Wanneer Alles Blou IsVoorbeeld

Die donker waters van depressie

Volgens die Wêreldgesondheidsorganisasie is die siekte wat die meeste mense van ’n produktiewe lewe beroof depressie. Geestesgesondheidsprobleme word steeds geweldig misverstaan en gestigmatiseer. “Ruk jou net reg,” sê mense graag. En tog beïnvloed depressie die manier hoe ’n mens eet, slaap, dink en voel. Sonder behandeling kan die simptome vir weke of jare voortsleep — en ’n geweldig negatiewe invloed op ’n mens se lewe hê.

Sê vir die Here dankie vir medisyne en vir talentvolle dokters en terapeute wat jou kan help. Maar jy moet óók jou gemoedstoornis voor God se troon gaan neerlê. Hy weet — beter as jyself — wat die toestand van jou gees is. Dalk voel jou situasie hopeloos, maar Hy belowe dat Hy vir jou wysheid en insig sal gee terwyl jy jou pad vind oor die donker waters van depressie.

LOOP JOU BEKOMMERNIS WEG

’n Studie het bevind dat mense wat ses dae per week vir 35 minute lank stap ’n afname van 47% in depressievlakke ervaar het. Drie uur se gereelde oefening per week is nét so effektief om die simptome van ligte tot matige depressie te verlig as antidepressante! Navorsers het selfs al presiese oefeningsriglyne opgestel om dieselfde effek op die liggaam te bewerkstellig as wat ’n antidepressant sou hê. Probeer om drie tot vyf kardiovaskulêre sessies per week in te pas, elkeen 45 tot 60 minute lank en teen ’n matige intensiteit. Vul dit aan met kragoefeninge: drie stelle van agt repetisies. Terwyl intensiewe aktiwiteit daardie goedvoel-endorfiene afskei waarvan ons almal so baie hou, is dit gereelde aktiwiteit wat die groei van senuweeselle in die brein stimuleer — en dís wat help om ’n mens se gemoed te lig en depressie teen te werk.