Waarvoor Wag Jy Dan? Deur Angelique Du ToitVoorbeeld

Jou uitnodiging wag op jou  

Jy wag miskien op die een of ander teken – ’n bekragtiging, ’n bevestiging, enige inligting om jou aan te vuur, te bemagtig of toestemming te gee. Daar was miskien vertragings as gevolg van twyfel, groot teleurstellings, of selfs tye van depressie. 

Dalk voel jy nog altyd heel bevoeg en bekwaam, maar dat jy nooit eintlik ingepas het nie. Jy maak altyd jou voorstelle met entoesiasme, maar hulle word nooit ernstig opgeneem nie. Jy het miskien selfs die sportspan probeer haal, aan proewe deelgeneem, maar dit nooit bereik nie. Die balletklasse wat jy met soveel passie bygewoon het, het nooit tot ’n rol in een van die produksies gelei nie. Dit was jou ideaal om ’n dokter te word, maar weens omstandighede was dit onmoontlik om universiteit toe te gaan.

Nou voel dit sinneloos. Doelloos. Maar tog is daar diep binne jou – in daardie plek waar jou lewensbron is – ’n voortdurende herinnering, ’n konstante aanwyser, ’n onophoudelike gekrap wat fluister: “Jy is hiervoor gebore.”

En dit is waar. Jy is vir meer geskep. Jy het ’n opdrag in jou DNS wat deur God ontwerp is. Moenie minder aanvaar nie, moenie moed opgee nie en moenie afgeskrik word nie. Elke masjien of stuk gereedskap wat vir ’n spesifieke doel vervaardig word, kom met die vervaardiger se handleiding. Jy is wonderbaarlik geskape, met ’n baie spesifieke doel. Die Een wat jou geskep het, het jou met ’n doel, plan, passie en produktiwiteit beplan en ontwerp (sien Eksodus 9:16 en Filippense 2:13). En hierdie eienskappe is in jou murg en been gesetel.