’N TROUE IN KANA

Jesus, sy ma en broers is saam met sy dissipels genooi na ’n troue in Kana. Tydens die huweliksonthaal het die wyn opgeraak. Daar naby het ses groot klipkanne gestaan. Jesus het vir die kelners gesê om die kanne vol water te maak. Toe die kanne vol was, het Jesus die kelners aangesê om daarvan na die seremoniemeester te neem. Toe die seremoniemeester die wyn proe wat eers water was, was hy verras dat hulle hierdie wyn nie eerste bedien het nie, want dit was die heel beste wyn.

Dit was die eerste wonderwerk wat Jesus gedoen het. Dit het sy dissipels in Hom laat glo. Jesus het sy eerste wonderwerk gedoen om iemand uit ’n moeilike situasie te red – om te verhoed dat die bruidegom in ’n vreeslike verleentheid beland. Jesus wil ook in jou lewe die gewone dinge verander in iets baie spesiaals en betekenisvols. Vertrou op Hom en gehoorsaam Hom.

IETS OM OOR NA TE DINK: Die kelners het gedoen wat hulle gevra is om te doen sonder om vrae te vra.

FEIT: Daar het dikwels waterkanne gestaan by die ingang van ’n huis sodat mense voor ete hul hande kon was (Markus 7:3-4).