Seisoene Van Die HuwelikVoorbeeld

VEG TEEN DIE WINTER

Sê vir my hoe jy op die oomblik oor jou huweliksmaat voel en hoe jy teenoor hom of haar optree en ek sal vir jou sê in watter seisoen jou huwelik is. Ons gaan vandag op die winterhuwelik fokus.

Watter emosies word in die winter ervaar? Seerkry, woede, teleurstelling, eensaamheid en verwerping. Watter gesindhede heers gedurende ’n winterhuwelik? Negatiwiteit. Jy hoor dalk opmerkings soos: “Ek voel so mismoedig in my huwelik.” “Dit is net ’n frustrasie.” “Ek is nie seker of ons dinge gaan kan uitwerk nie.”

Watter optrede kenmerk ’n winterhuwelik? Om kortaf of glad nie met mekaar te praat nie en dalk is daar selfs afbrekende of gewelddadige optrede. In die winterseisoen van die huwelik is huweliksmaats nie geneë om aan hulle verskille te werk nie. Gesprekke verander in argumente. Daar is nie meer ’n gevoel van eensgesindheid nie. Die huwelik is soos twee mense wat in aparte iglo’s bly.

Die goeie nuus is dat paartjies in ’n winterhuwelik dikwels desperaat genoeg raak om ’n einde aan hierdie ongelukkigheid te maak en hulp by ’n berader of leraar gaan soek. Spreuke verwys na goeie raad van iemand as iets wat so heerlik soos parfuum is. Goeie raad is baie kosbaar en die perspektief van iemand buite die huwelik is gewoonlik noodsaaklik vir mense wat werklik wil verander. Dié wat werklik hulp wil hê, sal dit soek.

Vader, wanneer ons verhouding in die moeilikheid is en met verwerping en ontmoediging gevul is, help ons asseblief om ’n wyse raadgewer te vind. Gee ons die genade en energie om te werk aan die liefde tussen ons.