LEVITIKUS 1:5-17
LEVITIKUS 1:5-17 Afrikaans 1983 (AFR83)
Dan slag hy die bul daar in die teenwoordigheid van die Here, en die Aäronitiese priesters bring die bloed en sprinkel dit rondom teen die altaar by die ingang van die tent van ontmoeting. Die man slag die offerdier af en sny dit in stukke op. Die Aäronitiese priesters maak dan vuur op die altaar en sit hout op die vuur. Dan sit hulle die stukke vleis, die kop en die niervet op die hout op die altaarvuur. Die man was die binnegoed en die pote af, en 'n priester verbrand alles op die altaar. Dit is die brandoffer, 'n vuuroffer wat deur die Here aanvaar word. “As dit 'n offer uit die kleinvee is, 'n brandoffer uit die skape of bokke, bied die man 'n ram aan sonder liggaamsgebrek. Hy slag die dier daar in die teenwoordigheid van die Here, aan die noordekant van die altaar, en die Aäronitiese priesters sprinkel die bloed rondom teen die altaar. Dan sny die man die offerdier in stukke op, en die priesters sit die stukke vleis, die kop en die niervet op die hout op die altaarvuur. Die man was die binnegoed en die pote af, en die priester bring alles op die altaar en verbrand dit. Dit is die brandoffer, 'n vuuroffer wat deur die Here aanvaar word. “As dit 'n brandoffer van voëls is wat iemand vir die Here wil offer, bied hy 'n tortelduif of 'n ander duif aan. Die priester bring dit op die altaar, knyp die kop af en verbrand dit op die altaar. Die bloed word eers teen die kante van die altaar uitgedruk; dan verwyder die priester die krop en die vere en gooi dit langs die altaar aan die oostekant op die plek vir die as, en nadat hy die duif tussen die vlerke oopgeskeur het sonder om dit heeltemal middeldeur te skeur, verbrand hy dit in die vuur op die altaar. Dit is die brandoffer, 'n vuuroffer wat deur die Here aanvaar word.”
LEVITIKUS 1:5-17 Die Bybel 2020-vertaling (AFR20)
Daarna moet hy die jong bul voor die HERE keelaf sny en die seuns van Aäron, die priesters, moet die bloed naderbring en dit sprinkel reg rondom teen die altaar wat by die ingang van die Tent van Ontmoeting staan. Die dier vir die brandoffer moet dan afgeslag en in stukke opgesny word. Die seuns van die priester Aäron moet vuur op die altaar plaas en hout daarop rangskik. Die seuns van Aäron, die priesters, moet dan die stukke en die kop en niervet rangskik bo-op die hout wat op die vuur op die altaar is. Die persoon wat offer moet die binnegoed en pote met water afspoel. Die priester moet dit alles op die altaar verbrand. Dit is 'n brandoffer, 'n offergawe met 'n aangename geur vir die HERE. “ ‘As sy offer 'n brandoffer is uit die kleinvee, uit die skape of bokke, moet dit 'n ram sonder gebrek wees wat hy bring. Hy moet dit aan die noordekant van die altaar voor die HERE keelaf sny. Die seuns van Aäron, die priesters, moet die bloed reg rondom teen die altaar sprinkel. Die dier moet in stukke opgesny word, en die priester moet dit saam met die kop en die niervet rangskik bo-op die hout wat op die vuur op die altaar is. Die persoon wat offer moet die binnegoed en pote met water afspoel. Die priester moet dit alles naderbring en op die altaar verbrand. Dit is 'n geurige offer, 'n offergawe aan die HERE. “ ‘As sy offer vir die HERE 'n brandoffer is uit die voëls, moet dit 'n tortelduif of 'n jong duif wees. Die priester moet dit na die altaar bring. Hy moet die kop afknyp en op die altaar verbrand. Die bloed moet teen die sykant van die altaar uitgedruk word. Die persoon wat offer moet die krop en die derms verwyder en dit gooi op die plek waar die vetterige as gegooi word, aan die oostekant van die altaar. Hy moet die duif by die vlerke oopskeur sonder om dit in twee te verdeel. Dan moet die priester dit op die altaar verbrand, bo-op die hout wat op die vuur is. Dit is 'n geurige offer, 'n offergawe aan die HERE.’ ”
LEVITIKUS 1:5-17 Bybel vir almal (ABA)
Daarna moet hy die bul daar voor die Here slag, en die priesters van die nageslag van Aäron moet die bloed van die bul nader bring en hulle moet dit spat teen die altaar, die altaar wat voor die tent is waar die Here aan die Israeliete verskyn. Hulle moet dit oral rondom die altaar spat. Die persoon wat die offer gee, moet die bul slag en hy moet die vleis in stukke sny. Die priesters van die nageslag van Aäron moet vuur op die altaar sit en hulle moet hout op die vuur pak. Hulle moet die stukke vleis op die hout sit wat op die vuur op die altaar is, hulle moet ook die kop en die niervet daarop sit. Die persoon wat die offer gee, moet die pote en die binnegoed was, en die priester moet alles op die altaar verbrand. Dit is 'n brand-offer, 'n vuur-offer, dit ruik lekker vir die Here. “Wanneer iemand 'n skaap of 'n bok gee om 'n brand-offer te wees, dan moet hy 'n gesonde ram gee. Hy moet die ram daar voor die Here slag, langs die noordekant van die altaar, en die priesters van die nageslag van Aäron moet die bloed teen die altaar spat, oral rondom die altaar. Die persoon moet die kop afsny en hy moet die niervet afsny. Hy moet die vleis in stukke sny, en die priester moet alles langs mekaar op die hout sit wat op die vuur op die altaar is. Die persoon moet die binnegoed en die pote was, en die priester moet dit alles offer en verbrand op die altaar. Dit is 'n brand-offer, 'n vuur-offer, dit ruik lekker vir die Here. “Wanneer iemand vir die Here 'n voël wil gee om 'n brand-offer te wees, dan moet hy vir die Here 'n tortelduif of 'n makduif gee. Die priester moet die duif na die altaar bring. Hy moet die duif se nek omdraai en hy moet dit op die altaar verbrand. Hy moet die duif se bloed uitdruk teen die kant van die altaar. Daarna moet hy die krop en die vere neem en hy moet dit weggooi, oos van die altaar, op die ashoop. Hy moet die duif se vlerke amper afskeur, maar hy moenie dit heeltemal afskeur nie. Dan moet hy dit heeltemal op die altaar verbrand. Dit is 'n brand-offer, 'n vuur-offer, dit ruik lekker vir die Here.”
LEVITIKUS 1:5-17 Afrikaans 1933/1953 (AFR53)
Dan moet hy die jong bul voor die aangesig van die HERE slag; en die seuns van Aäron, die priesters, moet die bloed bring en die bloed rondom teen die altaar uitgooi wat by die ingang van die tent van samekoms is. Dan moet hy die brandoffer afslag en dit in sy stukke verdeel. En die seuns van Aäron, die priester, moet vuur op die altaar neersit en hout op die vuur reglê. Ook moet die seuns van Aäron, die priesters, die stukke, die kop en die vet reglê op die hout wat op die altaarvuur is. Maar die binnegoed en die pote moet hy met water was, en die priester moet dit alles op die altaar aan die brand steek as brandoffer, 'n vuuroffer van lieflike geur aan die HERE. En as sy offer 'n stuk kleinvee is, van skape of van bokke, as brandoffer, moet dit 'n ram sonder gebrek wees wat hy bring. En hy moet dit slag aan die noordekant van die altaar, voor die aangesig van die HERE; en die seuns van Aäron, die priesters, moet die bloed daarvan rondom teen die altaar uitgooi. Daarna moet hy dit in sy stukke verdeel, met die kop en die vet, en die priester moet dit reglê op die hout wat op die altaarvuur is. Maar die binnegoed en die pootjies moet hy met water was, en die priester moet dit alles bring en op die altaar aan die brand steek; 'n brandoffer is dit, 'n vuuroffer van lieflike geur aan die HERE. En as sy offer aan die HERE 'n brandoffer is van voëls, moet hy sy offer bring van tortelduiwe of van jong duiwe. En die priester moet dit na die altaar bring en die kop afknyp en op die altaar aan die brand steek, en die bloed moet teen die kant van die altaar uitgedruk word. Dan moet hy die krop met die vere daaraan verwyder en dit by die altaar gooi, aan die oostekant, op die asplek. Dan moet hy dit by die vlerke skeur sonder om hulle af te trek; en die priester moet dit op die altaar aan die brand steek, op die hout wat oor die vuur is; 'n brandoffer is dit, 'n vuuroffer van lieflike geur aan die HERE.
LEVITIKUS 1:5-17 Contemporary Afrikaans Bible 2023 (CAB23)
En hy moet die bul voor die aangesig van die HERE slag, en die priesters, die seuns van Aäron, moet die bloed bring en die bloed rondom teen die altaar sprinkel wat by die ingang van die tent van samekoms is. En hy moet die brandoffer smeer en dit in sy stukke sny. En die seuns van die priester Aäron moet vuur op die altaar steek en die hout in orde op die vuur lê. En die priesters, die seuns van Aäron, moet die dele, die kop en die vet, in volgorde lê op die hout wat op die vuur is wat op die altaar is. Maar sy binnegoed en sy bene moet hy in water was, en die priester moet alles op die altaar aan die brand steek as 'n brandoffer, 'n vuuroffer van lieflike geur aan die HERE. En as sy offer uit die kleinvee is, naamlik van die skape of van die bokke, as 'n brandoffer; hy moet dit 'n mannetjie sonder gebrek bring. En hy moet dit slag aan die kant van die altaar noordwaarts voor die aangesig van die HERE; en die priesters, die seuns van Aäron, moet sy bloed rondom op die altaar uitgooi. En hy moet dit in sy stukke sny, met sy kop en sy vet, en die priester moet dit op die hout wat op die vuur is wat op die altaar is, ordentlik neerlê. Maar hy moet die binnegoed en die pote met water was, en die priester moet dit alles bring en dit op die altaar aan die brand steek; dit is 'n brandoffer, 'n vuuroffer van lieflike geur aan die HERE. En as die brandoffer vir sy offer aan die HERE uit voëls is, moet hy sy offer van tortelduiwe of jong duiwe bring. En die priester moet dit na die altaar bring en sy kop afdraai en dit op die altaar aan die brand steek; en die bloed daarvan moet aan die kant van die altaar uitgedraai word. En hy moet sy oes met sy vere afpluk en dit langs die altaar gooi, aan die oostekant, by die plek van die as. En hy moet dit met sy vlerke kloof, maar dit nie stukkend verdeel nie; en die priester moet dit op die altaar aan die brand steek, op die hout wat op die vuur is; dit is 'n brandoffer, 'n vuuroffer, van 'n lieflike geur vir die HERE.
LEVITIKUS 1:5-17 Nuwe Lewende Vertaling (NLV)
Slag die bul in die teenwoordigheid van die HERE. Die seuns van Aäron, die priesters, sal die bloed vat en dit teen die kante van die altaar sprinkel wat voor die tent van ontmoeting staan. Wanneer die dier geslag en in stukke gesny is, sal die seuns van Aäron die priester op die altaar ’n houtvuur maak. Aäron se seuns sal dan die stukke van die dier saam met die kop en die vet op die houtvuur neersit. Maar die binnegoed en die pote moet eers met water gewas word. Dan sal die priesters die hele offer op die altaar verbrand. Dit is die brandoffer, met vuur gemaak en aangenaam vir die HERE. “As julle ’n skaap of bok bring as ’n brandoffer, bring ’n ram sonder enige liggaamsgebrek. Slag die dier aan die noordekant van die altaar in die teenwoordigheid van die HERE. Aäron se seuns, die priesters, sal die bloed langs die kante van die altaar sprinkel. Sny die dier in stukke. Die priesters sal die stukke van die offer saam met die kop en die vet bo-op die altaar met die houtvuur neersit. Die binnegoed en die pote moet eers met water gewas word. Dan sal die priesters die hele offer op die altaar verbrand. Dit is die brandoffer, gemaak met vuur en aangenaam vir die HERE. “As julle ’n voël bring as brandoffer vir die HERE, kies ’n tortelduif of ’n jong duif. Die priester sal die voël na die altaar toe neem, sy nek omdraai en die kop op die altaar verbrand. Hy moet dan die bloed langs die kante van die altaar laat uitdrup. Die priester moet daarna die krop en die vere verwyder en dit aan die oostekant van die altaar in die as gooi. Die priester moet dan die voël aan sy vlerke uitmekaartrek, maar sonder om dit middeldeur te skeur. Dit is die brandoffer, gemaak met vuur en aangenaam vir die HERE.”