PSALMS 34:7-9
PSALMS 34:7-9 Afrikaans 1983 (AFR83)
Ek is een van die ellendiges wat geroep het. Die Here het gehoor, uit al my benoudhede het Hy my gered. Die Engel van die Here slaan sy laer op rondom dié wat die Here dien, en red hulle. Kom ondervind en sien self dat die Here goed is! Dit gaan goed met die mens wat by Hom skuil.
PSALMS 34:7-9 Die Bybel 2020-vertaling (AFR20)
Hierdie magtelose het geroep en die HERE het gehoor, en uit al sy benoudhede het Hy hom verlos. Die •Engel van die HERE trek 'n laer rondom hulle wat vir die HERE ontsag het en Hy red hulle. Beproef dit en ervaar: Die HERE is goed, gelukkig is die mens wat by Hom skuil.
PSALMS 34:7-9 Die Boodskap (DB)
Kyk maar na my. Ek was swak en hulpeloos. Toe het ek gebid en die Here het my gehelp. Hy het my uit al my krisisse gehelp. Die Here stuur sy engele om mense te beskerm wat Hom dien. Hy verlos hulle wat Hom aanbid. Julle moet self kom ervaar hoe goed die Here is. Jy is baie gelukkig as jy van die Here afhanklik is om jou op te pas.
PSALMS 34:7-9 Nuwe Lewende Vertaling (NLV)
Hierdie ellendige mens het geroep, en die HERE het gehoor. Hy het hom uit al sy benoudheid gered. Want die Engel van die HERE hou wag oor almal wat Hom dien, en Hy red hulle. Beproef en sien dat die HERE goed is. Geseënd is die persoon wat op Hom vertrou!
PSALMS 34:7-9 Bybel vir almal (ABA)
Ek kan myself nie beskerm nie, ek het gebid, en die Here het gehoor. Hy het my gered van alles wat dit sleg laat gaan het met my. Die Engel van die Here beskerm die mense wat die Here dien en Hy red hulle. Julle moet self voel en sien dat die Here goed is. Dit gaan goed met die mens wat vra dat die Here hom moet beskerm.
PSALMS 34:7-9 Afrikaans 1933/1953 (AFR53)
Sajin. Hierdie ellendige het geroep, en die HERE het gehoor, en Hy het hom uit al sy benoudhede verlos. Get. Die Engel van die HERE trek 'n laer rondom die wat Hom vrees, en red hulle uit. Tet. Smaak en sien dat die HERE goed is; welgeluksalig is die man wat by Hom skuil!
PSALMS 34:7-9 Contemporary Afrikaans Bible 2023 (CAB23)
Die Engel van die HERE trek laer op rondom die wat Hom vrees, en red hulle uit. Smaak en sien dat die HERE goed is; geseënd is die man wat op Hom vertrou. Vrees die HERE, sy heiliges, want die wat Hom vrees, het geen gebrek nie.