Juan 8
8
1mat häp Jesús ihoye chenaj tä Oliwachat. 2Tä ifwala elh tä nech'e fwamlafwaj, yäple Dios Lew'et wet nilhokej wichi ihoye, wet lham tatayphä wet iwo lechufwenyaja.
3Wet Fariseo lhayis lhäy'e hin'ol tä lhayen lewosa Ley p'ante tälhe Moisés, lhamel ihäne Jesús häp atsinha tä õhw'enej tä iwo lakain'oyaja. Wet itihi lechowej wichi tä lhaihutwek, 4wet ifwenho Jesús tä yok:
–Maestro, häp atsinhana õhw'enejn'e tä iwo lakain'oyaja. 5Wet Moisés lesaynhay p'ante ne'tek õ'länej tuntey häp atsinha che häpe tä mälhyejna.#Lev 20.10; Deut 22.22-24 ¿Chiwoye am? ¿Atsi ämet tä häpe?
6Lhamel iwoynejetso tä tay'ätshane tä fwetaj yelhte Jesús yämthilek iche m'ak che yen tesayej. Mat lham t'upeyejchä honhat wet ilesaynej lefwuj. 7Wet tä lhamel yachajopej tä tay'ätshane, nech'e tatshupiphä wet yok:
–Eh, aelh tä lesukyaj newahi, häp tä is che ichun tä ithatej tunte.
8Wet äp yachajo tä t'upeyejchä honhat tä ilesayen. 9Tä lhamel iläte täjtso, wet yikhen elhpej, lhamel tä thänhäy ichun tä yik, wet iyhäj imälheche len'äyij. Tä Jesús hiw'en tä ts'ilak atsinha tä imälheyej, 10tatshupiphä wet yok:
–Atsinha, ¿chip ichetso hin'ol? ¿Hä niwohit elh che iti amej ates?
11Atsinha nichulho wet yok:
–Ihichet'a, Iwuk.
Wet Jesús yok:
–Häte olham tek oti amej ates. Mäh, yej lhachajo asukyaj.]#8.11 Häp n'olhämtestso tälhe 7.53 yäk 8.11 ihihit'a n'otkwey lesaynhay p'ante lhamenya.
Jesús häpe wichi laka isi
12Jesús yachajo tä tahuyej wichi wet yok:
–Olham ohäpe wichi tä i'pe honhat laka isi.#Mat 5.14; Juan 9.5 Elh che nek n'okwe nemla ilunhilhi honataj, mat isi tä iwo n'ow'atshancheyaja ihiyeja t'at.
13Mat Fariseo lhayis yok:
–Häp ämettso laha ihihit'a, tsi n'äl tä am t'at tä lhäm ame.#Juan 5.31
14Jesús nichulho lhamel wet yok:
–Tej tä olham t'at tä oyäm lhame, mat laha ihi t'at olhämet. Tsi olham ohanej ihi lhip tä otälhe, wet ohanej ihi lhip tä ohoye, mat amel tek lehanayej ihi. 15Amel lewoyay akalelhthayaja mälhyej tä hin'ol fwetaj is alhoho, mat olham tek okalelhät elh che häpe. 16Mat che owo okalelhthayaja, okalelhthayaj häpe t'at m'ak tä matche. Tsi ts'ilakhit'a olham tä owo okalelhthayaja, mat häte Ojcha tä lechenekn'o häp tä iwo lakalelhthayaja. 17Häp Ley p'ante Moisés hiw'en amhohen yok, “Che hin'ol täkwfwas, elh niw'enhaya lhamej lhämet, häpe t'at m'ak tä matche.” 18Tä mälhyejtso, olham tä oyäm lhame wet Ojcha tä lechenekn'o häp tä lhamtej yäm n'oye.
19Fariseo lhayis tay'ätshane wet yok:
–¿Chi tä ihi häp ajcha?
Jesús nichulho wet yok:
–Amel tek letäfwelay n'oyej wet tek letäfwelayej Ojcha. Che letäfwnhi n'oyej, häte letäfwnhiyejn'e Ojcha.
20Häp tä mälhyej p'antetso Jesús lhämtes tä iwo lechufwenyaja tä ihi Dios Lew'et lhip tä Dios t'awayhtes lehis ihi. Mat nehit katsik itsoklhi, tsi kamaj lham nichätaye lewhäy.
Jesús yachajo tä lhaikalelhtho wichi
21Jesús äp yachajo tä ifwenho lhämet wichi wet yok:
–Olham oyik wet amel let'uhla n'okwe, mat let'inhihena tä lhehi hach'isukyaj. Häp lhip che olham ohoye, amel tek lehanej lewoyneje yämthilek lehoye.
22Wet Judío lhayis nech'e yok:
–¿Etp'i t'uhläk lhailän p'iya, häp tä tamenej tä yok, “Amel tek lehanej lewoyneje yämthilek lehoye lhip che olham ohoye”?
23Mat Jesús tahuyej lhamel wet yok:
–Amel haw'et tä tumchäna, wet olham ow'et tä tumphä. Amel ahäpehen honhat lheley, olham ohäpkhit'a. 24Häp tä tamenej tä ofwel amhohen tä oyok, Lheyayhihila t'at hach'isukyajay che let'inhen. Che kat'ekhaya n'oye tä ohäpe elh tä ohäpe, lheyayhihila t'at hach'isukyajay che let'inhen.
25Tä wichi iläte, tay'ätshane wet yok:
–¿Atsi tä ahäpe?
Jesús nichulho wet yok:
–Ohäpe elh tä tälhe tä nech'enyaya mälhyej tä ofwel amhohen. 26Iche wujpe m'ayhay che oyämhiyej amehen wet owohi okalelhthayaja amejen. Mat häp Elh tä lechenekn'o matche lhämet, wet m'ak tä ofwenho wichi häpe t'at m'ak tä oläte tä lham yäme.
27Mat wichi ihanhiyejt'a tä lham yäme häp Lajcha tä ipuleye. 28Häp tä tamenej tä ifwenhomche wet yok:
–Che amel leneyhatphä Hin'o Lhäs, nech'ehilak letäfwelayej tä ohäpe elh tä ohäpe, wet owohiyet'a m'ak tä olham onech'ethayaj, tajlhame oyäme m'ak tä Ojcha ichufwen n'oyej. 29Tsi it n'oyej Ojcha tä lechenekn'o, tek hits'ilkatn'o, tsi owoyepej häp m'ak tä lham ihuminche.
30Tä Jesús yäme tähestso, wujpe wichi tä t'ekhaye häp lham.
M'ak tä matche ailanhichela
31Jesús tahuyej häp Judío lhayis tä imatitche lhämet, wet yok:
–Che amel letujlhayache tä lewoye olhämet, ahäpkhihena ochufwenkay tä matche, 32wet letäfwnhiyeja m'ak tä matche, wet m'ak tä matche ailanhichela.
33Lhamel nichulho wet yok:
–Olhamel ohäpehen Abraham leles tä lepes lheley,#Mat 3.9 wet ohäpkhihent'a elh che häpe lakwenkay. Wet ¿chip iwoye ämet tä nemla ohäpehen n'okwenkay?
34Jesús tahuyej lhamel wet yok:
–Matche, matche tä ofwel amhohen, Elh che häpe tä iwoye lech'isukyaj häpe t'at n'och'isukyaj kwenek. 35Wet elh tä n'okwenek häpkhit'a che lew'et t'at lewukw'et tä ihi. Mat elh tä n'olhäs häp tä lew'et t'at tä ihi. 36Tä mälhyejtso, che Dios Lhäs ailanche, wet matche tä ahäpkhihena wichi tä nem häpehen n'okwenkay.#Gál 5.1,13 37Ohanej t'at tä ahäpehen Abraham leles tä lepes lheley. Mat tä kawoya lew'eta amhihen olhämet, häp tä tamenej tä let'uhläk lelänayn'o. 38Olham oyäme t'at m'ak tä ow'en tä oiyej Ojcha, mat amel lewoyaye m'ak tä lelätaye tä tälhe amel ajcha.
39Tä wichi iläte, wet yok:
–¡Olhamel ojcha Abraham!
Mat Jesús nichulho lhamel wet yok:
–Che mathiche tä ahäpehen Abraham leles, lewoyayhiye m'ak tä lham iwoye p'ante. 40Mat tä olham ofwel amhohen m'ak tä matche tä Dios ichufwen n'oyej, let'uhläk lelänayn'o. ¡Abraham iwohiyet'a m'ak tä mälhyejtso! 41Mat amel lewoyaye t'at m'ak tä ajchayay lechumyaj.
Lhamel nichulho wet yok:
–¡Olhamel ohäpkhihent'a hin'ol tä lajchalis nikalelhäjahen! ¡Olhamel Ojcha tefwaj'atni, häpe Dios!
42Mat Jesús yok:
–Che mathiche tä Ajchayay häp Dios, lehumnhin'etn'o, tsi otälhe t'at Dios wet onäm kana. Wet olhamhit'ak olhaichen, mat Dios t'at tä lechenekn'o. 43¿Chipte tä amel kahanayej osilätyaj? Häp tä kat'uyahläk letach'ahuye olhämet. 44Häp tä oyok, ahättaj tä aleles, wet m'ak tä lham lenech'ethayaj häp tä lehuminay tä lewoye. Ahättaj tälhe tä nech'enyaya häpe t'at n'olhikoy, wet tatayhlä m'ak tä matche tsi m'ak tä matche tek yen w'eta häp lham. Tä iwoye lhämet tä kamatache, lhamyaj t'at, tsi häpe elh tä w'et yämlhi t'at, wet häpe m'ak tä kamatache lajcha. 45Mat tä olham oyäme m'ak tä matche, amel tek let'ekhayache olhämet.
46“¿Atsi elh amel che hin'älit n'o'pe tä iche och'isukyaj tä owoye? Wet tä oyäme m'ak tä matche, ¿chipte tä tek kat'ekhayache olhämtes? 47Elh che häpe Dios lhäs tach'ahuye t'at Dios lhämtes. Mat tä amel akahäpeya Dios leles, häp tä tek letach'ahuyaye lhämtes.”
Tä kamaj Abraham newache, Cristo pajche iche
48Tä Judío lhayis iläte, tahuyej Jesús wet yok:
–Matche t'at tä olhamel oyok, ¡Ahäpe Samaritano wet ahät tä i'amhi!
49Mat Jesús nichulho lhamel wet yok:
–Ihichet'a ahät che häpe che in'ohi. M'ak tä owoye, otiyej lewujyaj Ojcha mat amel lhenayn'o w'et m'ayeka. 50Mat is t'at, tek ot'uhläk wichi iwunitn'o, tsi iche Elh tä t'uhläk õ'wunitn'o, häp tä is alhoho m'ak tä iwoye. 51Wet oyok, matche, matche tä ofwel amhohen, Elh che häpe che iwoye olhämet y'inhit'ala.
52Tä Judío lhayis iläte, wet yok:
–¡Nech'e kalelhäj tä ahät tä i'amhi! Tsi Abraham lhäy'e profetas lhamel y'inhen t'at, mat am lhokwe ämet, “Elh che iwoye olhämet y'inhit'ala.” 53¿Chiwoye? ¿Hä lefwetaj lenu'pe p'iya olhamel ojcha Abraham? Lham y'il t'at, lhäy'e profetas y'inhen t'at. ¿Atsi tä lefwetaj ahäpe?
54Jesús nichulho lhamel wet yok:
–Che olham t'at tä olhaiwujyen, laha ihihit'a owujyaj tä in'oyej. Mat häp Elh tä iwujyenn'o häpe t'at Ojcha, häp lham tä lefwetajay aka Dios. 55Mat tek letäfwelayej. Olham häp tä ontäfwelej, wet che oyok, “Ontäfwenhiyejt'a”, ohäpe elh tä w'et yämlhi t'at, mälhyej iwoye amel. Mat oyok, matche tä ontäfwelej, wet äp owoye t'at lhämtes. 56Häp amel ates Abraham wuj tä akäjejlhi tä yok, “Ow'enla ifwala che Owuk nämla honhate.” Wet matche, hiw'en t'at wet lakäjyaj ihi.
57Tä Judío lhayis iläte Jesús lhämettso, wet yok:
–¡Kamaj lechäthiyet'a cincuenta nekchämes, mat lefwetaj lew'enpe Abraham!
58Jesús yok:
–Matche, matche tä ofwel amhohen, Tä kamaj Abraham newache, olham pajche oiche t'at.
59Tä lhamel iläte, wet tachuma tuntey tä t'uhläk ithatej Jesús. Mat nech'e lham lhaiskat wet yikch'oye Dios Lew'et, wet lhamel nemhit hiw'en.
Tans Gekies:
Juan 8: WCHB
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Biblia Wichí, Dios Lhämtes tä Matchehen © Sociedad Bíblica Argentina, 2002.
