van die stam van Manasse se kinders as owerste — Hánniël, die seun van Efod;
24en van die stam van Efraim se kinders as owerste — Kémuel, die seun van Siftan;
25en van die stam van Sébulon se kinders as owerste — Elísafan, die seun van Parnag;
26en van die stam van Íssaskar se kinders as owerste — Páltiël, die seun van Assan;
27en van die stam van Aser se kinders as owerste — Ahíhud, die seun van Selómi;
28en van die stam van Náftali se kinders as owerste — Pedáel, die seun van Ámmihud.
29Dit is hulle aan wie die Here bevel gegee het om die erfenis vir die kinders van Israel in die land Kanaän te verdeel.
Tans Gekies:
NÚMERI 34: AFR53
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© Bybelgenootskap van Suid-Afrika 1933, 1953. Gebruik met toestemming. Alle regte voorbehou.