Oomblikke Van StilteVoorbeeld

Ruimskoots

Een van die gedagteprentjies wat ek koester, is dié van ’n pa wat op ’n markplein in Nazaré, ’n Portugese kusdorp, sit. Rondom hom staan vier seuntjies in afwagting – hul koppe vooroor om te sien wat hul pa in sy vuis toevou. En dan maak hy sy vingers wyd oop. Op sy palm lê vier sakkies. In elkeen is ’n paar klein vishoeke, sinkers en ’n opgerolde vislyn aan ’n plankie. Die seuntjies is in ekstase. Hulle glimlag elkeen by die wete: Pa is lief vir mý!

Hierdie prentjie herinner my aan ons hemelse Vader wat sy hand oopmaak en ruimskoots aan sy kinders uitdeel – dit wat hulle nodig het – en nóg. Meer as genoeg!

Dit neem nie die feit weg dat daar moeilike tye in ons elkeen se lewe is nie. Daar is tye waarin ons wanhoop aan God se teenwoordigheid. Ons wonder of Hy ons gebede enigsins hoor en of ons vir Hom saak maak. Ons kan egter weet: Hy is daar. Ons is nie ’n oomblik uit sy gedagtes nie. Hy wil ons ruimskoots seën. Met die allerbeste. Met dit wat mot en roes nie sal verniel nie.

Saam met sy seën kom ook ’n opdrag. Soms gee Hy net vir ons ’n hoek en sinker. Hy wil hê ons moet uitgaan en self gaan visvang. In die uitvoer van sy opdrag is verdere seën opgesluit. Ons moet in afwagting op Hom as Vader bly leef – net soos die klein seuntjies met hul oë op hul pa se toegevoude vuis.

Vader, baie dankie vir u troue sorg. Amen