JESAJA 46:10-11
JESAJA 46:10-11 Die Boodskap (DB)
Net Ek kan sê wat uiteindelik gaan gebeur. Ek kan voor die tyd al praat oor die dinge wat selfs nog nie eens gebeur het nie. Wat Ek besluit het, staan vas. Wat Ek wil laat gebeur, gebeur uiteindelik. Ek roep ’n man uit die ooste. Soos ’n roofvoël kom hy van ’n ver plek aangevlieg. Ek laat hom doen wat Ek besluit het. Ek laat dit gebeur soos Ek dit beplan het.
JESAJA 46:10-11 Nuwe Lewende Vertaling (NLV)
Ek maak bekend wat gaan gebeur nog voor dit gebeur. Wat Ek besluit, voer Ek uit. Wat Ek wil, doen Ek. Uit die ooste roep Ek ’n roofvoël, ’n man uit ’n ver land, wat my opdrag sal uitvoer. Wat Ek gesê het, sal Ek laat gebeur. Wat Ek beplan, dit sal Ek doen.
JESAJA 46:10-11 Bybel vir almal (ABA)
Dit is Ek wat lank gelede gesê het wat sal gebeur. Ek het dit gesê lank voordat dit gebeur het. Dit is Ek wat sê Ek het besluit en dit sal gebeur, Ek sal doen wat Ek wil doen. Dit is Ek wat uit die ooste 'n man geroep het wat van ver kom soos 'n aasvoël. Ja, as Ek gesê het iets sal gebeur, dan gebeur dit. Ek doen wat Ek besluit het.
JESAJA 46:10-11 Afrikaans 1933/1953 (AFR53)
wat van die begin af verkondig die einde, en van die voortyd af wat nog nie gebeur het nie; wat sê: My raad sal bestaan, en al wat my behaag, sal Ek doen; wat 'n roofvoël roep uit die Ooste, die man van my raad uit 'n ver land; soos Ek dit gespreek het, sal Ek dit ook laat kom; Ek het dit voorberei, Ek sal dit ook doen.
JESAJA 46:10-11 Afrikaans 1983 (AFR83)
Ek kondig vantevore aan wat later sal kom, lank tevore al wat nog nie gebeur het nie. Ek sê wat Ek besluit het en dit gebeur, wat Ek wil, doen Ek. Ek roep 'n roofvoël uit die ooste, uit 'n ver land roep Ek 'n man wat my besluit sal uitvoer. Ek het dit gesê, en Ek sal hom laat kom, Ek het dit beplan en Ek sal dit doen.
JESAJA 46:10-11 Die Bybel 2020-vertaling (AFR20)
Ek wat van die begin af die afloop aankondig, van lank gelede af dit wat nog nie gebeur het nie; Ek wat sê, ‘My raadsbesluit sal standhou; alles wat Ek wil, sal Ek uitvoer,’ Ek wat uit die ooste 'n roofvoël roep, van 'n ver land af iemand roep vir my raadsbesluit. Ja, Ek het dit aangekondig; Ek sal dit beslis laat gebeur. Ek het dit gereedgemaak; Ek sal dit beslis uitvoer.
JESAJA 46:10-11 Contemporary Afrikaans Bible 2023 (CAB23)
en verkondig die einde van die begin af en van ouds af die dinge wat nog nie gedoen is nie, en sê: My raad sal bestaan, en ek sal doen al my behae; Hy roep 'n roofvoël uit die ooste, die man wat my raad uit 'n ver land uitvoer; ja, Ek het dit gespreek, Ek sal dit ook laat gebeur; Ek het dit voorgeneem, ek sal dit ook doen.