<div class="version vid6 iso6393afr" data-vid="6" data-iso6393="afr">
 <div class="book bkACT">
 <div class="chapter ch19" data-usfm="ACT.19">
 <div class="label">19</div><div class="s1">Paulus in Efese</div><div class="p"> 1Terwyl Apollos in Korinte was, het Paulus deur die binneland gereis en in Efese gekom. Daar het hy 'n groepie gelowiges gekry 2vir wie hy gevra het: &#8220;Het julle die Heilige Gees ontvang toe julle gelowig geword het?&#8221;</div><div class="p">&#8220;Ons het nog nie eens gehoor of die Heilige Gees al gekom het nie,&#8221; het hulle geantwoord.</div><div class="p"> 3&#8220;Watter soort doop het julle dan ontvang?&#8221; vra hy toe.</div><div class="p">&#8220;Die doop van Johannes,&#8221; antwoord hulle.</div><div class="p"> 4Daarop s&#234; Paulus: &#8220;Johannes het die mense gedoop as hulle hulle bekeer het. Maar hy het vir die volk ges&#234; dat hulle in die Een moet glo wat n&#225; hom kom, dit is in Jesus.&#8221;</div><div class="p"> 5Toe hulle dit hoor, het hulle hulle in die Naam van die Here Jesus laat doop. 6Paulus het hulle ook die hande opgel&#234;. Toe het die Heilige Gees op hulle gekom, en hulle het ongewone tale of klanke gebruik, en hulle het geprofeteer. 7Hulle was altesaam omtrent twaalf.</div><div class="p"> 8Paulus het drie maande lank met vrymoedigheid in die sinagoge geredeneer oor die koninkryk van God en die mense daarvan probeer oortuig. 9Maar party was koppig en wou hulle nie laat oortuig nie. Hulle het ook in die openbaar die leer van die Here belaglik probeer maak. Toe het Paulus hulle verlaat en die gelowiges afsonderlik geneem en daagliks in die saal van Tirannus besprekings gehou. 10Dit het twee jaar lank so aangehou, sodat al die inwoners van die provinsie Asi&#235;, Jode sowel as Grieke, die woord van die Here gehoor het.</div><div class="s1">Die seuns van Skeva</div><div class="p"> 11God het deur Paulus wonderbaarlike dinge gedoen. 12Selfs doeke of voorskote wat aan sy lyf geraak het, is op siekes gesit en dan het hulle siektes verdwyn; en die bose geeste het uit hulle uitgegaan.</div><div class="p"> 13Party Jode wat rondgegaan het om bose geeste te besweer, het dit ook gewaag om die Naam van die Here Jesus daarvoor te gebruik. Hulle het ges&#234;: &#8220;Ek besweer julle in die Naam van di&#233; Jesus wat deur Paulus verkondig word.&#8221; 14Dit was die sewe seuns van 'n Joodse priesterhoof, Skeva, wat dit gedoen het.</div><div class="p"> 15Maar een van die bose geeste het vir hulle ges&#234;: &#8220;Jesus ken ek, en van Paulus weet ek, maar julle, wie is julle?&#8221;</div><div class="p"> 16Die man met die bose gees spring toe onder hulle in en oorweldig hulle. Hy was te sterk vir hulle, sodat hulle kaal en stukkend geslaan uit daardie huis gevlug het.</div><div class="p"> 17Al die Jode en Grieke wat in Efese gewoon het, het daarvan te hore gekom. Vrees het hulle almal oorval, en die Naam van die Here Jesus is geprys. 18Baie van die mense wat gelowig geword het, het ook gekom en al hulle towerpraktyke openlik bely en bekend gemaak. 19Heelparty van die mense wat toorkunste beoefen het, het hulle boeke gebring en voor almal verbrand. Hulle het die waarde daarvan bereken en gevind dat dit vyftig duisend silwermuntstukke werd was.</div><div class="p"> 20So het die woord van die Here sy krag getoon en al hoe verder versprei.</div><div class="s1">Die oproer in Efese</div><div class="p"> 21Na hierdie gebeurtenisse het Paulus besluit om deur Masedoni&#235; en Agaje te reis en na Jerusalem toe te gaan. &#8220;Nadat ek daar was,&#8221; het hy ges&#234;, &#8220;moet ek Rome ook besoek.&#8221;</div><div class="p"> 22Hy het twee van sy helpers, Timoteus en Erastus, vooruit gestuur Masedoni&#235; toe, maar self nog 'n tyd lank in die provinsie Asi&#235; agtergebly.</div><div class="p"> 23Juis toe het daar 'n groot opskudding ontstaan oor die leer van die Here. 24'n Silwersmid met die naam Demetrius het silwerbeelde van die tempel van Artemis gemaak en vir die vakmanne 'n goeie verdienste verskaf. 25Hy roep hulle en ander mense wat soortgelyke werk doen, toe bymekaar en s&#234; vir hulle: &#8220;Mense, julle weet dat ons voorspoed van hierdie werk afhang. 26Julle sien en hoor self dat hierdie Paulus daarin geslaag het om nie net in Efese vir hom 'n groot aanhang te kry nie, maar ook in byna die hele provinsie Asi&#235;. Hy s&#234; dat goed wat met die hand gemaak word, nie gode is nie. 27Ons bedryf staan in gevaar om 'n slegte naam te kry. En nie net dit nie. Die gevaar is ook dat die tempel van die groot godin Artemis sy betekenis sal verloor en dat sy van haar grootheid berowe sal word, hierdie godin wat in die hele provinsie Asi&#235; en oor die hele w&#234;reld vereer word.&#8221;</div><div class="p"> 28By die aanhoor hiervan het hulle woedend geword en geskreeu: &#8220;Groot is Artemis van die Efesi&#235;rs!&#8221;</div><div class="p"> 29Die oproer het oor die hele stad uitgebrei. Soos een man het die mense na die amfiteater toe gestorm. Hulle het vir Gaius en Aristargos, twee Masedoni&#235;rs wat saam met Paulus gereis het, gegryp en saamgesleep.</div><div class="p"> 30Paulus wou self met die skare gaan praat, maar die gelowiges wou hom dit nie toelaat nie. 31Ook het party van die ho&#235; amptenare van die provinsie Asi&#235; wat goedgesind was teenoor Paulus, vir hom 'n boodskap gestuur om hom te waarsku om nie na die amfiteater toe te gaan nie.</div><div class="p"> 32Almal het deurmekaar geskreeu, en die hele vergadering was in die war. Die meeste mense het nie geweet hoekom hulle daar bymekaar was nie. 33Toe die Jode vir Aleksander vorentoe stoot, het party van die mense vir hom ges&#234; wat aan die gang is. Hy het met sy hand gewys dat hy iets vir die volk wil s&#234;. 34Maar toe hulle merk dat hy 'n Jood is, het hulle almal byna twee uur lank uit een mond aangehou skreeu: &#8220;Groot is Artemis van die Efesi&#235;rs!&#8221;</div><div class="p"> 35Uiteindelik het die stadsklerk daarin geslaag om die skare tot bedaring te bring. &#8220;Efesi&#235;rs,&#8221; het hy ges&#234;, &#8220;watter mens weet nou nie dat die stad van die Efesi&#235;rs die beskermer is van die tempel van die groot Artemis en van haar beeld wat uit die hemel geval het nie? 36Niemand kan dit betwis nie. Bedaar dus en moenie iets oorhaastigs doen nie. 37Julle het hierdie mans hierheen gebring alhoewel hulle nie die tempel berowe of ons godin belaster het nie. 38Die hofsittings word gehou, en daar is regters. As Demetrius en sy vakmanne 'n klag teen iemand het, laat hulle mekaar daar gaan aankla. 39En as julle verder wil gaan, moet die saak op 'n wettige volksvergadering behandel word, 40want ons loop gevaar om van opstand aangekla te word oor die dinge wat vandag hier gebeur het. Daar is geen rede vir hierdie oploop nie, en ons sal dit nie kan verantwoord nie.&#8221;</div><div class="p">Deur dit te s&#234;, het hy die byeenkoms uitmekaar laat gaan.</div>
 </div>
 </div>
</div>

<div class="version vid6 iso6393afr" data-vid="6" data-iso6393="afr">
 <div class="book bkACT">
 <div class="chapter ch20" data-usfm="ACT.20">
 <div class="label">20</div><div class="s1">Paulus gaan na Masedoni&#235; en Griekeland toe</div><div class="p"> 1Nadat die oproer bedaar het, het Paulus die gelowiges bymekaargeroep en hulle moed ingepraat. Daarna het hy hulle gegroet en Masedoni&#235; toe vertrek. 2Op sy reis deur daardie gebiede het hy die gelowiges telkens met sy prediking bemoedig.</div><div class="p">Hy kom toe in Griekeland aan, 3waar hy drie maande gebly het. Toe hy op vertrek gestaan het Siri&#235; toe, het hy van 'n Joodse komplot teen hom te hore gekom en besluit om deur Masedoni&#235; terug te gaan.</div><div class="p"> 4Pirrus se seun Sopater van Berea het saam met Paulus gereis, en ook Aristargos en Sekundus, albei van Tessalonika, Gaius van Derbe, en Timoteus, asook Tigikus en Trofimus, albei van die provinsie Asi&#235;. 5Hulle het vooruitgegaan en in Troas vir ons gewag. 6Na die fees van die ongesuurde brood het ons van Filippi af met 'n skip vertrek en vyf dae later by hulle in Troas aangekom. Daar het ons sewe dae gebly.</div><div class="s1">Paulus in Troas</div><div class="p"> 7Ons het die Sondag bymekaargekom vir die gemeenskaplike maaltyd. Paulus het die gelowiges toegespreek, en aangesien hy die volgende dag sou vertrek, het hy tot middernag aangehou. 8Daar was heelwat lampe in die bovertrek waar ons bymekaar was.</div><div class="p"> 9'n Jongman met die naam Eutigus het op die vensterbank gesit. Hoe langer Paulus gepraat het, hoe vaker het Eutigus geword. Hy het naderhand vas aan die slaap geraak en uit die derde verdieping tot op die grond geval. Toe hulle hom optel, was hy dood.</div><div class="p"> 10Paulus het ondertoe gegaan, hom oor Eutigus uitgestrek en hom teen hom vasgedruk en ges&#234;: &#8220;Moet julle nie ontstel nie. Hy lewe!&#8221;</div><div class="p"> 11Paulus het weer boontoe gegaan, brood gebreek en ge&#235;et. Hy het nog lank met hulle gepraat, tot dagbreek, en daarna vertrek. 12Die mense het toe die seun lewend weggebring huis toe.</div><div class="p">Hulle was buitengewoon bemoedig deur alles.</div><div class="s1">Die reis van Troas na Milete</div><div class="p"> 13Ons het vooruit per skip na Assus toe vertrek, waar ons vir Paulus aan boord sou neem. Dit was sy opdrag, omdat hy self oor land daarheen wou gaan. 14Toe hy ons in Assus kry, het ons hom aan boord geneem en na Mitilene toe gevaar. 15Daarvandaan het ons die volgende dag verder gevaar en tot regoor Chios gekom. Die dag daarna het ons Samos bereik en nog 'n dag later Milete.</div><div class="p"> 16Paulus het besluit om by Efese verby te vaar, sodat hy nie tyd in die provinsie Asi&#235; sou verloor nie, want hy was haastig om, as dit kon, op pinksterdag in Jerusalem te wees.</div><div class="s1">Paulus spreek die ouderlinge van Efese toe</div><div class="p"> 17Van Milete af het Paulus 'n boodskap na Efese toe gestuur om die ouderlinge van die gemeente te laat roep. 18Toe hulle by hom kom, s&#234; hy vir hulle: &#8220;Julle weet hoe ek die hele tyd, van die eerste dag af dat ek in die provinsie Asi&#235; gekom het, onder julle geleef het; 19hoe ek die Here in alle nederigheid gedien het te midde van droefheid weens die vervolginge wat ek deur die komplotte van die Jode moes verduur. 20Julle weet dat ek niks teruggehou het wat vir julle voordelig kon wees nie, toe ek by julle in die openbaar gepreek en julle in julle huise onderrig het. 21Ek het sowel die Jode as die Grieke ernstig vermaan om hulle tot God te bekeer en in ons Here Jesus te glo.</div><div class="p"> 22&#8220;En nou gaan ek Jerusalem toe, daartoe gedring deur die Gees. Wat d&#225;&#225;r met my sal gebeur, weet ek nie. 23Ek weet dat die Heilige Gees my in elke stad verseker dat gevangenskap en vervolging op my wag. 24Maar al is my lewe vir my kosbaar, reken ek dit van geen belang nie as ek maar net my lewenstaak kan voltooi en die dienswerk wat ek van die Here Jesus gekry het, kan klaar maak: dit is om die evangelie van God se genade te verkondig.</div><div class="p"> 25&#8220;Ek het onder julle almal rondgegaan en die koninkryk van God verkondig, maar nou weet ek dat julle my nie weer sal sien nie. 26Daarom verklaar ek vandag dat dit nie my skuld is as enigeen van julle verlore gaan nie, 27want ek het nie nagelaat om die heilsplan van God in sy volle omvang aan julle te verkondig nie. 28Pas julle self op en die hele kudde wat die Heilige Gees onder julle sorg gestel het. Soos wagters 'n kudde versorg, so moet julle die gemeente van God versorg wat Hy vir Hom verkry het deur die bloed van sy eie Seun. 29Ek weet dat daar n&#225; my vertrek wrede wolwe onder julle sal indring, en hulle sal die kudde nie ontsien nie. 30Ja, uit julle eie geledere sal daar mense na vore kom wat met leuens die gelowiges agter hulle aan sal probeer verlei. 31Wees waaksaam. Onthou dat ek elkeen van julle drie jaar lank onderrig het, aanhoudend, dag en nag, baie keer met trane. 32Maar nou vertrou ek julle aan God toe en aan die woord van sy genade. Die woord is magtig om julle op te bou en julle in die se&#235;ninge te laat deel wat Hy aan al die gelowiges as erfdeel belowe het.</div><div class="p"> 33&#8220;Ek het niemand se geld of klere begeer nie. 34Julle weet self dat ek vir myself en vir die mense wat saam met my was, gesorg het deur met hierdie twee hande van my te werk. 35Deur my voorbeeld het ek in elke opsig vir julle gewys dat ons hard moet werk sodat ons die armes kan help. Onthou die woorde van die Here Jesus. Hy het self ges&#234;: Om te gee, maak 'n mens gelukkiger as om te ontvang.&#8221;</div><div class="p"> 36Nadat Paulus dit ges&#234; het, het hy saam met hulle almal gekniel en gebid. 37Almal het baie gehuil en hom omhels en gesoen. 38Hulle was veral hartseer omdat hy ges&#234; het dat hulle hom nie weer sou sien nie.</div><div class="p">Daarna is hulle saam met hom na die skip toe.</div>
 </div>
 </div>
</div>

HandelingeVoorbeeld

Skrif

Aangaande hierdie leesplan

Verwante Leesplanne