ESEGIËL 21:28-32
ESEGIËL 21:28-32 Afrikaans 1983 (AFR83)
“En jy, mens, tree op as profeet en sê: So sê die Here my God oor die Ammoniete en oor hulle gespot. Sê: “Swaard, swaard wat getrek is vir die slagting, blinkgevryf is om te blits, al was daar gesigte oor jou wat nie bestaan het nie, voortekens oor jou wat leuens was, jy kap reeds aan die nekke van dié wat deur hulle goddeloosheid gaan sterwe, dié wie se dag gekom het, die tyd van afrekening. Maar sit die swaard terug in sy skede! Op die plek waar jy geskep is, in die land van jou herkoms sal Ek jou straf. Ek sal my woede oor jou laat losbreek, Ek blaas die vuur van my gramskap oor jou, Ek gee jou oor in die mag van wrede mense wat weet hoe om uit te roei. Jy sal deur vuur verteer word, jou bloed sal vloei in die land, die gedagtenis aan jou sal verdwyn, want Ek, die Here, het gepraat.”
ESEGIËL 21:28-32 Nuwe Lewende Vertaling (NLV)
“En nou, mensekind, profeteer oor die Ammoniete en hulle gespot. Sê vir hulle die oppermagtige HERE sê: “Ek het my swaard getrek vir die slagting! Dit is skerp gemaak om te vernietig en dit blits soos weerlig! Jou towenaars en vals profete sien gesigte wat nie bestaan nie en vertel leuens oor die oorlog. En nou breek die oorlog uit teen mense wat boos is. Die finale dag van afrekening het vir hulle aangebreek. Sal Ek die swaard terugsit voordat Ek met jou afgereken het? Nee, Ek vernietig jou in jou eie land, die land waar jy gebore is. Ek stort my wraak uit oor jou. Ek koel my woede af op jou. Ek gee jou oor aan wrede mense wat weet hoe om mense te vernietig. Jy is brandstof vir die vuur. Jou bloed loop in jou eie land. Jy sal volledig uitgeroei word. Niemand sal jou meer onthou nie! “Ek, die HERE, het so gesê.”
ESEGIËL 21:28-32 Bybel vir almal (ABA)
En jy, mens, jy moet my boodskap bring, jy moet vir die mense sê: Die Here, Hy wat Here is, praat met die Ammoniete wat met sy volk gespot het. Jy moet vir die swaard sê: Swaard, swaard, Ek het jou uit jou leersak gehaal om mense dood te maak, Ek het jou blink gevryf om mense dood te maak en om te blink. Mense het gesê Ek het vir hulle gewys wat Ek met jou sal doen, maar dit is nie waar nie. Die tekens wat hulle gesien het, is vals. Swaard, Ek sal jou gebruik en Ek sal die nekke afkap van die mense wat moet sterf, die mense wat verkeerde dinge doen. Hulle laaste dag het gekom, die tyd het gekom om hulle die laaste maal te straf. En dan moet die swaard teruggaan na sy leersak. Jy, koning van Babel, jy is my swaard, jy moet teruggaan na jou land. Ek sal jou straf op die plek waar Ek jou gemaak het, in die land van waar jy kom. Ek is baie kwaad vir jou, my asem is soos vuur wat jou sal brand. Ek sal jou gee vir wrede mense wat weet hoe om dood te maak. Die vuur sal jou brand en jou bloed sal op die grond val. Niemand sal jou onthou nie, want Ek het gepraat, Ek, die Here.”
ESEGIËL 21:28-32 Afrikaans 1933/1953 (AFR53)
En jy, mensekind, profeteer en sê: So spreek die Here HERE aangaande die kinders van Ammon en hulle smaadrede; en jy moet sê: 'n Swaard, 'n swaard is getrek om te slag; dit is geskuur tot die uiterste toe om soos 'n weerligstraal te wees — onderwyl hulle vir jou, o swaard, 'n bedrieglike gesig sien, onderwyl hulle vir jou leuens voorspel — dat jy gesit sou word op die nekke van goddelose wat onheilig is, wie se dag gekom het in die tyd van uiteindelike afrekening! Steek dit weer in die skede. In die plek waar jy geskape is, in die land van jou oorsprong, sal Ek jou oordeel. En Ek sal oor jou my toorn uitgiet; Ek sal op jou blaas met die vuur van my grimmigheid en jou oorgee in die hand van barbare, mense wat verderf smee. Voedsel sal jy wees vir die vuur; jou bloed sal binne-in die land wees; aan jou sal nie meer gedink word nie; want Ek, die HERE, het dit gespreek.
ESEGIËL 21:28-32 Die Bybel 2020-vertaling (AFR20)
“En jy, mensekind, profeteer en sê, ‘So sê my Heer, die HERE, oor die Ammoniete en hulle bespotting. ’ Sê dan, ‘Swaard, swaard getrek vir 'n slagting, blink gevryf vir vernietiging, sodat jy 'n weerligstraal is – terwyl visioene oor jou vals is, die voorspelling oor jou leuens is, plaas hy jou op die nekke van die onheilige goddeloses, hulle wie se dag gekom het in die tyd van finale straf. “ ‘Sit dit terug in sy skede! Op die plek waar jy gemaak is, swaard, in die land van jou oorsprong, sal Ek jou oordeel. Ek sal my verontwaardiging oor jou uitstort, die vuur van my gramskap sal Ek teen jou aanblaas. Ek sal jou oorgee in die hand van woeste mense, vakmanne van vernietiging. Jy is vir die vuur bestem om verteer te word; jou bloed sal in jou eie grond wees, jy sal nie meer onthou word nie, ja, Ek, die HERE, het gepraat.’ ”
ESEGIËL 21:28-32 Contemporary Afrikaans Bible 2023 (CAB23)
En jy, mensekind, profeteer en sê: So spreek die HERE HERE aangaande die Ammoniete en oor hulle smaad; selfs sê jy: Die swaard, die swaard is uitgetrek; vir die slagting is dit stukkend om te verteer vanweë die glans. Terwyl hulle tevergeefs vir jou sien, terwyl hulle vir jou 'n leuen vertel, om jou oor die nekke te bring van die wat verslaan is, van die goddeloses wie se dag gekom het dat hulle ongeregtigheid 'n einde sal maak. Sal ek dit in sy skede laat terugkom? Ek sal jou oordeel op die plek waar jy geskape is, in die land van jou geboorte. En Ek sal my grimmigheid oor jou uitstort, Ek sal teen jou blaas in die vuur van my grimmigheid en jou oorgee in die hand van brute manne en vaardig om te vernietig. Jy sal 'n brandstof vir die vuur wees; jou bloed sal in die middel van die land wees; aan jou sal nie meer gedink word nie, want Ek, die HERE, het dit gespreek.
ESEGIËL 21:28-32 Die Boodskap (DB)
“Mens, sê vir almal wat in die land van Ammon bly, Ek sê die volgende oor hulle gespot met my volk. Die Here, die God van Esegiël, dink só oor hulle: Ek het my wapens reggekry om julle aan te val. Ek het my wapens reggemaak om julle te vernietig. My wapens blink soos ’n weerligstraal. Julle towenaars en die mense wat sê hulle hoor wat julle gode sê, het vir julle gelieg. Hulle het gesê niks sal met julle volk gebeur nie. Maar nou het die dag aangebreek dat Ek al julle mense gaan straf wat aanhou sleg doen. Die slegte mense se dag het aangebreek! Sal Ek my wapens neersit voor Ek klaar afgereken het met julle? Nee, Ek sal julle een vir een vernietig in julle eie land. Ek is kwaad oor wat julle alles gedoen het. En Ek sal julle in my woede straf. Dit sal vir julle voel of Ek vuur oor julle blaas, so erg gaan my woede wees. Ek sal julle oorgee sodat wrede mense julle namens My straf. Hierdie wrede mense weet hoe om mense te vernietig. Julle sal soos petrol wees wat op die vuur gegooi word. Julle sal in julle eie land doodgemaak word. Julle hele volk sal uitgewis word. Agterna sal niemand eers meer kan onthou dat daar so ’n volk soos die Ammoniete was nie! Dit is wat Ek, die Here, vir julle te sê het, Ammoniete.”